Miudiño Sessions

Lontreira, unha das bandas revelación do pasado ano, acudiu á chamada das cámaras da Regueifa Plataforma para espir catro pezas de Apnea, o seu disco de debut. Ao acubillo do senlleiro muíño de vento do Monte Beiro, en Valga, o trío deixou á beira calquera tentación electrónica para levar a súa fermosa mestura de pop e música de raigame de aquí e acolá a un formato mínimo onde o piano de Rotce e a guitarra acústica de Iván Barral aloumiñan a delicada voz de Adri Cores. 

Lontreira veñen de sacar Un futuro sen ti, unha samba en colaboración con Berto cantada en galego internacional no que abren aínda máis o seu engaiolante abano de influencias de ultramar.

Na vixésima entrega das Miudiño Sessions as cámaras da Regueifa Plataforma adentráronse nas faldras do Monte Pedroso para filmar as músicas de Tomás Porteiro. O compostelán, alma máter de Sinestesia e guitarrista de Néboa, obsequiounos con tres temas inéditos do seu proxecto en solitario ("Deixalo ir", "Non vou coller" e "Victoria Abril"), ademáis dunha autoversión de Sinestesia ("Nunca máis") e unha adaptación de "Segunda división" dos seus admirados Ataque Escampe. Unhas pezas que se poderán desfrutar ao vivo este domingo, 12 de novembro, no auditorio de Cambados en formato trío.

A Regueifa Plataforma viaxou ata Lousame para chantar as súas cámaras e micrófonos na antiga fábrica de papel de Fontán, fundada a comezos do século XIX polo tío de Domingo Fontán, e rexistrar a sesión de Minguante. Nunhas ruínas máis axeitadas para os ecos dos trasnos e as bruxas que de Neil Young o dúo formado polo escritor Miguel Alonso e Óscar Martínez debullou catro temas do seu primeiro disco longo, "A incrible historia dos homes minguantes", publicado o pasado ano. 

Desta volta as cámaras d'A Regueifa Plataforma viaxaron ata A Estrada para filmar a Loita Amada, o proxecto liderado por Pablo Carracedo Jasper (Xenreira, Nao, A Matraca Perversa...) e Nébeda Piñeiro (Cantometrics) que comezou a súa andaina a finais do pasado ano. A carón da lareira familiar ecoou na pedra "Un anaco de min", unha das pezas máis emocionantes do seu primeiro disco, e unha moi persoal adaptación dunha das gravacións que fixo Alan Lomax no país hai setenta anos e levada, coma non podía ser doutro xeito a coordenadas revolucionarias. Loita Amada atópase agora mesmo a preparar o que será o seu segundo disco, un traballo que gravarán en terras vascas con Kaki Arkarazo aos controis e que verá a luz en 2024.

Desta volta as cámaras d'A Regueifa Plataforma viaxaron até Catoira para filmar a rachadora proposta electrónica de Músculo! manufacturada ao vivo. Facendo honor ao concepto detrás do seu novo disco, o propio Ulla, decidiron chantar na ribeira do río os seus sintetizadores, samplers e caixas de ritmos para esluír a paisaxe fluvial nas súas propias paisaxes electrónicas. Unha sesión para recordar onde os baixoulláns construíron unhas músicas ("As penas", "#anti#go" e "Ulla") que transformaron unha antiga fábrica de tixolos na perfecta pista de baile improvisada.

Navegamos ata a cerna da ría de Muros e Noia para filmar a arriscada mestura de pop, electrónica e tradi das noiesas Carabela nunha localización máis mariñeira imposible por teren sido paridoiro de dornas, bucetas, goletas e chalanas durante séculos. Décimo terceira entrega das Miudiño Sessions, de A Regueifa Plataforma 2.0, un proxecto non comercial de difusión da nosa cultura feito dende a paixón pola música e a lingua pero que tamén ten un certo propósito arquivístico.

Duodécima entrega das Miudiño Sessions, un proxecto non comercial de difusión da nosa cultura, feito dende a paixón pola música e a lingua pero que tamén ten un certo propósito arquivístico. Desta volta a sesión tivo lugar ao pé do castelo de Pambre, un dos poucos que non foron arrasados pola furia irmandiña, e foi protagonizada por O Portughés e Volk GZ, dándolle vida ao seu EP colaborativo Entre muros e montes.