Camiseta “Tranquiliña hostias!”

25 €

Camiseta orgánica de algodón de corte unisex comercializada por Estudio Brétemas. Esta é unha homenaxe a Ramona, a protagonista do filme Matria, que responde así cando lle piden calma na empresa tras anunciar despedimentos. 

Comprar

Queixo Terra de Airas Moniz

14,50 € 

A queixaría de Chantada Airas Moniz  elabora este queixo de pasta branda e codia comestible. Pode ser máis firme ou cremoso, segundo a época do ano. Terra foi considerado o terceiro mellor queixo de vaca de España en 2017.  

Comprar

Libro ‘Fago o que podo’, de Afra Torrado

21 €

Este libro de banda deseñada recolle os traballos e debuxos que dende o 2018 ata o 2023 fixo a autora de Bamio (Vilagarcía de Arousa), Afra Torrado, incluídas as súas senlleiras historietas da 'señora Barbuda'. Fago o que podo é unha viaxe divertidísima polos conflitos internos da propia autora e do noso tempo. Editado por Rodolfo e Priscila.

Comprar

Suadoiro Brava do Rei Zentolo

39,95 € 

Barbie si... pero brava tamén. No ano de Barbie a firma de roupa viguesa Rei Zentolo fai 20 anos de historia polo que non podían faltar na nosa lista. A proposta é un suodoiro de algodón coa frase “Na miña cona Brava non manda nin Ken”.

Comprar

Lote Picoteo do Pepiño de Allariz

34,90 € 

O lote de picoteo Triple porco, que ofrece a tenda do Pepiño de Allariz está formado por un sobre de xamón afumado da Raia Portuguesa, unha bolsa de catro unidades de chourizo tradicional, salchichón cular e unha botella de viño Mencía Pepiño.

Comprar

Póster de Alariko ‘Hotel in the sea’

Desde 30 €

O popular artista pontevedrés, con centos de milleiros de seguidores en todo o mundo, desvelou en VINTE algúns detalles da súa vida e obra, na que fai retratos de edificios imperfectos, cheos de detalles que lles dan humanidade, aínda que non aparezan persoas. Alariko asegura que a súa inspiración «está na vida real, na rúa, e tamén viaxo moito por Google Maps».

Comprar

Set Baño Fol Sargadelos

110,00 €

Unha opción algo elevada de prezo, mais xeitosa abonda para un agasallo especial. Sargadelos inspirouse no sinuoso xogo de superficies que forman os pregos dos fois para realizar este relevo xeométrico, vistoso e simétrico, que aplican sobre diversas pezas. O set de baño Fol está composto por xaboeira, dispensador e vaso.

Comprar

Entradas para o ‘Meixeverso’

Desde 14 €

O cómico de Ordes, moi coñecido polos vídeos de humor en TikTok, está de xira co seu novo espectáculo chamado ‘Meixeverso’. Tal e como explicaba a VINTE o propio Pablo Meixe,  este é un show de comedia moi completo, con banda sonora propia, material audiovisual, interacción coa pantalla ou co público, cambios de vestiario e monólogo, por suposto. O 27 de xaneiro estará no Centro Sociocultural Ágora na Coruña. 

Comprar

Libro ‘Caramomia’

12,95 €

O Hematocrítico, María Lado, Daniel Landesa e Ledicia Costas uníronse para crear ‘Caramomia’, un divertido misterio escrito a oito mans. ‘Caramomia’ chegou ás librarías poucas semanas antes do pasamento de Miguel López, O Hematocrítico, o 27 de novembro deste 2023, con 47 anos.

Comprar

Xogo de cartas Cordadas

18 € 

Cordadas é un xogo de cartas de 2 a 6 xogadores en edición bilingüe, galego e castelán, cheo de trasnadas, homes mortos e fenómenos meteorolóxicos adversos que se interporán entre ti e o cumio. Aínda que sexa de temática montañeira, calquera pode xogar xa que se basea nun código de cores desenvolvido pola empresa galega Muki Xogos

Comprar

Caixa gourmet con licor café, conserva de navallas e paté de mexillón

52 €

Desde a Costa da Morte Stoupa comercializa esta caixa gourmet en colaboración coa empresa AR de Arte. O lote está composto por unha botella de licor café, unha botella de crema de oruxo, unha lata de conserva de navallas ao natural e  unha caixa de paté de mexillón galego, cociñado cunhas alsa caseira.

Comprar

Buxaina voadora

27 €

A cooperativa galega Miudiño propón un clásico para xogar a todas as idades. A Buxaina voadora é un marabilloso xoguete de habilidade. Realizado artesanalmente en madeira natural tratada con aceites naturais e cordel de algodón. Consta de varias pezas: cordel con mango tirador, buxaina e lanzadeira.

Comprar

Abono para o festival Portamérica

80 €

Juanes ou Vetusta Morla están á fronte do cartel da próxima edición de Portamérica, no que poderemos ver a Xoel López, León Benavente, Rodrigo Cuevas, The Rapants xunto con Mondra ou Guadi Galego. Unha boa sorpresa para agasallar os afeccionados á musica en directo.  O festival celébrase en Portas do 4 ao 6 de xullo.

Comprar

Cesta baño Lagoa

25 €

Na web da empresa coruñesa Mar de Miranda atopamos este orixinal conxunto composto por unha esponxa mariña, un pousa xabón e un xabón natural. A cesta está feita á man en aceiro e la.

 Comprar

Libro ‘Historia do fútbol feminino en Galicia’

17,50 €

 A editorial Galaxia publicou este verán este achegamento ao fútbol feminino escrito por Héctor Pena. Unha boa oportunidade para coñecer todo o traxecto de resiliencia e sororidade das mulleres no mundo do fútbol en xeral pero sobre todo en Galicia, desde os tempos da pioneira, Irene González, ata a actualidade, cando que a xeración de ouro de Vero Boquete ou Mari Paz Vilas comeza a deixar paso a novos talentos.

 Comprar

Lata café de Nadal

66,90 €

Para os máis cafeteiros. A cesta da firma coruñesa Pandelino inclúe un paquete de café  Selección 100% Arábica, culleriñas de chocolate, unha marmelada artesá, unha bolsa de galletas de manteiga e un set de té Margherite. Todo presentado nunha decorativa lata vermella con flores en relevo.

Comprar

Pendentes Origami con forma de papiroflexia

  62 €

Un capricho ou un agasallo. Nunca se necesita unha xoia, mais sempre gusta recibila. Neste caso propomos estes pendentes de Ardentía, de gancho fixo. Pertencen á colección Origami e a súa forma está inspirada na papiroflexia. En prata de Lei 925, con acabado chapado en ouro ou con pátinas e pigmentos irisados (azul ou morado).

Comprar

Libro ilustrado ‘Os Nosos Bosques’, de Miudiño editora

  18 €

Os nosos bosques é un libro ilustrado da cooperativa galega Miudiño. A través das súas ilustracións amósase a riqueza da vida que agochan os diversos bosques galegos, invitándonos a esculcalas e coñecermos as fragas atlánticas, as devesas luguesas, as carballeiras e soutos repartidos polo territorio… para descubrirmos a realidade que cobre boa parte do país.

  Comprar

Quenta pans Aurora

15 €

A tenda de Santiago Boles, artesanía útil ofrece esta curiosa peza pensada para manter quente o pan na mesa. Realizada de forma artesá con barro de Buño. 

Comprar

Axenda 2024 de ‘Luzes’

10 €

Si, aínda hai (moita) xente que prefire anotar as súas cousas en papel, ter a súa axenda sempre de man e poder incluso facer garabatos creativos nela. Para todas esas persoas propomos a axenda da revista Luzes, que celebra dez anos de vida no xornalismo e anima a subscribirse xa sexa para a súa edición en papel ou dixital. 

Comprar