O cantareiro e balador galego Mondra leva por bandeira “ser galego e maricón”. No Día do Orgullo LGBTIQA+, o artista lanza o seu novo sinxelo, “Marimondra”, un canto á disidencia onde reivindica a creación cuir en galego e desde Galicia.

“Ei, son Marimondra / un ser ben dramático / Sempre di meu pai / que nacín fóra do armario” canta Mondra nunha peza na que tamén participa a intérprete Mónica de Nut.

O traballo vén acompañado cun vídeo, que dirixe Mondra xunto a Adela Otero, ambientado nunha froitaría algo inusual, que conta coa coreografía de Daniel Rodríguez e co asesoramento do proxecto ‘En lingua de signos’para referir termos como “trans”, “lesbiana”, “cuir” ou “marica”. 

“Queremos que “Marimondra” sexa un canto de celebración, de liberación e de orgullo, que poida representar a calquera persoa do colectivo”, defende Mondra, quen avanza que o tema se poderá escoitar nas súas vindeiras citas en directo.