En VINTE somos moi de montarnos películas e vimos nesta campaña unha auténtica ‘road movie’, na que un autobús que conduce un candidato percorre Galicia e parece que funciona, pero pincha unha ‘rueda’. Entón os pasaxeiros son recollidos por outro candidato que os leva moi amablemente. Ao final, o primeiro candidato volve coller o autobús, pero xa vai sen rumbo e acaba chocando. A banda sonora desta historia estaría composta por Juan Pardo, Village People e a Banda da Loba. 

Vaia por diante o noso recoñecemento á creatividade dos equipos de campaña das diferentes formacións políticas, que para estas eleccións galegas deixaron verdadeiras xoias audiovisuais persuasivas. 

Co obxectivo de decidir o voto dos galegos e as galegas os partidos afánanse na creación e difusión de vídeos de pequena duración cos que buscan impactar e convencer o electorado. 

Velaquí a nosa escolma desas creacións audiovisuais electorais feitas para este xa moi próximo 18 de febreiro.  

Comezamos coa música. En primeiro lugar, e sen máis preámbulos, cómpre dar paso a Gonzalo Pérez-Jácome , líder de Democracia Ourensana, que canta e baila ao ritmo dos Village People. O vídeo é dos máis virais da campaña, con 478.000 visualizacións só en Twitter. Sen palabras...

Alfonso Rueda, o candidato do PP, non se atreveu a bailar e cantar como Jácome, pero a súa formación tirou dun hit dos 80 para poñerlle música a esta campaña electoral. O PP facía a súa versión do “Xuntos”, de Juan Pardo, para disgusto da Familia Caamagno, que xa fixera a súa.

O BNG, pola súa parte, elaborou varias perlas audiovisuais para esta campaña e o videoclip coa canción “Fabricando luz”, da Banda da Loba, merece a nosa atención. Con case 200.000 visualizacións en Twitter, nesta peza podemos ver tamén bailando á candidata, Ana Pontón. 

Agora que xa temos a banda sonora desta película que é a campaña electoral podemos falar do argumento. Todo comezou cunha viaxe en autobús, que conducía Alfonso Rueda. O candidato publicou este vídeo polo Nadal. 

Mais pronto o autobús pincha unha roda. Afortunamente, aparece o candidato do PSdeG, José Ramón Gómez Besteiro, ao volante doutro vehículo, e rescata os pasaxeiros porque «Rueda de reposto non hai. Nin de coña hai Rueda». Besteiro conduce unha furgoneta onde soa “You're simple the best” e o camiño continúa.

Cando pensabamos xa que a road movie tiña un final aberto, á expensas do que aconteza o domingo, o BNG lanzou toda unha xoia audiovisual con aires de South Park e moita retranca. Na nosa película, Rueda volve coller o volante do autobús, mais quen dirixe é Feijóo, que consulta tamén con Isabel Díaz Ayuso. Alí soben os dirixentes de Vox, Jácome e mesmo Baltar, despois de que o pare a Garda Civil. Ese autobús circula sen rumbo e acaba chocando. Ao día seguinte da súa plublicación o vídeo xa se convertía no máis mirado da campaña, ao superar as 500.000 reproducións.

Nesta campaña sobre ‘ruedas’ tamén hai sitio para as novas emprendedoras, e así coñecemos da existencia de Transportes Lois, da man de Sumar Galicia, que moi amablemente facilita ‘A mudanza de Rueda’. No vídeo, un operario saca caixas de San Caetano e lévaas a unha furgoneta que conduce unha moi sorrinte Marta Lois.

Se tivésemos que elixir un servizo de cátering para a rodaxe desta película, o candidato máis axeitado para rexentalo sería, sen dúbida, Besteiro, que xa amosou a súa maña na cociña o día de Fin de Ano, cando compartiu unha receita de polo.

O candidato socialista tamén amosou que non lle dá mal aos postres e foi quen de facer orellas de Entroido, xunto a Salvador Illa, mentres falaba cos compañeiros de Ou Ké!

Tamén Alfonso Rueda animouse coa cociña nesta campaña, e meteu as mans en fariña para facer pan nun obradoiro de Boqueixón.

Os guionistas desta película puxeron especial énfase en dar a coñecer os protagonistas dun xeito máis persoal, nun afán de achegarse máis ao electorado. 

O BNG, por exemplo, gravou un 'Plano Secuencia' onde Ana Pontón responde a unha morea de cuestións de tipo persoal mentres camiña pola rúa.

Pontón tamén quixo achegar á cidadadía o seu sitio favorito de Chorente, o seu lugar de procedencia. 

A candidata de Sumar Galicia, Marta Lois, pola súa banda, explica nun vídeo en primeira persoa que existen 3.000 persoas co seu apelido e fai un pequeno balance da súa traxectoria nun vídeo de 40 segundos.

Baixo o título ‘Alfonso, a persoa detrás do presidente’, o equipo de campaña de Rueda montou un vídeo de case seis minutos no que participan familiares e amigos do candidato e no que coñecemos, por exemplo, que é impuntual.

E onde se desenvolve esta historia? Segundo o PP o lugar é a Illa de Estabilidade, un “sitio seguro onde a xente ten sentidiño”. Vídeo que, por certo, foi retirado pola Xunta Electoral por telo difundido en xaneiro, antes de que comezase a campaña e ter claro contido electoral.