«Unha canción de amor, de como algo inesperado ou diferente pode chegar a rompernos os esquemas e facernos ver as cousas doutra meneira. Mais non só, tamén é unha canción que fala dun longo camiño interior, de deixar atrás certos momentos difíciles para camiñar cara a novos horizontes». MJ Pérez vén de publicar “Perdín a memoria”, un novo sinxelo que funciona como berro de renacemento, de amor inesperado, de ruptura co pasado e, tamén, de adianto do novo disco. 

A canción, escrita entre Galicia e Francia, é un tema eufórico que fala de comezos e de deixar atrás a dor desde a alegría, cunha produción coidada feita en Portugal da man de Sérgio Miendes, produtor da Garota Não. 

A peza mestura galego e francés nunha letra que se move entre o desexo, a liberación emocional e a vontade de reconectar coa vida. 

O videoclip, dirixido por Iago Vilarinho, Gustavo Dieste e MJ Pérez, rodouse no antigo Cine de Osebe, un local mítico inaugurado nos anos 60 que foi durante décadas punto de encontro compartido para xeracións de veciños e veciñas de Teo.