Almorzamos e parolamos coa xornalista e presentadora Esther Estévez, unha faciana ben coñecida para o público galego como presentadora da TVG en programas como o Dígocho eu ou o Luar entre outras. A piques de facer os 29 anos, atesoura dous premios Mestre Mateo como mellor comunicadora e unha popularidade que ás veces esquece. "Na carreira non era capaz de mirar á cámara e dicir un parágrafo", lembra.
Coa colaboración de
Outra volta á festa é o lema da décimo primeira edición do Castelo Conta, un festival que reivindica un modelo de celebración que pon no centro a capacidade da festa popular para crear comunidade. Máis de sesenta propostas enchen Castelo (Culleredo) na semana do 24 ao 30 de agosto entre música en directo, gastronomía e artes escénicas, sempre co humor moi presente.
Coa colaboración de
Neste novo Vinte almorzando con Deleite fomos de Tertúlia con María SOA e Sara Faro, as Fillas de Cassandra. Están a presentar o seu segundo disco longo, que en realidade é o seu terceiro traballo en tres anos. "Non ansiamos que as nosas letras sexan dogmas. Buscamos o debate e a conversa", subliñan.
"É un disco bastante contestatario. Saír á fresca é unha declaración de intencións do que somos", aseguran durante a conversa, ao tempo que defenden "non ser permisivas cos discursos de odio ou bulos. Tristemente cada vez máis nos estamos achegando a ese mundo hostil que daba tanto medo, de tanto retroceso. Pero todas podemos facer algo, todas xuntas”, animan.
Coa colaboración de
Almorzamos e parolamos no Festival de Cans con Jaione Camborda, guionista, directora e produtora de cinema. Camborda vive en Galicia e fai as súas producións en galego. "Paréceme o máis natural", asegura a vasca, que levou a Cuncha de Ouro no Festival de San Sebastián por O Corno. Jaione Camborda ultima o guión da súa terceira longametraxe, onde segue a buscar a "liberdade e o compromiso co espectador" e con ela mesma, segundo asegura a cineasta, que foi premiada co Pedigree de Honra pola súa traxectoria en Cans.
Coa colaboración de
Neste novo Vinte almorzando con Deleite falamos de alimentación e do papel que os lácteos teñen ou deberían ter na nosa dieta, tanto das crianzas como das persoas adultas. Almorzamos e parolamos con Rosaura Leis Trabazo con motivo do Día Mundial do Leite. Natural da Estrada, a nosa convidada é catedrática de Pediatría pola USC, investigadora principal no instituto de investigación sanitaria de Santiago (IDIS), presidenta do Comité de Nutrición e Lactancia Materna da Asociación Española de Pediatría (AEP) ou presidenta da Fundación Española da Nutrición.
A investigadora alerta da baixada no consumo de leite polos cambios nos patróns alimentarios e defende as propiedades da lactosa, que axuda á absorción de vitaminas e incluso actúa como prebiótico. “É moi importante consultar ao profesional sanitario antes de deixar de consumir un alimento”, asegura Rosaura Leis, en referencia ás persoas que substitúen o leite polas bebidas vexetais.
Coa colaboración de
Volve o Vinte almorzando con Deleite e nesta nova xeira comezamos con 9Louro. Almorzamos e parolamos cun dos artistas do momento en Galicia. Fai música urbana en galego con letras sobre o que lle acontece ou o que pensa no seu día a día como mozo de 21 anos e o público responde enchendo salas de concertos.
O nome de 9Louro está en carteis de festivais por toda Galicia cada semana e, entre bolo e bolo, tivo tempo de atender a VINTE no bar San Francisco, ao pé do mar, en Louro (Muros). “Aquí volvo ser Martín e desconecto un pouco. Podo estar cos meus amigos e estar máis tranquilo”, explica Martín Louro.
Coa colaboración de
Almorzamos e parolamos con Bruno Arias sobre cinema, momentos vitais e desexos para o vindeiro ano, que xa estamos no tempo.
Arias escolleu o café de Catro a Catro, en Vigo, para falar connosco. Relata a satisfacción e sorpresa que lle supuxo poder facer realidade a película documental “Os espazos en branco”, nun proxecto no que dialoga coa súa tía, a poeta Xela Arias, e foi merecedor do premio Mestre Mateo en 2024.
“Estamos facendo o cinema que nos deixan facer”, asegura Bruno Arias. Defende a liberdade de formatos e linguaxes para segundo que contidos e sobre todo abrir a ventá para deixar voar a creación en galego e contribuír así á súa normalización. “Constrinxir a creación en galego é pegarnos un tiro no pé. Iso significa ser conscientes de que se poden facer cousas en galego que non nos gustan”; e pódense criticar, claro.
Coa colaboración de
Todo un luxo almorzar e parolar coa chef galega Lucía Freitas no seu primeiro restaurante, A Tafona.
De pequena quería ser xornalista coma o seu pai, mais adoraba a cociña e nesa mocidade indecisa xurdiu a oportunidade. Era unha nena introvertida, foi estudar ao País Vasco e “da man da cociña” naceu a nova Lucía. “Non levo moi ben estar tan exposta”, puntualiza, mais non dubida en seguir “abrindo melóns” para poder axudar a xente.
Asegura que nunca tivo a ambición de acadar unha estrela Michelín pero todo foi chegando. Pasaron os malos tempos e agora hai que gozar dos bos.
Falamos con Lucía Freitas do seu proxecto Amas da terra, de vangarda primaria, de reverter o éxito na contorna e pensar no ecosistema cando fas un menú. “Falta empatía e darse conta do esforzo que leva cultivar a terra, ser labrega e ir ao mar”, subliña.
Coa colaboración de
Unha mirada ampla e un discurso propio que ten o corpo como eixe fundamental. A porriñesa Janet Novás vén de encadear o Goya como actriz revelación (2024) polo seu papel en O Corno, co Premio Nacional de Danza (2025) como intérprete. Asegura Novás que a interpretación é unha sorte de extensión da danza, na que o corpo sostén a palabra e gozou da experiencia de poñerse ao servizo de Jaione Camborda.
Almorzamos e parolamos con Janet Novás: bailarina, coreógrafa, mestra, actriz … que está a crear agora “She Night” como peche dunha triloxía na que defende que “o corpo é o único que nos vai salvar”. Precisamos volver á orixe e parar. “A min o que o corpo me di é que apaguemos todo e paremos. Esa é a performance que precisamos”, defende.
Coa colaboración de
Sempre divertidos, The Rapants aseguran ser xa como un matrimonio, dos bos, claro. Coñécense desde cativos e non deixan de pasalo ben no escenario, aínda que cada vez o nivel de traballo e profesionalización sexan maiores.
Estivemos coa banda de Muros no Festival Revenidas, en Vilaxoán, almorzando, falando e rindo con Matías, Xanma, Samuel e Xaquín, que están a gravar o seu novo disco. “Dámoslle grazas á xente do tradi por non facernos bullyng ”, chancean.
Coa colaboración de