Música

  • The Rapants lanza “Viaxei”. Do rock á cumbia e unha bóla de discoteca

    The Rapants vén de publicar "Viaxei",o segundo e último avance do seu novo disco, Rapants Club. Un retrouso pegadizo e unha produción elaborada, para un tema en que os rapantes achéganse, desde o rock aos ritmos latinos.

    Desde a banda de Muros explican que nesta ocasión, "os sintetizadores e os riffs desafiantes danse cita nun tema que dá boa conta da variedade estilística, guitarras frenéticas e retrousos memorables que conformarán o álbum”, que se presentará ao vivo o 28 de marzo no Multiusos do Sar.

    Música

  • Laura LaMontagne regresa con "SonRisas Falsas", unha “demoledora crítica” á industria musical galega

    “Aquí non hai managers Laura/ Isto é galiza ti que esperabas”/ Sempre de última “non pidas nada”/Festa de ratas, mentiras, cutradas/, versa o novo de Laura LaMontagne.

    Tras dous anos de silencio a artista lucense vén de publicar o sinxelo "SonRisas Falsas", unha canción de electropop escuro e minimalista cantada en galego e inglés. LaMontagne inicia así unha nova etapa artística en solitario e vai directa á ferida. No novo tema fala abertamente da “traizón e as dinámicas abusivas de poder que sufriu dentro da industria musical”, segundo explican desde a produtora.

    Música

  • Hydn lanza “Taste”, pop global en ‘galenglish’

    A artista coruñesa Hydn vén de publicar “Taste”, un novo single co que dá continuidade á súa aposta por un pop galego contemporáneo con códigos do R&B e do pop dos anos 2000.

    “Taste” “nace dun baleiro real: dun espazo que, ata agora, non estaba ocupado, e sitúase directamente no centro do pop contemporáneo desde Galicia”, asegura a cantante e compositora. “Pop galego contemporáneo que opera cos códigos do pop internacional sen complexos nin adaptacións”, acrecenta.

    A canción, mestura de galego e inglés, sae á luz acompañada dun videoclip, dirixido por Iago Vilariño, que se constrúe arredor dun combate no que Hydn pelexa con Jessi Longueira, boxeadora coruñesa, gañadora do Open Cidade de Lugo 2024.

    Música

  • A banda da Loba pon “O cora”: música para o documental 'A rebelión da lectura'

    “Era unha vez unha historia do revés. Era unha vez unha historia con mil pés”. Así comeza “O cora”, canción orixinal composta e interpretada por A banda da Loba para o documental A rebelión da lectura. O tema estará dispoñible en plataformas dixitais a partir deste venres 16 de xaneiro, xunto cun videoclip que recolle a gravación do propio tema. 

    O documental recolle os 20 anos de historia da asociación Espazo Lectura de Gondomar, que se dedica ao fomento da lectura en lingua galega a través dunha  rede de voluntariado. A rebelión da lectura estrearase o sábado 31 de xaneiro no Auditorio Lois Tobío de Gondomar. 

    Música

  • Filloas presenta “Google calendar”, hyperpop contra a rutina

    “Google calendar” é o primeiro sinxelo do novo traballo de Filloas, que se publicará ao longo de 2026.

    Esta canción reafirma unha sonoridade enmarcada no hyperpop, no que o artista é pioneiro en Galicia, segundo subliñan desde a produtora. O sinxelo enmárcase dentro dun mesmo universo, con referencias ás películas de Matrix, o anime e á novela de Momo, representado nun videoclip de Xaime Miranda e nunha portada ilustrada baseada no mesmo.

    “Google calendar” trata da rutina e, sobre todo, como non podemos escapar dela, exemplificándoo nunha eterna loita entre unha personaxe maligna (que representa á rutina) que se enfronta á nosa protagonista deixando un final pouco esperanzador.

    O artista vén de estrear Súbete ao EVA (Alende/Altafonte, 2025), e xa prepara o lanzamento dun novo EP, onde o son electrónico que Filloas xa viña adiantando colle forma. 

    Música

  • Familia Caamagno lanza “De Paseo en Portugal”, adianto do disco e volta aos escenarios

    Familia Caamagno regresará aos concertos nas vindeiras semanas coa publicación dun novo disco, do que vén de lanzar o primeiro avance, "De paseo en Portugal". Un tema pop, cun estribillo luminoso e catártico, que dá boa conta de todo o que está por vir, segundo explican desde o selo Tremento Audiovisual, que edita o novo álbum.

    “De paseo en Portugal/ nada disto pode ir mal”, versa o primeiro dos tres sinxelos que se darán a coñecer nas vindeiras semanas -antes da publicación do álbum-, e que conta cun vídeo animación dirixido por Xaime Miranda. 

    No mes de xaneiro, o quinteto de Sigüeiro, que celebra quince anos sobre os escenarios, presentará un novo disco producido por Raúl Pérez, do estudio granadino La Mina. 

    Música

  • "Ferido", pop electrónico de desamor no debut de Xoán Fórneas

    Este venres amenceu "Ferido", o primeiro traballo do proxecto musical do actor Xoán Fórneas, baixo o nome de O Xoán. Este traballo nace tras unha etapa persoal que o levou a regresar ao lugar e ás persoas que o formaron no rural lucense. “Ese reencontro coa súa contorna permitiulle recuperar unha parte de si mesmo que quedara en segundo plano durante os anos en Madrid e retomar a música como o seu medio natural de expresión”, explican desde a produción do traballo . 

    O videoclip conta con Irene Montes á dirección e Sabela Eiriz na foto fixa.

    Música

  • Saibran publica “Meu”, un tema “escuro, sucio e directo”

    “Cos ollos achinados como Yao Ming, / Quedándome calvo como un shaolin, /Ahora me cuido sólo bebo mahou sin, / Porque o escenario é como un puto ring”. 

     Así comeza o novo de Saibran, “Meu”, petisco do que será o seu primeiro disco, Atardecer harmonioso con gotas de primavera, que amencerá o 5 de decembro. 

    “Meu” é un tema escuro e sucio. É nocturno e directo. Achégase ao máis fondo mais, se cabe, tamén abre a porta a un novo inicio, segundo apuntan desde a banda liderada por Cibrán García (Boyanka Kostova).

    Cunha base de Møu (DKTC, Lumedoloop), e con Julián Goicoa no baixo e Fiz García na batería, Meu  contrapón a actitude do rap máis descarado coa fraxilidade emocional e a instrospección. "Teño cheo o cenicero, cada calada unha neurona menos, cada colilla un problema que enterro, queda gardada dentro do cerebro, teño que facelo si non me quebro e..." canta Cibrán García.

    Música

  • “Voltarei”. Hard GZ pon música á morriña para celebrar o Celta europeo

    O artista vigués Hard GZ estrea “Voltarei”, canción e videoclip da man do Celta, que homenaxea a emigración galega, xusto no momento en que o club regresa á Europa League despois de nove anos de ausencia.

    “Voltarei” rende tributo a quen soñaron con volver, a quen nunca deixaron de sentirse galegos, aínda que estivesen lonxe, e a quen hoxe seguen a construír pontes entre o local e o global, segundo explican desde o club. 

    Música