VINTE

Vinte destaques de 2022. Os acontecementos culturais que fixeron avanzar o (noso) mundo este ano

martes 20, decembro 2022 VINTE @vintenapraza

Este 2022 foi un ano de recuperación de encontros, de iniciativas culturais, de apertas, de bailes, de festivais, da vida sen máscaras na rúa… Tanta colleita pedía un bo repaso e en VINTE liamos a vinte persoas próximas á revista para que recompilasen os seus destaques do ano tanto relacionados con Galicia como doutras latitudes.

Contamos cos destaques de 2022 das escritoras Berta Dávila e Carlos Meixide, editoras de Rodolfo e Priscila; do xornalista especializado na información musical Marcos Blanco Gendre; do profesor de Comunicación Audiovisual da USC, músico autor do podcast FAN FAN Cibrán Tenreiro; do escritor e editor Ramón D. Veiga; do poeta Jesús Castro Yáñez; da xornalista e produtora cultural Andrea Villa; do responsable d’A regueifa plataforma 2.0 Noel Feáns; das xornalistas Ana Gayoso, Uxía Bereijo, Belén Teiga, Iria Curros, Bárbara G. Vilariño e Dani Portela; dos compañeiros do podcast Café Derby 21 Carme D. Prol, Nico C. Pena e Adrián Lede; do director de Praza.gal, David Lombao; da xornalista de Praza.gal e VINTE Ana G. Liste; e da directora de VINTE, María Yáñez.

Pedímoslles a estas vinte persoas achegadas ou que adoitan colaborar con VINTE que nos escollesen o que para elas fosen os vinte acontecementos culturais máis importantes do ano. Entendendo a cultura de maneira ampla: libros, discos, cancións, concertos, exposicións, obras de teatro, estreas de cinema, aniversarios, cousas de internet, mesmo acontecementos sociais e políticos que dalgún xeito estean a cambiar tamén a cultura do tempo que vivimos. Serían dúas listas en realidade: dez cousas relacionadas con Galicia e dez sen relación especial con Galicia. Sen orde de preferencia. Podedes ver as súas escolmas individuais un pouco máis abaixo.

De todos xeitos o noso traballo tamén era procesar un pouco esta información para contarvos, de entre todas as escollas, que é o máis destacado do ano do universo VINTE. Hai varios acontecementos que se repiten e con eles fixemos unha especie de lista final. Aquí volos explicamos.

É posible que se pensades no máis salientable do ano haxa un nome que vos veña á cabeza, así lles sucedeu a máis da metade das amizades colaboradoras para esta aventura de resumir o ano a partir de vinte acontecementos culturais. Pois si, as Tanxugueiras son as que aparecen en máis listas! Como non podía ser doutra maneira, xa que en poucos meses pasamos da aldraxe do Benidorm Fest con “Terra” a unha xira incansable cun novo disco, Diluvio, polo medio. Pero ollo, porque hai outro protagonista destacado, o poeta de Mazaricos Ismael Ramos, que foi galardoado co Premio Nacional de Poesía Joven «Miguel Hernández», que outorga o Ministerio de Cultura, por Lixeiro (Xerais).

Hai acontecementos que fican na memoria e neste século o Prestige é un dos inesquecibles. O vinte aniversario da catástrofe deste petroleiro que afundiu diante da Costa da Morte e as lembranzas da marea negra repítense, da mesma maneira que agroma o debate arredor do filme de Rodrigo Sorogoyen As Bestas, que activa de volta a aldraxe sobre a visión exterior do rural galego e tamén nos fai lembrar o crime da aldea de Santoalla, que quedara plasmado nun documental, e que agora vai camiño de facer historia nos Goya con Luis Zahera e Diego Anido competindo no premio ao mellor actor de reparto.

As Tanxugueiras son as que aparecen en máis listas deste 2022, nas que o poeta Ismael Ramos tamén está destacado

Outro aniversario, neste caso centenario, estivo moi presente na acción cultural deste 2022, no que nos achegamos á figura da actriz María Casares, para moitos aínda unha descoñecida. Entre as homenaxes que tiveron lugar ao longo do ano, resalta a peza teatral Continente María, protagonizada por Melania Cruz baixo a dirección de Tito Asorey. Como tamén aparece destacada en varias ocasións a escritora Marilar Aleixandre, que coa novela As malas mulleres (Galaxia)foi distinguida co Premio Nacional de Narrativa do Estado.

En 2022 houbo un cambio na Xunta, que non por agardado é menos destacado. A saída de Alberto Núñez Feijóo para presidir o PP é o asunto político do ano para as nosas colaboradoras, que non esquecen á gañadora do Premio Nobel de Literatura, a francesa Annie Ernaux, da que hai moitas lectoras nas nosas filas. Pois ademais dos libros de Ismael Ramos e Marilar Aleixandre, vemos moitas veces repetidos títulos como a novela Os seres queridos de Berta Dávila, Premio Xerais de Novela 2021, e o primeiro libro de Brais Lamela, Ninguén queda, editado por Euseino.

O triunfo da cineasta catalana Carla Simón facéndose co Oso de Oro por Alcarràs no Festival de Berlín, o novo disco de Taylor Swift Midnights, a incerteza arredor de Twitter coa compra por parte de Elon Musk e a súa posible desaparición ou a recuperación da canción de Juan Pardo “Xuntos” por parte de Familia Caamagno tamén están entre os acontecementos máis relevantes que podedes atopar nas listas individuais completas, que vos deixamos a continuación.