Enrique Banet, Gonzalo Anaya e Ezequiel Méndez formaron hai 60 anos o Equipo 64 no contexto da Compostela universitaria. Xuntos asinaron varios documentais que se proxectan este mércores, día 2, e o vindeiro día 9, dentro do Festival Curtocircuíto, en Santiago.

«Daquela había que cortar a película con guillotina, lixala, e despois con acetona quedaba soldada». Enrique Banet rememora aqueles tempos, os dos seus comezos nisto do cinema, cando non había moita posibilidade de emenda nos erros mais existía moita autenticidade e naturalidade, segundo defende.

Enrique Banet, Gonzalo Anaya e Ezequiel Méndez formaron hai 60 anos o Equipo 64 no contexto da Compostela universitaria. Coñecéronse por frecuentaren o Cine-Club Universitario e xuntos asinaron varios documentais en 16 milímetros, que se van recuperar no Festival Curtocircuíto.

Concretamente, este mércores ás 20.30 horas, no Teatro Principal emitaranse O Camiño de Santiago (1964), Pórtico de Compostela (1965) e Malpica (1966). Ademais, o 9 de outubro ás 21:00 horas na Gentalha do Pichel aberá unha segunda quenda de proxeccións da obra do Equipo 64, con Compostela, Romeiros do Alén e Catro Prazas.

Nestes auténticos documentos históricos pode verse a sociedade de entón, as rúas e as persoas e elementos como a Cruz de Ferro, punto de referencia do Camiño francés, tal e como era en 1964. «Vese como era hai 60 anos, cando había peregrinos de verdade e non como está agora, que fixeron unha auténtica aberración. A xente agora escribe nas pedras», lamenta Banet.

Antes de marchar á Escola Oficial de Cinematografía de Madrid, Enrique Banet estudaba Farmacia, mais a súa afección pola imaxe levouno a formar parte parte do CAC (Centro Amateur de Cine). O realizador lembra que xa levaba tres anos facendo películas co CAC cando formou o Equipo 64 cos seus colegas Anaya e Méndez. «Co CAC fixera un dramón ambientado no Pedroso e moito riu a xente ao miralo. Estabamos aprendendo todos», conta o agora investigador e profesor da UNED. 

O Equipo 64 dirixiu varios documentais en 16 mm co patrocinio da Caixa de Aforros de Santiago e elaborou un guión titulado Castelao, que non chegou a producirse pola disolución do grupo, entre outros guións inéditos que están hoxe depositados na Filmoteca de Galicia.

«Isto está mal feito cos ollos de agora, pero convén coñecer de onde vimos», explica Banet, ao tempo que recorda aqueles tempos nos que percorreron o Camiño desde Roncesvalles, ou conseguiron montar un andamio –que era do cine Metropol- diante do Pórtico da Gloria. «Naquela época non había tantas restriccións. Hoxe sería complicadísimo. Antes os composteláns tiñamos acceso ás nosas cousas e agora semella que a cidade é dos turistas», lamenta.