Podcast

Dámosvos a benvida ao consultorio máis fabuloso de Internet! Neste episodio, os mekemekes sentámonos a responder as preguntas, dúbidas, dilemas e ocorrencias que nos enviastes. Hai consellos útiles? Probablemente non. Hai respostas inesperadas, anécdotas e moitas risas? Diso vai sobrado. Grazas por enviarnos as vosas preguntas e por facer posible este consultorio tan peculiar. 
Se queredes participar nos próximos episodios, prestade atención ás nosas redes porque anunciaremos a pretempada para despois do verán. Preparade papel e lapis, porque os expertos en absolutamente nada xa están aquí para axudarvos. 

Neste programa especial no ‪Festval de Cans preguntámonos: e se os galpóns xa non serven só para gardar o tractor? Exploramos ideas revolucionarias coa bailarina e actriz porriñesa, Janet Novás, para darlles unha segunda vida a estas edificacións completamente legais: 
🏡 Alugar galpóns para vivir: Porque quen necesita fiestras cando podes espertar cada día co aroma a silo e o cacarexo dunha pita libre? (Inclúe humidade de balde). 
🚜 Chimpíns como transporte público: Esquece o tren de alta velocidade. Imaxina ir ao Morrazo polo monte a velocidade de chimpín, sen atascos e cunhas canisas con astillas. 

Hoxe poñémonos a proba cun desafío tecnolóxico: preguntas trampa, mitos tecnolóxicos e a nosa cara cando non sabiamos que era o PIN. Quen será o auténtico mekemeke tecnolóxico? 

Un programa presentado por Carlos Vieito, onde conversa con Lidia Veiga e o Xubi.

Se eras de clase B… este episodio é terapia! Viaxa cos mekemekes ao pasado para falar dunha das rivalidades máis antergas da nosa vida: os de A contra os de B. Os favoritos do profesorado, os “aplicados”, contra os que vivían un pouco máis ao límite. Pero a cousa non queda aí. Porque cando pensabas que madurabas… chega a universidade e reaparece o pique: carreiras que se cren superiores, guerras eternas entre facultades e ese clásico de “o meu é máis difícil ca o teu” que nunca pasa de moda.

Hai familias normais… e logo están as nosas. Eses tíos que aparecen só en vodas, as avoas que todo o saben, os curmáns que sempre teñen unha historia mellor ca túa e esas reunións familiares que comezan tranquilas… e acaban sendo material de terapia. Situacións coas que todos nos sentimos identificados, levándoas ao extremo con humor absurdo, retranca e pensamentos revirados. 

Se algunha vez pensaches “isto só pasa na miña familia”… xa verás como non.