«Hai vinte e pico de anos botei unha tarde detrás de miña tía Pepita e de meu avó Enrique pedíndolles que me recitasen as coplas que recordaban, de cando se cantaba e iso. Rescatei catro delas para que formasen parte desta canción de PAVA, á que eu lle engadín unhas estrofas que se esforzan por deixar ben claro que se trata dun legado importante pola cantidade de vida e beleza que contén. Pouca poesía culta emociona tanto coma esta nosa poesía popular». Lucía Aldao resume así a orixe de “8 sílabas”, o novo tema da banda Pava, que vén acompañado dun videoclip asinado por Pablo Silva.

“8 sílabas” fai unha chiscadela á poesía popular escoitada pola artista coruñesa na súa infancia. Catro desas coplas trénzanse con estrofas de autoría propia nun tema xoguetón que funciona como homenaxe á poesía popular e como recordatorio de que “cabe a vida e máis en oito sílabas”.

“8 sílabas” soará por primeira vez en directo no concerto deste venres, 9 de maio, a partir das 20.30 horas, na Sala Riquela compostelá.