O artista vigués Hard GZ estrea “Voltarei”, canción e videoclip da man do Celta, que homenaxea a emigración galega, xusto no momento en que o club regresa á Europa League despois de nove anos de ausencia.

“Voltarei” rende tributo a quen soñaron con volver, a quen nunca deixaron de sentirse galegos, aínda que estivesen lonxe, e a quen hoxe seguen a construír pontes entre o local e o global, segundo explican desde o club. 

A canción, composta por Hard, mestura de rap contemporáneo con sons autóctonos que evocan a terra, o mar e a nostalxia, é tema oficial que celebra o regreso do Celta a Europa e un paso máis na estratexia Raíces do Celta, de posta en valor da identidade galega.