Vinte

con Familia Caamagno

Fri, 30 Oct 2026 10:59:10 +0100

Os de Sigüeiro están a xirar co seu novo álbum, 'Disco Comarcal', e de paso celebran que Familia Caamagno segue a facer música e divertirse tras quince anos sobre os escenarios. Falamos con Manuele, Fran, Jess e Lano o 9 outubro, cando a actualidade informativa semellaba intensa... pero só era o comezo. "Nós xogamos mellor en campos de terra e canto peor se poña o ambiente sociopolítico, mellor para a creación das cancións", chancean, pero realmente prefiren que as enquisas para as vindeiras eleccións xerais non acerten. "Non nos rende: non o fagades por nós. Mellor un disco menos de Familia Caamagno e votade como é debido", reclaman.

por que nos encanta o tráiler de 'KIRO'

Thu, 29 Oct 2026 12:12:55 +0100

Cun aire de descuberta inédita case arqueolóxica comeza o tráiler de KIRO, a película sobre Ana Kiro, dirixida por María Yáñez, que está a percorrer festivais e chegará aos cinemas o 11 de decembro.

O adianto pon a énfase nese feito de que mentres milleiros de galegos por todo o mundo celebraban e bailaban coa gran diva pop, Ana Kiro era totalmente descoñecida para o resto. “Entre 1975 e 2000 foi a artista galega máis editada”, di Meiga-i. Iso, cantando en galego daquela, que non era habitual.

Existe tamén unha certa polémica política ao redor da súa figura pero Ana Kiro “nunca foi explícita e nunca pagou o prezo de selo”, explica SÉS.

O de Kiro ía máis de pachanga e seguro que gustaría á mocidade máis verbeneira de hoxe en día.

“Gustaríame estudar cinematografía e aprender de todo: ser foquista, operador de cámara, director…”

Tue, 27 Oct 2026 10:00:00 +0100

Con 16 anos, Darío Oliva ten moi claro que lle gustaría estudar cinematografía "para aprender a facer eses planos tan pintorescos que vemos" na pantalla e logo traballar en algo relacionado co mundo da imaxe, que leva explorando nos últimos tempos dun xeito moi profesional. Coa súa primeira foto, feita co móbil, xa soubo apreciar a beleza da composición e non tardou en aforrar para mercar unha cámara réflex e poder tomar en serio a fotografía. Estaba en primeiro da ESO e, desde entón, non parou. Como participante do 'Aquí tamén se fala galego', do IES Rafael Dieste, recibiu formación en gravación e edición de vídeo e vén de pechar un verán cheo de retos e aprendizaxes en eventos como o Festival Viñetas desde o Atlántico ou o FEC (Festival Electrónico Coruñés). "Que feliz me fai isto que fago. Que sorte teño", subliña o estudante de Bacharelato.

Volve a enerxía eléctrica de Holywater

Thu, 22 Oct 2026 17:09:39 +0200

A banda lucense vén de publicar o primeiro adianto do seu próximo disco, unha canción contundente que recupera a súa cara máis eléctrica sete anos despois de Arboreal. “Open Chord” é un sinxelo rápido, enérxico e sen reviravoltas, que tende unha ponte co seu pasado para lanzarse de cabeza cara ao que vén. Porque despois de tantos anos, paróns e cambios de dirección, Holywater segue atopando motivos para facer cancións.

O lanzamento chega acompañado dun videoclip gravado en formato analóxico, unha elección que recupera a textura e as imperfeccións propias deste tipo de imaxes, lonxe da nitidez das producións dixitais. A introdución acústica de “Open Chord” está, ademais, interpretada integramente en directo. Dúas decisións que poñen o acento no tanxible, no carácter da gravación e na propia interpretación dos músicos, sen buscar un acabado excesivamente pulido, segundo explican desde a banda.

“A pedra fai parte da nosa cultura, namora, sempre tiven esa paixón”

Thu, 22 Oct 2026 11:20:14 +0200

Din os vellos que antes en todas as casas había un canteiro, pero agora en toda Galicia deben quedar uns 200. Diego Currás é canteiro. Co seu primeiro salario aos 14 anos mercou un disco para a rebarbadora e comezou a facer cousiñas na pedra, nun pendello da súa casa, en Taboadela, e desde entón non parou de aprender o oficio de tallar a pedra, un coñecemento que o levou a participar mesmo nos labores de restauración da Catedral de Santiago. Non quedan moitos, pero os que están teñen encargos abondos. “Os canteiros que imos quedando temos traballo; é raro a semana que non rexeito unha obra”, asegura.

Portalén: María Soliña ten unha misión

Tue, 13 Oct 2026 12:40:15 +0200

O videoxogo galego Portalén vén de comezar a súa particular andadura coa estrea no BCN Game Fest a pasada fin de semana. De estilo matamarcianos foi producido por Brava e Recuncho Gamer, que prevén a súa comercializacón para comezos de 2027. Nas próximas semanas xa se poderá probar en eventos galegos.

O obxectivo do xogo é superar sete niveis acompañando a María Soliña que, montada na súa vasoira máxica, deberá atopar tres obxectos máxicos que lle darán o poder para liberar o seu pobo do sufrimento e da chegada de Noitum, o Señor da Noite. Todo isto nunha carreira contrarreloxo escapando de piratas na Ría de Vigo, atravesando montes, fragas, covas ou descubrindo a lendaria cidade sumerxida de Antioquía.

“Levamos moitos sopapos no sindicalismo, pero de cando en vez temos algunha vitoria”

Fri, 09 Oct 2026 10:15:00 +0200

A manida “desafección política da mocidade” vai por barrios. Non é xeral nin moito menos e cómpre peneirar os datos e fuxir de mantras para coñecermos a realidade. Precariedade e desilusión fronte a rabia e fortaleza. Aos que son mozos e mozas na actualidade, a xeración Z e parte dos millenials, non lles puxeron as cousas doadas para acceder a unha vida adulta independente –traballo? casa? formar unha familia propia?- pero non por iso deixan de ter conciencia política e mesmo de clase. Basta con observar as protestas da Porta do Sol de Madrid e as manifestacións pola vivenda destes días en Galicia para comprobar que a mocidade destes anos 20 tamén sabe mobilizarse para provocar cambios. A nivel sindical os menores de 30 anos van perdendo peso porcentual polo atraso no acceso ao traballo, aínda que non sucede en todas as organizacións igual.

Ataque Escampe retorce a rabia dos "25" de Grande Amore

Tue, 06 Oct 2026 13:10:32 +0200

O que no debut de Grande Amore era un rock and roll berrado sobre a desorientación dos vinte e cinco anos é aquí un rap achegado ao post-punk que evoca outro momento vital. Se a canción orixinal estaba marcada pola dúbida e a espera “a que un día pase algo”, a reescrita de Ataque Escampe, que recontextualiza e engade versos á orixinal, recolle a súa rabia, pero lévaa ao punto de vista de alguén que aprendeu (máis ou menos) a gozar dos praceres dunha vida tranquila, coma o xadrez online e as clases de baile latino.

"25" é o primeiro adianto de Outros corpos, un EP en vinilo no que Ataque Escampe e Grande Amore se rouban cancións mutuamente para retorcelas.

Esther Estévez

Thu, 01 Oct 2026 12:19:28 +0200

Almorzamos e parolamos coa xornalista e presentadora Esther Estévez, unha faciana ben coñecida para o público galego como presentadora da TVG en programas como o Dígocho eu ou o Luar entre outras. A piques de facer os 29 anos, atesoura dous premios Mestre Mateo como mellor comunicadora e unha popularidade que ás veces esquece. "Na carreira non era capaz de mirar á cámara e dicir un parágrafo", lembra.

“Levar dez anos cun proxecto como as Residencias Paraíso é toda unha conquista”

Tue, 29 Sep 2026 11:34:35 +0200

Asegura que cada vez “pensa, máis que baila, a danza”, mais a Caterina bailarina resiste, permanece. A danza sempre está, aínda que non sempre sexa o seu propio corpo o suxeito activo. Artista, comisaria, creadora, xestora cultural e curadora... Ser bailarina e ter unha compañía de danza son cousas ben distintas. Sábeo desde os 25, cando levaba xa anos bailando de forma profesional e fundou a compañía La Macana, xunto co seu compañeiro Alexis Fernández. Caterina Varela dirixe tamén o colectivo RPM, que vén de celebrar os seus 10 anos de Residencias e Encontros Paraíso, todo un éxito e “unha auténtica conquista”, segundo explica a artista.

Os mekemekes na Festa dos Botes

Fri, 18 Sep 2026 10:14:20 +0200

O Exército Mekemeke visitou este verán o soviet de Arzúa por primeira vez para un especial da 43 edición da Festa dos Botes!
🎉 O pregón deste ano correu a cargo das primeiras comisións arzuás, e nós aproveitamos a súa sabedoría para desvelar o que realmente pasa entre bambalinas: fallos, tensións, segredos e trucos para sobrevivir á organización dunha festa. Se pensas que montar unha festa é doado... é que nunca falaches cunha lenda das comisións de festas.

"Algún día o futuro será noso"

Tue, 15 Sep 2026 14:19:40 +0200

Ramón Romero Nogueira é autor do poemario Millennialismo ou sátira dunha xeración (Xerais, 2026), unha “intranet de versos sen postureo nin filtros”, pero con moita retranca. Un libro que achega a todo tipo de lectorado o ‘universo’ desta xeración, que se adoita limitar ás persoas nadas entre 1981 e 1996. Trátase da considerada primeira xeración de “nativos dixitais”, aínda que haxa abundantes diferenzas entre os propios millennials e resulte difícil xeneralizar.

“Somos demasiado tolos para poñernos cancelas a nós mesmos”

Fri, 11 Sep 2026 11:29:11 +0200

Os músicos Willow GHC (Darío Burgos, das Neves) e Pappaquino (Joaquín Limia, de Verín) están detrás deste proxecto cuxo apoio popular está a sorprender os propios artistas de 28 anos. “A xente quérenos moito, coñécenos e dá gusto, a verdade”, subliñan. A proposta transita entre o ska, a música latina e a verbena, nuns temas que sempre convidan a bailar, onde emana a identidade, o humor ou mesmo, e por que non, a denuncia social.

"Precisamos abrir espazos onde poidamos parar, respirar, sentirnos e acompañarnos”

Thu, 03 Sep 2026 10:28:45 +0200

"Non teño conciencia de existir sen ter melodías na cabeza, sen usar a miña voz, sen xogar con ela". A artista sonora e psicóloga coruñesa Paula Pintos protagoniza unha nova entrega do espazo Vinte na rúa. Pintos canta, experimenta coa voz, estúdaa e desenvolve a súa proposta artística ao tempo que tamén defende o seu uso na práctica terapéutica. VINTE estivo no festival Entre Covas, en Seadur (Larouco), para presenciar a estrea da súa nova proposta, Ícaro, e parolar con Paula Pintos.

Recordos e nostalxia no adianto do novo álbum de Secho

Tue, 01 Sep 2026 12:42:15 +0200

Secho vén de estrear o sinxelo “O lugar do crime”, unha coidada peza que serve como carta de presentación do seu disco homónimo. ‘O lugar do crime’ é o seu último proxecto musical, producido polo Hevi no Laboratorio Soyuz.

Sete temas con arranxos minimalistas que se moven cun rexistro delicado entre sonoridades pop, indie e folk. En palabras do artista de Dodro, o tema afonda "nos recordos e na nostalxia". Nel busca o mar de Rosalía e pensa “nos que non están”, nos espazos familiares, en infancias enfundadas en botas de goma que participan na matanza do porco. Imaxinarios dunha xeración con crimes e lugares comúns.

O lanzamento acompáñase dun videoclip dirixido, gravado e producido por Nela Fraga, en formatos analóxicos, como o Super8 e 16mm, reflectindo ese tránsito vital a través dos recordos.

no Castelo Conta

Mon, 24 Aug 2026 16:00:00 +0200

Outra volta á festa é o lema da décimo primeira edición do Castelo Conta, un festival que reivindica un modelo de celebración que pon no centro a capacidade da festa popular para crear comunidade. Máis de sesenta propostas enchen Castelo (Culleredo) na semana do 24 ao 30 de agosto entre música en directo, gastronomía e artes escénicas, sempre co humor moi presente.

Lugares con argumentos para visitar este verán

Fri, 31 Jul 2026 14:00:00 +0200

Chega o mes de agosto e, para VINTE, as vacacións de verán. Ata setembro non actualizaremos a revista, pero deixamos por aquí unha escolma de ideas para visitar lugares galegos dos que fomos falando nos últimos meses en espazos como Vinte na Vila ou Vinte en Ruta. Agardamos que gocedes moito do verán. Volvemos en catro semanas con novos contidos para ler, ouvir e ver.

“Os artistas poden achegar moitísimo ao benestar social, a pensar os espazos dunha maneira máis humana”

Wed, 29 Jul 2026 11:49:00 +0200

“Sempre me gustou pintar, realmente sempre se me deu ben”. Din que ninguén é profeta na súa terra, mais a artista urbana Lula Goce vén de rematar en Baiona A Doca, o mural máis grande de España, con case 350 metros de longo e uns 1.400 metros cadrados de arte e traballo duro para cambiarlle a face ao espigón da súa vila natal. Asegura que foi unha gran responsabilidade polo propio significado do lugar para a o pobo baionés e para ela mesma, mais fica orgullosa co resultado, que brinda unha homenaxe á xente do mar.

Goce leva feitos máis dun cento de murais por todo o mundo e está agora “moi focalizada” en proxectos de intervención urbana, onde poida traballar en colaboración con outras disciplinas para mellorar os espazos que habitan as persoas.

O restaurante Ceibe e o bar Pepinillo intercambian cociñas por un día en Ourense

Wed, 22 Jul 2026 13:29:00 +0200

Un restaurante Estrela Michelin e un establecemento mítico da cidade das Burgas aceptan o reto de abandonar a súa zona de confort e elaborar unha receita na casa do outro. Literalmente pasan "ata a cociña" mentras nos contan a súa historia e afirman: "Non somos tan diferentes"

Sepáranos pouco máis de 200 metros. Dende a Rúa San Miguel que baixa da Praza do Ferro ata o Paseo e posteriormente atravesando Progreso para chegar á Rúa de Reza. Trazar esa liña no mapa de Ourense é debuxar tamén unha ruta gastronómica que non só implica aos restaurantes cos que falamos desta vez. Para non abrir (demasiado) o apetito imos quedar con estes dous: o Ceibe e o Pepinillo.

"Esta é a peli que eu necesitaría ver con 15 anos, cando case non había narrativas de persoas trans"

Thu, 16 Jul 2026 10:35:54 +0200

"Non hai maior acto de amor propio que unha transición", escoita como consolo nun momento de caída emocional o protagonista do documental Este cuerpo mío. A película acompaña a Rafael neses primeiros anos de proceso de transición de xénero. Un camiño complicado pero cheo de luz. E niso quixeron centrarse o cineasta Afioco Gnecco (nombre artístico de Rafael) e a actriz Carolina Yuste (gañadora de dous premios Goya) na súa primeira longametraxe detrás da cámara. Niso, e na súa propia amizade. "É unha unha peli que fala dunha historia de amor e de amizade que está atravesada por unha transición", explica o cineasta italochileno.
Este cuerpo mío pode verse en Movistar e está a xirar por cinemas, centros culturais e mesmo algún cárcere de España con moi boa acollida por parte do público. Este venres estará nos Multicines Norte de Vigo e o sábado e o domingo nos Númax de Santiago, nuns pases especiais con coloquio xunto a Afioco Gnecco.

nai do pai da nosa terra

Wed, 15 Jul 2026 12:00:00 +0200

Meira semella un punto de partida perfecto. Perfecto para empezar o día, unha ruta de sendeirismo, un negocio ou toda unha vida. Mirade se Meira é o punto de partida ideal que ata o mesmísimo río Miño decidiu comezar alí, no corazón da serra, o seu traxecto de 315 quilómetros polas sagradas terras de Galicia.

A nai do pai da nosa terra, reza o lema escrito no parque que acompaña as primeiras augas do Miño na súa chegada á vila meirega. A orixe desas augas está un pouco máis arriba, no Pedregal de Irimia, en plena Serra de Meira. Un lugar polo que pasaremos máis adiante, porque se comezamos a nosa viaxe falando de puntos de partida e introducimos a metáfora clásica do río como nacemento-inicio, traxecto-nó e desembocadura-desenlace, o lóxico sería empezar por acudir ao mosteiro de Santa María de Meira, onde se puxeron as primeiras pedras do que acabaría sendo a vila actual.
Pero non. Porque isto é Meira.

Maricarme fusiona tradición e electrónica cun vídeo surrealista

Mon, 13 Jul 2026 16:59:16 +0200

Maricarme, o proxecto, formado por María Jorge, Cibrán Seixo e Migui Carballido, profundiza nunha reinterpretación libre e contemporánea da música tradicional galega e nesta ocasión, o grupo toma como punto de partida unha muiñeira aprendida de Os Fillos de Pepa A Loba, a "Punteada da Miñata", mantendo así un diálogo vivo entre tradición oral e contemporaneidade.

A nova canción supón o segundo adianto do seu novo EP –previsto para outono- e continúa a liña que define a Maricarme: unha fusión entre instrumentos acústicos tradicionais e texturas electrónicas contemporáneas, onde conviven percusións de raíz, cordas e paisaxes sintéticas que, unidas á voz de María Jorge, dan lugar a un folk dinámico e fresco, reafirmando a identidade do grupo como unha das formacións máis singulares da nova escena galega.

O novo tema chega acompañado dun videoclip dirixido por Marte Martinka e Fotomatong, que achega un novo ingrediente ao xa surrealista universo estético da banda. Con este novo traballo, Maricarme non só consolida unha identidade propia, senón que continúa abrindo novos camiños para a música tradicional galega.

con Fillas de Cassandra

Wed, 08 Jul 2026 14:08:08 +0200

Neste novo Vinte almorzando con Deleite fomos de Tertúlia con María SOA e Sara Faro, as Fillas de Cassandra. Están a presentar o seu segundo disco longo, que en realidade é o seu terceiro traballo en tres anos. "Non ansiamos que as nosas letras sexan dogmas. Buscamos o debate e a conversa", subliñan.
"É un disco bastante contestatario. Saír á fresca é unha declaración de intencións do que somos", aseguran durante a conversa, ao tempo que defenden "non ser permisivas cos discursos de odio ou bulos. Tristemente cada vez máis nos estamos achegando a ese mundo hostil que daba tanto medo, de tanto retroceso. Pero todas podemos facer algo, todas xuntas”, animan.

Canoura singra o mar dos afectos perdidos na súa primeira longametraxe

Wed, 01 Jul 2026 12:56:32 +0200

Inabarcable. A inmensidade do mar e unha deliciosa música protagonizan as primeiras imaxes e acompañan o espectador ao longo desta viaxe. Adrián Canoura embarca ao Gran Sol, por fin, xunto ao seu pai, patrón de pesca de altura, no barco familiar “Raúl Primeiro”. Alí grava o día a día dun barco pesqueiro e fai realidade a súa primeira longametraxe. Inspirado polos versos de Manuel Antonio executa unha peza documental de carácter experimental coa que pecha as feridas da distancia entre pai e fillo e cumpre o soño –compartido- de levar o temón do barco.

con Jaione Camborda

Tue, 23 Jun 2026 09:00:00 +0200

Almorzamos e parolamos no Festival de Cans con Jaione Camborda, guionista, directora e produtora de cinema. Camborda vive en Galicia e fai as súas producións en galego. "Paréceme o máis natural", asegura a vasca, que levou a Cuncha de Ouro no Festival de San Sebastián por O Corno. Jaione Camborda ultima o guión da súa terceira longametraxe, onde segue a buscar a "liberdade e o compromiso co espectador" e con ela mesma, segundo asegura a cineasta, que foi premiada co Pedigree de Honra pola súa traxectoria en Cans.

Consultorio mekemeke

Fri, 19 Jun 2026 11:30:00 +0200

Dámosvos a benvida ao consultorio máis fabuloso de Internet! Neste episodio, os mekemekes sentámonos a responder as preguntas, dúbidas, dilemas e ocorrencias que nos enviastes. Hai consellos útiles? Probablemente non. Hai respostas inesperadas, anécdotas e moitas risas? Diso vai sobrado. Grazas por enviarnos as vosas preguntas e por facer posible este consultorio tan peculiar.
Se queredes participar nos próximos episodios, prestade atención ás nosas redes porque anunciaremos a pretempada para despois do verán. Preparade papel e lapis, porque os expertos en absolutamente nada xa están aquí para axudarvos.

o ascenso do Dépor

Wed, 17 Jun 2026 11:29:29 +0200

O Deportivo, dende hai máis dun século, é moito máis ca un equipo de fútbol. É, entre outras moitas cousas, unha porta de entrada á cidade, unha linguaxe compartida e unha forma de pertenza. Para moitos coruñeses (e coruñeses de adopción), seguir ao Dépor significa atopar unha comunidade, establecer amizades e comprender mellor o lugar no que decidiron construír a súa vida.
Nunha cidade onde o fútbol forma parte da conversa cotiá, vestir a camiseta branquiazul ou compartir a bancada de Riazor converteuse, para moitos, nun xeito de sentirse na casa.

Pero o deportivismo tamén é unha historia de vínculos familiares. De pais que levaron os seus fillos por primeira vez ao estadio no que agora desfrutan cos seus netos. De netos que herdaron unha paixón que nunca lles foi imposta, senón transmitida a través dos recordos, dos desprazamentos, das vitorias e das derrotas compartidas.

Agora, o Dépor, despois de cinco anos, volve á categoría máxima do fútbol español, e en VINTE facémoslle esta pequena homenaxe, con cinco historias de cinco coruñeses, de aquí e de aló, que nos falan de fútbol, si, pero sobre todo de afectos, de identidade e de pertenza.

convida a vivir sen dar explicacións

Tue, 16 Jun 2026 13:34:33 +0200

O artista de Culleredo vén de publicar “I-ANQUE”, un tema que fala claro: menos xuízo e máis liberdade. A canción supón o adianto do que será o segundo álbum longo de Carlos Eirís, coñecido artísticamente como Eris Mackenzie, tras a publicación do álbum Meu Ceu (2025),e o EP Laíño esta primavera.

Unha canción para deixar de mirar cara fóra e comezar a facer o que un realmente quere, sen dar explicacións. A súa proposta móvese entre o íntimo e o disruptivo, na procura constante dun son propio, reforzando a súa particular conexión entre a música tradicional galega e a electrónica contemporánea, segundo explican desde a discográfica Alende Música.

"I-ANQUE" chega acompañado dun videoclip dirixido por Omar Romero e Pablo Lourido, que recolle a estética íntima e persoal do artista. A peza audiovisual sitúanos nun ambiente escuro e abafante que, paradoxalmente, acaba converténdose nun espazo de liberación.

As empanadas

Mon, 15 Jun 2026 11:31:26 +0200

Por fin! Tanto falar e os mekemekes nunca fixeran un programa sobre a raíña da nosa gastronomía: a empanada. Neste episodio mergullámonos no mundo das empanadas: de atún, de zorza, de millo, de bacallau con pasas... as de toda a vida.

Falamos dos segredos para que o mollo quede no punto e, o máis importante: poñemos a proba aos nosos mekemekes cunha cata de empanada, industrial ou artesá?

con Rosaura Leis

Tue, 09 Jun 2026 12:19:54 +0200

Neste novo Vinte almorzando con Deleite falamos de alimentación e do papel que os lácteos teñen ou deberían ter na nosa dieta, tanto das crianzas como das persoas adultas. Almorzamos e parolamos con Rosaura Leis Trabazo con motivo do Día Mundial do Leite. Natural da Estrada, a nosa convidada é catedrática de Pediatría pola USC, investigadora principal no instituto de investigación sanitaria de Santiago (IDIS), presidenta do Comité de Nutrición e Lactancia Materna da Asociación Española de Pediatría (AEP) ou presidenta da Fundación Española da Nutrición.

A investigadora alerta da baixada no consumo de leite polos cambios nos patróns alimentarios e defende as propiedades da lactosa, que axuda á absorción de vitaminas e incluso actúa como prebiótico. “É moi importante consultar ao profesional sanitario antes de deixar de consumir un alimento”, asegura Rosaura Leis, en referencia ás persoas que substitúen o leite polas bebidas vexetais.