Comeza o curso e Xela e Brais reencóntranse despois de que ela pasase un mes en Londres. É tanta a paixón acumulada neste tempo que dificilmente a poden conter.

Xela e Brais coñecéronse o ano pasado no curso de teatro. A afección pola arte dramática de Brais vén de familia; os pais de Xela, en cambio, non parecen demasiado entusiastas.

Coñecemos os compañeiros de curso de Xela e de Brais. Agardan con expectación a chegada de Mónica, a súa monitora, mais cando a porta abre atopan unha sorpresa inagardada.

A aparición de Talía causa notable desconcerto entre os rapaces do curso de teatro. As comparacións con Mónica son inevitables, do mesmo xeito que a curiosidade por saber máis desa muller misteriosa.

Cando Brais lles conta aos seus pais quen é a súa nova monitora de teatro, a reacción destes adquire niveis de hilaridade totalmente inesperados.

Comezou o curso. Xela está indignada con Talía. Considera as súas aulas aburridas e carentes de interese. Brais, en cambio, parece atraído pola descuberta dos autores clásicos do teatro universal.

Xela e Brais asisten á representación da obra 'As Incoherencias de Antígona', dirixida e interpretada por Talía. A función déixaos sen palabras. A visita posterior aos cameríns tamén.

Talía convence a Brais para falar con ela a soas nos cameríns. Xela non pode disimular a súa sorpresa. Que terá que dicirlle aquela muller?

No curso de teatro, os alumnos representan os monólogos que escolleron. Por vez primeira, o talento descomunal de Brais móstrase en todo o seu esplendor. Ninguén fica indiferente, nin sequera Talía.  

O episodio apaixonado con Talía turbou a Brais, que sente un desacougo no seu interior difícil de explicar. Cando ve no Informe Semanal unha reportaxe sobre as orixes da relación entre Emmanuel Macron e a súa muller Brigitte, algo estraño o remoe por dentro.

Brais agarda con impaciencia o seu primeiro encontro con Talía tras o episodio apaixonado da semana anterior. A profesora amósase, porén, fría e distante. Acaso aquela promesa de domar o seu descomunal talento era mentira?

Brais vai á casa de Talía para o seu primeiro ensaio particular. A situación excítao e intimídao a partes iguais. A profesora promete aprenderlle todo canto sabe.

As probas para a nova produción do CDG están cada vez máis próximas. Talía e Brais traballan arreo para estaren preparados cando a data sexa estabelecida finalmente.

Neva en Santiago. Brais e Xela divírtense con aquela situación inesperada. De súpeto, aparece Eliseo, o mozo de Talía. Que quere? Por que se presenta á porta do instituto inopinadamente?

Tras o incidente con Eliseo, Brais corre cara á casa de Talía. Que diaños acontece? Talía non parece estar preocupada. Tranquiliza a Brais e prégalle que se centre no seu traballo: o desenvolvemento do seu formidable talento.

Chegou o día da proba. Antes de entrar no Salón Teatro, Brais toma algo cos seus pais na cafetaría do lado, o mitico Rhin. Alí, cadran cun dos referentes do teatro galego: Quico Cadaval.

É a hora da verdade. Brais enfróntase á temida proba para conseguir un papel na próxima produción do Centro Dramático Galego. Estará á altura?

Brais e os seus pais van comer xuntos ao Dezaseis. A espera polo veredicto do tribunal faise interminable. Conseguirá o papel ou non? Pase o que pase, a súa vida e a súa relación con Talía mudarán para sempre.

Brais foi escollido no casting do CDG. A súa familia celébrao eufórica. Xela, malia a distancia dos últimos tempos, tamén se sente conmovida polo triunfo do seu mozo.

Brais agradeceu os afagos de Xela e da súa familia, pero bota en falta celebrar o éxito coa persoa que máis o axudou a conseguilo, de maneira que vai á casa do río para ver a Talía e desexarlle felices festas.

Hai tanta expectación arredor de Brais, que o delicado equilibrio que sustenta a súa relación con Talía ameaza con se vir abaixo en calquera momento. Calquera malentendido, calquera resposta mal dada, pode estragalo todo.

Coa volta das aulas, Brais reencóntranse por fin con Talía. Retoman o curso de teatro e a paixón interrompida, pero...

Despois de se veren sorprendidos pola Señorita Varela, Brais e Talía combinan para afrontaren xuntos as ameazas que poñen en perigo a súa relación

A situación é dramática. Brais séntese acurralado e necesita compartir o seu desacougo con alguén. Só a súa amiga Ana parece comprendelo.

Chega o día de comezar os ensaios. Brais coñece os seus compañeiros. Axiña dá mostras do seu formidable talento.

O formidable talento de Brais transcende os propios ensaios. Con el chegou o escándalo. A súa imaxe convérteo nunha icona sexual en todo o país e xera unha expectación inusual respecto á nova produción do CDG. 

O escándalo saltou aos medios, pero a produción non pode deterse. Non queda nada para a estrea. Brais está desolado. Será capaz de soportar a presión?

Chegou o día. O Rosalía de Castro da Coruña énchese para a estrea do Soño dunha noite de verán. É o día de Brais. E de Talía?