Cinema

  • Novas Camadas: 'O mar é o meu chan'

    Na década dos 70, varios mozos coruñeses lanzáronse a coller ondas nas praias da cidade. Sen apenas referentes e nunha sociedade que vivía aínda de costas ao mar, fabricaron táboas, descubriron novas rompentes e convertéronse, sen sabelo, en protagonistas do inicio da historia do surf en Galicia. A música da curta é de bandas históricas coruñesas: Radio Océano (Como o vento) e Viuda Gómez e Hijos (Psico). O director está graduado en Comunicación Audiovisual pola USC.

    Xoán Vázquez González dirixe esta curta recoñecida cunha mención especial do xurado das Novas Camadas 2026 do Festival de Cans. 
     

    Podes ver a peza, en VINTE, en exclusiva, ata o 3 de xuño ás 12.00 horas.

    Cinema

    Coa colaboración de

  • Novas Camadas: 'Galicia non arde'

    Cando xa non hai sitio para a dor que pode provocar un bidón de gasolina e un chisqueiro sobre a terra que un habita, nas caras dos culpables concéntrase toda a ira", di Rothardt dunha curta sobre os incendios, Galicia e a culpabilidade.

    Martín Rothardt Veiga dirixe esta curta seleccionada na sección de Novas Camadas do Festival de Cans 2026.

    Podes ver a peza, en exclusiva, en VINTE, ata o 2 de xuño ás 16.00 h.
     

    Cinema

    Coa colaboración de

  • Volven as curtas das Novas Camadas ao Festival de Cans e a VINTE

    Este mércores, 20 de maio, ás 19.00 horas o Baixo de Carlos acollerá a proxección das once curtas de novas e novos autores seleccionadas nesta XXIII edición do Festival de Cans, as Novas Camadas. E como cada ano en VINTE ofrecemos a posibilidade de ver todos estes traballos de mozas e mozos menores de 25 anos en exclusiva. A partir do luns 25 estrearemos cada día unha obra ás 12:00 h. (de luns a venres), que estará dispoñible durante 24 horas para a súa libre visualización. As proxeccións en VINTE acabarán o luns, 8 de xuño, coa curta gañadora desta edición. Velaquí un resumo de cada traballo.

    Cinema

    Co patrocinio de

  • Filmika Galaika volve ás súas orixes con 'Krakatoa': “É máis ca unha película”

    O filme Krakatoa vén de vivir a súa estrea no festival de cinema de Rotterdam. Alí os pases estiveron cheos para presenciar un produto cinematográfico diferente, que nace como live cinema e performance artística coas miras postas en centros de arte. En Krakatoa acompañamos a un pescador de Indonesia na súa actividade ata que chega a erupción do volcán, a destrución e o son máis forte xamais ouvido. Para Beli Martínez, produtora executiva con Filmika Galaika, é unha película “superauténtica e radical” que lles permitiu volver ás orixes.

    Cinema

  • Entrevista | Iván Castiñeiras: “A película é unha oda á xente do rural, a eses deuses que resisten como as pedras”

    Un recoñemento inesperado. Así cualifica Iván Castiñeiras o que está a acontecer con Deuses de Pedra, a súa primeira longametraxe como director. Trátase dunha “película pequena feita con moito cariño”, segundo el mesmo indica, onde empregou material gravado ao longo de quince anos e está a percorrer festivais internacionais con varios premios xa acadados. Un éxito inesperado, mais non inmerecido para un proxecto de gran beleza que homenaxea as súas terras da infancia, na frontera entre Galicia e Portugal; e, sobre todo, recoñece a súa veciñanza, eses "deuses de pedra" que resisten alí, aínda que cada vez sexa máis difícil manterse en pé.

    Cinema

  • Novas Camadas 2025. Dez curtas para ver en Cans e tamén en VINTE

    As Novas Camadas volven ao Festival de Cans... e a VINTE! Este mércores 21 de maio, a partir das 18.30 h, o Baixo de Carlos acollerá a proxección das dez curtas seleccionadas de autores e autoras menores de 25 anos. E a partir do luns, 26, estrearemos cada día unha obra en VINTE, en exclusiva, durante 24 horas ata o venres 6 de xuño, cando pechará a rolda de proxeccións a curta gañadora deste ano. As estreas serán ás 12.00 horas. Aquí vai un pequeno resumo de cada traballo.

    Cinema

    Co patrocinio de

  • Entrevista | Zeltia Outeiriño: «Grazas a este filme puiden escoitar a miña nai, coñecela, mirala e admirala»

    Este venres, 31 de xaneiro, chega aos cinemas de Galicia a película Filmei paxaros voando, primeira longametraxe que asina a directora galega Zeltia Outeiriño. 

    A crise dos 40 moveu a realizadora a subir un chanzo creativo e lanzarse a facer unha película para falar de desarraigo familiar e interpelar a sociedade sobre os coidados, a atención sociosanitaria e os nesgos de xénero, o idadismo ou os silencios da homofobia nos felices anos 80.

    Cinema

  • Aula do Festival Novos Cinemas. Álvaro Gago amosa o camiño creativo: paciencia co maxín

    Pensar amodo, repensar e decidir. Algo tan sinxelo como tomar o tempo necesario para facer as cousas ben pode semellar un pensamento algo excéntico na tiranía do agora mesmo que goberna pero foi unha das liñas vermellas que marcou o cineasta Álvaro Gago durante as clases na Aula do Festival Novos Cinemas. Para o alumnado esa dirección desde a «paciencia e a tenrura» resultou algo «moi inspirador» para a creación das súas obras audiovisuais, que foron estreadas este martes no Teatro Principal de Pontevedra.

    Cinema

  • Cineuropa estrea ‘7.291’, a crónica do terror nas residencias durante a pandemia

    «Non tiñamos nin un mórfido para que marchasen tranquilos». «Tusían polo baixo porque tiñan medo a que os levasen». Os testemuños das traballadoras dan conta do horror vivido durante a pandemia nas residencias de maiores. E catro anos despois, as feridas non están pechadas. 

    O director Juanjo Castro vén de estrear en Cineuropa 7.291, un documental onde debulla o acontecido na comunidade de Madrid durante o pico da pandemia, cando se aplicaron os coñecidos como «protocolos da vergoña» -que na práctica impedían trasladar os maiores a hospitales- e morreu case o 20% dos anciáns que estaban en residencias. Dese total, que superou as 9.000 persoas, 7.291 corresponde co número de persoas falecidas nas residencias da comundidade gobernada por Isabel Díaz Ayuso que non foron derivadas a hospitais entre marzo e abril de 2020.

    Cinema