Miudiño Sessions

Seguindo o ronsel dos concertos para levar de La Blogotheque, os Tiny Desk Concerts da radio pública norteamericana ou os pioneiros acústicos da MTV dos 90s, A Regueifa 2.0 presenta as Miudiño Sessions, unha serie de micronconcertos de grupos e solistas galegxs en formato mínimo gravados en localizacións singulares.

  • Miudiño Sessions

    Miudiño Sessions: Os Amigos dos Músicos

    Chega unha nova entrega das Miudiño Sessions con Os Amigos dos Músicos, unha das formacións que marcou a lume a nosa escena da segunda metade dos anos dez. Cos seus dous discos longos, Os amigos dos Músicos e Segundo fogar, foron quen de renovar o indie galegófono coa introdución de sonoridades e sensibilidades do folk rock americano ata entón inéditas na nosa música por medio dun proxecto coral onde a sinerxía da suma do talento colectivo levaba a novas cotas os talentos individuais.

    Un grupo de amigos, antes que músicos, onde bateu a desgraza en 2021 ao perder, con só 41 anos, ao seu batería e alma máter, o inesquecible Jaime Mateo. Por iso, no terceiro cabodano do seu pasamento quixeron lembrar o seu compañeiro interpretando "Os Amigos", unha versión adaptada polo propio Jaime dunha peza orixinal de David Mansanet.

    Música
  • Miudiño Sessions

    Miudiño Sessions: Ataque Escampe

    Chega unha nova entrega das Miudiño Sessions con Ataque Escampe, unha das formacións máis senlleiras da escena e pioneiros da necesaria renovación lírica e estilística que ten experimentado a música galega das últimas dúas décadas.

     Nas ruínas do que en tempos foi a maior fábrica de vasoiras da Europa occidental -hoxe transmutada en improvisado museu de arte urbana- o agora sexteto quixo facer un percorrido vital polo seu inabarcable repertorio, enfiando clásicos coma "Noites de agosto" ou "Papá borracho" con novas pezas do seu recente Cabalgata e sorpresas coma a reinvención de "A vitoria" en clave de bachata

    Música
  • Miudiño Sessions

    Miudiño Sessions: SEIS, Lorca en Galicia

    Chega unha nova entrega das Miudiño Sessions rexistrando a inédita proposta de SEIS, un colectivo músico-poético e audiovisual formado pola poeta Lara Dopazo, a cineasta Adriana Páramo e os guitarristas Rafa Fernández e Virxilio Da Silva. 

    Encol das mesmas pedras onde o 24 de agosto de 1932 Federico García Lorca enchía a Praza da Quintana coa representación dos entremeses cervantinos de La Barraca, o cuarteto levou os seis poemas galegos do poeta andalusí aos territorios da vangarda, o spoken word, a videopoesía e o post-rock nunha actuación irrepetible arroupada pola Semana do Libro de Compostela.

  • Miudiño Sessions

    Miudiño Sessions: Columna Vegana

    A apropiación que fan Columna Vegana da "Oda ao xamón" de Otero Pedrayo foi a escusa perfecta para trasladarnos até o Pazo de Trasalba, casa natal e sede da súa Fundación, para gravar unha nova entrega das Miudiño Sessions. 

    O contraste entre a arriscada proposta de Columna Vegana -a cabalo entre a densidade intelectual do art-punk e o nihilismo da no wave- e o salón conxelado no tempo de Don Ramón foi o mellor dos escenarios posibles no que esfarelar o máis crú do seu repertorio. 

    Música
  • Miudiño Sessions

    Miudiño Sessions: Xosé Constenla

    Desta volta as cámaras da Regueifa foron ata o antigo campo de concentración franquista da Pobra do Caramiñal para filmar a Xosé Constenla, unha das voces máis senlleiras da canción de autor galega das tres últimas décadas. A escolla dunha localización de tan funesto recordo -pola que pasaron máis de 1.000 prisioneiros e prisioneiras- non foi casual. 

    Rexistrar a interpretación ao vivo das cinco pezas que farán parte do seu novo traballo nun dos once campos de concentración que o fascismo artellou na nosa terra era o mellor xeito de honrar aos protagonistas das súas novas cancións. Nelas atopamos historias de represión, padecemento e morte pero tamén a ilusión, albor e esperanza dunha fermosa etapa histórica que frustrou o golpe militar de 1936. As historias de mestres fusilados, traballadores exiliados e bravas mulleres de maquis ecoaron vivas nos vellos muros do que un día foi testemuño da barbarie e a senrazón e hoxe é memoria a recuperar dunha etapa da nosa Historia que cómpre non esquecer.

    Música
  • Miudiño Sessions

    Miudiño Sessions: Pauliña

    Desta volta A Regueifa Plataforma achegouse ata Silleda para filmar a sesión de Pauliña, unha das voces propias con máis personalidade da escena galega. 

    Fronte a un muro de motores que agardaban solemnes unha segunda vida a cambadesa teceu na compaña da súa banda a súa habitual mestura de estilos en tres pezas (Fame, Pasa de min e Fáltame o aire) nas que, coa dominancia cromática punk marca da casa pauliana, o urdime se foi tinguindo dunha policromía que foi do rock, ao blues ou ao raggamuffin. Un saboroso petisco audiovisual para ir abrindo boca na véspera mesma da saída do seu novo disco, Galego Is Not Dead. 

    Música
  • Miudiño Sessions

    Miudiño Sessions: Musel

    Nesta nova sesión A Regueifa Plataforma colleu a eternamente inacabada A-54 para achegarse ao corazón da Terra Chá e filmar o exquisito slowcore galaico de Musel. O trío liderado por Óscar Vilariño (ex-Triángulo de Amor Bizarro, A veces Ciclón, Fracaso Tropical) leva unha década achegando a nosa lingua ao son de bandas coma Low ou Yo La Tengo baixo o signo do que non é profeta na súa terra ao editar os seus traballos na mítico discográfica indie Acuarela Discos (Migala, Refree, Sr Chinarro, The Wave Pictures...). 

    Nun alpendre, que foi perfecto acubillo para o frío lugués, a formación, completada por Charlie Méndez ao baixo e Juantxo Pájaro á batería, interpretou as pezas "Feirán", "Sombra e luz" e "Trapalladas".

    Música
  • Miudiño Sessions

    Miudiño Sessions: Bigornia

    Nesta nova sesión A Regueifa Plataforma elévase por riba do skyline da zona vella compostelá para filmar a fórmula vangardista de Bigornia. Unha proposta inédita no País na que Fonsi achega a música electrónica, manufacturada artesanalmente ao vivo con sintetizadores modulares, mentres Xabier faise cargo do baixo e os audiovisuais analóxicos procesados, tamén, en tempo real. 

    O dúo lanzou o pasado ano o seu primeiro traballo discográfico, Tandem, interpretando para a sesión dúas pezas novas, "Parálise" e "Matamarcian4s". 

    Bigornia estarán actuando ao vivo este venres, 9 de febreiro, na Pousada da Galiza Imaxinaria de Boiro.

    Música
  • Miudiño Sessions

    Miudiño Sessions: Momboi

    Nesta sesión A Regueifa Plataforma tivo a sorte de contar con Momboi, gañadores dos premios Martin Codax da Música do pasado ano na categoría indie. Seguindo o fío da temática do seu útimo disco longo, Vacacións en Ornanda, as Miudiño Sessións chegaron até os cantís da propia praia de Ornanda onde os noienses interpretaron catro temas, "Uxía", "Cabalo negro", "Acacias" e o seu máis recente single, "Último baile". 

    Co monte Louro e a roubada Illa da Creba ao fundo o quinteto fixo ecoar por toda a ría de Muros e Noia a súa especial fusión de músicas de raigame latinoamericana e pop, unha proposta única na escena galega. Momboi atópanse agora a preparar novas músicas que seguramente poderemos escoitar ao longo deste ano que comeza.

    Música
  • Miudiño Sessions

    Miudiño Sessions: Berlai

    Os equipos de gravación da Regueifa desprazáronse ata unha antiga carnizaría no herculino Portazgo para filmar a Xiao Berlai, unha das voces máis persoais da escena. Na compaña da súa all-star band habitual (Iago Mouriño ao piano, Pablo Sanmamede ao baixo e Bruno Couceiro á batería) o de Guntín fixo un percorrido polos seus dous últimos traballos interpretando "Um país com dous nomes" de Estampas Galegas e "No espelho" e "Na casa" de Cas Berlai.

    Música