Un podcast sobre música galega de xente inqueda (que non violenta!) e conversa pacífica presentado por Celia Eiras, Anxo Fariñas e Daniel Portela, coa colaboración de Nuno Pico e Berto Mira.
É complicado separar o que é ou non DIY en Galicia por ser a nosa unha cultura non hexemónica e sen apenas infraestrutura propia. Por iso, invitamos a dúas persoas que defenden e se senten identificadas co que é un xeito de facer as cousas: Adán Canda (Lamprea Explosiva) e Daniel Valcárcel (Aeronave Adolescente). Berto acompáñanos no estudio para unirse á conversa.
Quedou ben claro que nos gusta transitar as ambigüidades. É momento de abrir o gran caixón de xastre dos xéneros (e iso que hai moitos!): o pop. Por iso, invitamos a tres persoas que pouco teñen que ver entre elas —musicalmente falando—, pero que se gardan baixo este paraugas no que todo cabe: Mariagrep, Elba e Maiko Leinad.
Isto vai sobre rock: sobre se é principalmente unha cuestión de actitude, sobre se pode haber rock sen guitarras e, o máis importante, sobre se realmente segue vivo o rock. Conversamos con Isa Cea, vocalista e baixista en Triángulo de Amor Bizarro; Samuel González, vocalista e guitarrista en The Rapants, e Óscar Revillas, vocalista e baixista en Copa Turbo. E volve o noso colaborador Nuno Pico.
É momento de falar da música que só se experimenta unha vez. Sentamos con tres persoas que ben coñecen o que acontece no espazo nocturno galego: Russ, Juait e Crnds.
A Movida dos 80 opacou a imaxe da produción musical en Vigo durante décadas e a súa lembranza quedou arraigada como unha pantasma. Pero a alguén lle importa a Movida en 2023? Xuntámonos con Yago Guirado (Kings Of The Beach), Denis Carballás (The Riggos) e Tania Prieto (Dalsi) para demostrar que a actividade musical da cidade transcende aquel fenómeno. Tamén nos acompaña o noso colaborador Nuno Pico.
Reguetón, cumbia, bachata, merengue... e todo o que algunha vez bailamos nunha discoteca, unha orquestra ou na casa. Veñen ao estudio Adri, Héctor e Iván de Lontreira para explicarnos como elus incorporan estes sons aos seus temas. Tamén nos acompaña Berto, experto na materia.
Está o tradi de moda? Como se combina o folk con outros estilos? Cal é o rol da propiedade intelectual nas cancións populares? Acompáñanos no estudo Aitana Cuétara, responsable de Luneda Producións e a cooperativa cultural Nave de Lata, e O Rabelo, rapeire e autore do álbum Suor.
Isto é un podcast sobre música galega. E non calquera música: a dos novos anos vinte, que xa non son felices, senón violentos. Buscamos ser un espello do que está sucedendo ao noso carón: grupos tocando nos locais das nosas cidades e artistas novos creando música na súa habitación. Queremos habilitar un espazo aberto á conversa –sempre pacífica, malia que o título engane– arredor da escena musical galega. Presentado por Celia Eiras, Anxo Fariñas e Daniel Portela, e coa colaboración dos artistas Grande Amore e Berto.