Café Derby 21. Temporada 4

O Café Derby é unha sobremesa cultural e virtual. Con Nicolás Carreira, Carme Domínguez, Adrián Lede e un convidado ou convidada cada quince días. Atópanos en redes como @cafederby21 para informarte sobre futuros directos. Estrea cada dous mércores en VINTE e nas plataformas de audio habituais.

Café Derby 21. Temporada 4

Despedida do Café Derby 21. «Queremos marchar no alto. Non é que esteamos cansos de aguantarnos»

«Morre un podcast. Nace un mito». Jorge Guitián resumía deste xeito tan conciso e acertado nun tuit a deriva do podcast Café Derby 21, que vai ser enterrado por todo o alto o 27 de xuño cunha festa en Santiago. Despois de catro anos e máis dun cento de programas, Nico Carreira, Carme D. Prol e Adrián Lede, dan por pechada unha etapa do exitoso podcast sen renunciar a reinventalo con máis medios e contidos audiovisuais.
«É bastante triste rematar como María Teresa Campos, suplicando un programa polas televisións, en lugar de desaparecer e quedar como un fenómeno dun momento; e máis no noso caso, que comezou como unha tertulia e queda como un repositorio da Galicia dun tempo e dun momento», argumenta Nico Carreira.

Podcast
Café Derby 21. Temporada 4

Café Derby 21. O futuro, con Xacobe Pato

Chegamos ao noso último programa con convidado, xa que esta temporada remataremos dun xeito distinto. E, como xa sabedes, tamén ao final do podcast. Lembrade que celebraremos un derradeiro Café Derby 21 o xoves 27 de xuño, ás 19:30 horas no Riquela Club, en Santiago de Compostela.
Como somos moi de pechar ciclos con significado, quixemos contar co padriño do noso podcast para darlle final. O escritor Xacobe Pato pasou polos nosos micros hai 4 anos e volve agora para falar do futuro, non tanto como ciencia ficción, senón como as proxeccións, o medo ao que estar por vir ou a idealización do futuro.

Podcast

Co patrocinio de
Café Derby 21. Temporada 4

Café Derby 21. O teatro, con Lidia Veiga

O novo programa do Café Derby 21 sobe ao escenario para abordar o drama, tratar os grandes temas da vida e... falar de Manuel Fraga. En concreto, de Iribarne, a obra de teatro que está dando a volta a Galicia, esgotando entradas alí onde vai e converténdose en todo un fenómeno popular.
Para parolar sobre o teatro contamos coa actriz Lidia Veiga, tamén coñecida como integrante do podcast Exército Mekemeke.

Podcast

Co patrocinio de
Café Derby 21. Temporada 4

Café Derby 21. O pasado, con Fillas de Cassandra

Son moitas as persoas que pedían este momento e por fin podemos confirmar que se fixo real: Fillas de Cassandra no Café Derby 21! Atopámonos co dúo galego logo do seu masivo concerto en Santiago de Compostela ante miles de persoas. Aínda con folgos, tiveron todo o ánimo para falar sobre o pasado.
Con Fillas de Cassandra parolamos das herdanzas e o que queremos legar, de tataravoas, de vivir no presente e non deixarse levar por recordos sesgados ou das músicas de onte e máis atrás, entre outros moitos temas.

Podcast

Co patrocinio de
Café Derby 21. Temporada 4

Café Derby 21. O amor, con Grande Amore

Chegou o momento de falar dun dos temas máis agardados: ️o amor. Grazas á publicación de certa carta de certo mandatario na que recoñecía estar fondamente namorado da súa muller, decidimos actuar e montar un comité de urxencia para abordar o tema de namorarse e demais. Por iso quixemos conversar con Grande Amore, amigo histórico do Café Derby 21, nun programa gravado en directo no Parador de Vilalba como parte da programación do FIV.

Podcast

Co patrocinio de
Café Derby 21. Temporada 4

Café Derby 21. Improvisar, con Lucía Veiga

Pode parecer que traballamos sen escaleta e sen texto preparado, pero iso non é de todo certo. Levamos anos deixando oco ao incerto e a que todo aconteza, polo que desenvolvemos unhas certas habilidades. Por iso, neste programa xuntámonos coa actriz, presentadora e cómica Lucía Veiga para improvisar e falar de humor, da vida e de ligar.
Logo de gañar dous Mestre Mateo, Lucía Veiga chega ao noso podcast para afondar nos misterios da risa, poñer en valor a importancia da improvisación para saír adiante e deixar consellos sobre como improvisar en entrevistas de traballo ou infidelidades.

Podcast

Co patrocinio de
Café Derby 21. Temporada 4

Café Derby 21. O misterio, con Arantza Portabales

Logo de varias semanas de incógnitas, nos últimos días moitos misterios foron desvelados, algúns positivos e outros non tanto. Para achegarnos á máxima actualidade no campo da investigación e resolución de incógnitas, neste programa contamos coa escritora e dama da novela negra, Arantza Portabales.
Xunto a ela repasamos cuestións tan variadas como a paixón polo misterio, os nosos asasinos e detectives favoritos, os elementos para unha boa novela negra, misterios actuais como o de Kate Middleton e esa crise de comunicación, ou as motivacións para matar, desde o persoal ata o profesional.

Podcast

Co patrocinio de
Café Derby 21. Temporada 4

Café Derby 21. A memoria, con Bruno Arias

Neste episodio contamos co cineasta Bruno Arias, finalista aos premios Mestre Mateo co seu debut Os espazos en branco. Neste documental, Bruno achégase á figura da súa tía, Xela Arias, dun xeito íntimo e persoal. Efectivamente, falamos da memoria.
Para non poñernos puristas e densos, parolamos sobre o persoal, os primeiros recordos, as mortes de familiares influentes; mais tamén de momentos históricos e onde estabamos, cambios de papas, o 11S, a construción de recordos ou as cámaras analóxicas.

Podcast

Co patrocinio de
Café Derby 21. Temporada 4

Café Derby 21. Os bares, con Leti da Taberna

Esta semana propoñemos un brinde para nós por sacar adiante unhas semanas raras e continuar como se nada. Por iso, quixemos contar coa opinión dunha experta na comedia, na arte de vivir e dos lugares onde se brindan. Dámoslle a benvida a Leti da Taberna para parolar sobre os bares.
Xunto a ela repasamos a nosa traxectoria vital de bares, tabernas e recunchos, historias arredor dos bares, o novo conflito da Hortelería e os seus bares fabricados en cadea sen personalidade, as casas de comidas tradicionais, a importancia da taberna no núcleo rural e os nosos bares de favoritos na cultura, como Los Serrano, Pratos Combinados ou Seinfeld.

Podcast

Co patrocinio de
Café Derby 21. Temporada 4

Café Derby 21. As eleccións, con Iván Iglesias

Galicia vai a eleccións o #18F. Aínda non sabías nada disto? Quizais eras a última persoa do país. En calquera caso, un evento tan relevante para o futuro e a cultura tiña que ter o seu oco no Café Derby 21, pero desde o noso propio terreo. Por iso, contamos co xornalista, comunicador político e director de Ou Ké!, Iván Iglesias, para parolar sobre as eleccións️, pero as de todos os tipos.
O equipo de Ou Ké! está cubrindo a campaña e as semanas previas ás eleccións galegas, por iso xuntámonos con Iván Iglesias para coñecer a importancia de Ourense nestes comicios, as posibilidades de goberno alternativo de esquerdas ou os candidatos. Tamén tratamos as outras ️eleccións️ que nos tocan de preto: a canción "Zorra" de Nebulossa a Eurovisión, a final de Operación Triunfo e as eleccións vitais (tomadas ou non) que non traen ata onde estamos.

Podcast

Co patrocinio de