Este xoves comeza a XII edición do Carballo Interplay, cunha completa programación ata o domingo 27 con grandes nomes como Andy Chichester, Facu Díaz, Miguel Maldonado ou Ana Polo e máis dunha ducia de proxecións de webseries de todo o mundo, destacando estreas como a da serie Mariliendre, do director galego Javier Ferreiro. 

O Carballo Interplay cumpre nesta edición doce anos como un evento de referencia en Galicia, o único dedicado a tratar desde a reflexión, a diversidade e a aprendizaxe as tendencias na rede e pioneiro na comunidade en crear un espazo de encontro físico entre as persoas que crean contido no dixital, especialmente entre a comunidade galega. 

Todas as actividades son de balde, aínda que para algúns shows foi necesario facer reserva de entrada. “Rajando con… Facu Díaz e Miguel Maldonado”, o CFA con Bob Pop ou o directo do podcast Keep it cutre atópanse, polo momento, sen prazas, pero hai oco noutras propostas. 

Se non tes tempo para gozar de todo o festival, aquí vai unha escolma de actividades que non podes perder. E lembra, moitas delas tamén estarán en streaming desde a canle de Youtube do Carballo Interplay! 

1. Kit de autodefensa dixital con FEMBLOC 

A finalidade deste obradoiro é visibilizar que son as violencias machistas dixitais e dar ferramentas para combatelas, a través dunha guía visual que ofrece recursos esenciais para afrontar as violencias machistas dixitais desde unha perspectiva feminista e de empoderamento. Porque o que pasa nas redes tamén é real, e ten un impacto fóra das nosas pantallas. 

Unha oportunidade para aprender a controlar a información que compartes, facer sexting seguro, ou crear contrasinais fortes dunha forma didáctica e fácil de comprender. 

Día: Xoves 24 

Hora: 10:30 

Lugar: Mercado de Carballo 

2. Estrea de Delirio Sketchs 

Os Delirio Sketchs son capítulos cun aire camp e trash de entre dez e quince minutos de duración, cargados de intensidade e humor febril, nos que se abordan desde o surrealismo e o delirio máis intelectualizado diferentes problemáticas que afectan a nosa sociedade. Diferentes xanelas de conflicto representadas por irreverentes sketchs cunha mistura de coreografías, cancións, reportaxes e momentos estelares de “famoseo underground galego” os sketchs funcionan como parte dun todo e son diferentes espellos, do caleidoscopio que é a nosa realidade. 

A serie gañou na pasada edición o premio a Mellor Produción e está dirixida por Bea Saiáns, quen presentará este traballo acompañada do elenco e equipo da serie. 

Día: Xoves 24 

Hora: 20:00 

Lugar: Mercado de Carballo 

3. O show de Non Saímos do Lixo

Se hai un fenómeno revelación na internet en Galicia nos últimos meses, son eles, prometido. O Show de NSDL é un laboratorio de comedia, stand up en galego que están a conquistar espazos máis alá da rede. Tras unha primeira época nos anos 2010-2012, Non Saímos do Lixo volveu en 2024 explorando novos formatos sen perder a gran dose de sátira política e humor que os caracteriza. 

Día: xoves 24 

Hora: 22:30 

Lugar: Axamonería, Carballo 

4. Coñecendo a… Andy Chichester

O Carballo Interplay é un espazo de encontro entre a comunidade dixital que crea contido en galego, tamén para a que está lonxe de Galicia. Andy Chichester chegará a Carballo desde Nova York para conversar co actor Federico Pérez, ao que coñeceu, como a moita outra xente de Galicia, a través das redes sociais. O seu compromiso coa nosa cultura, malia non ter ningún tipo de proximidade previa, é un dos temas dos que falarán. 

Día: Venres 25 

Hora: 19:00 

Lugar: Mercado de Carballo 

5. Zona Pro: Nin que fósemos O Faiadshhhh…

O Faiado é un proxecto creado en 2023 por estudantes de xornalismo e comunicación audiovisual, para comentar a actualidade sobre a cultura pop, galega e internacional, así como comentar tendencias, reflexionar e, sobre todo, botar unhas boas risas. O fenómeno do momento dos podcast en galego, que chega a Carballo por primeira vez en directo despois de gañar, na pasada edición, o premio a Mellor Canle. 

Ademáis esta actividade é unha previa perfecta á estrea da serie Mariliendre, xa que pasarán polos seus micros o seu director Javier Ferreiro e a actriz Blanca Martínez. 

Día: Venres 25 

Hora: 13:00 

Lugar: Mercado de Carballo 

6 'Abajo el trabajo!' con Juana Dolores, Christo Casas e Puto Mikel 

Este panel xuntará  a Juana Dolores, Christo Casas e Puto Mikel, tres pensadoras e creadoras anticapitalistas especialistas en eidos tan diversos coma o xornalismo, a arqueoloxía ou as artes dramáticas para falar da hiperprodutividade e a autoesixencia dentro do mundo da creación de contidos. 

Os medios de comunicación e os espazos culturais sempre están a pedir novos produtos, facendo que moitas creadoras vivan con frustración a incongruencia de facer discurso en torno ás críticas ao capitalismo e á hiperproductividade mentres son as súas peores xefas. Pódese vivir da creación sen autoexplotarse? As nosas mellores horas do día -e da vida- ocúpaas o traballo? 

Día: Sábado 26 

Hora: 11:00 

Lugar: Mercado de Carballo 

7. Comunicar na diversidade, con Chaimaa Boukharsa, Lucía Mbomío, Voria Stefanovsky e “Guru” Jiménez 

Con un internet cada vez más hostil e un aumento do movemento reaccionario de ultradereitas, misóxino e racista, é máis importante que nunca comunicar na diversidade. Por iso contaremos con algunhas das creadoras e comunicadoras máis relevantes que hai neste momento na loita antirracista e contra a xitanofobia como Chaimaa Boukharsa, Lucía Mbomío, Voria Stefanovsky e “Guru” Jiménez. Queremos escoitalas e saber cómo axudar a mellorar os espazos de debate, como educar dun xeito igualitario e corrixir os nosos prexuizos. 

Día: Sábado 26 

Hora: 12:30 

Lugar: Mercado de Carballo 

8. 'Aquí no hay quien viva', con Ana Polo 

Dos creadores de 'El Precio Justo' chega 'Aquí no hay quien viva', o concurso de adiviñar o prezo dos pisos de alugueiro. A cómica catalana Ana Polo fará unha selección do mellor dos portais inmobiliarios para xogar todos xuntos a adiviñar o seu prezo (con total seguridade abusivo) dos últimos zulos dispoñibles. O vello truco de risa para non chorar ante a adversidade, esta vez en versión comunitaria (e con convidados sorpresa!) 

Para asistir tes que reservar a entrada aquí. 

Día: Sábado 26 

Hora: 22:30 

Lugar: Mercado de Carballo 

9. O lugar onde descubrir o talento dixital galego 

O Carballo Interplay é o fogar dos creadores dixitais en galego, pero tamén o espazo onde teñen que lucir os seus proxectos. No pitching de Produción de Contido Dixital en Galego os proxectos finalistas terán 10 minutos para defender a súa idea e lograr un premio de 3.000 euros para facela realidade. 

Os proxectos finalistas son Epidemia Invisible, de Román Varela, un proxecto multiformato que propón unha inmersión honesta e sensible na realidade da saúde mental en Galicia, combinando o formato principal dunha serie documental con pezas complementarias en formato videoblog ou reel; Escóitasme?, unha webserie de ficción do alumnado de 4º da ESO do instituto IES Arcebispo Xelmírez I de Santiago de Compostela; Artistas en Reserva, webserie de Martín Castro que segue a un grupo de mozos artistas que tentan abrirse paso no panorama actual das súas respectivas disciplinas; 90 e pico, unha webserie de comedia da Asociación Xuvenil Mómaro e Señoras con Recursos, unha webserie que é crítica feminista aos roles de xénero clásicos e xa caducos do sistema laboral, en clave de comedia disparatada, creada por Silvia Lorenzo e Paloma Otero. 

Día: Xoves 24 

Hora: 17:00 

Lugar: Mercado de Carballo 

Por outra banda, os finalistas aos premios de creación de contido dixital en galego, tanto a Mellor Canle, como a Mellor Creador/a terán que demostrar as virtudes dos seus proxectos noutro pitching, ante un xurado formado por Marta Pérez (docente na área de Comunicación Audiovisual e Publicidade da USC), Andrea Villa (codirectora do festival e programadora de actividades), Andy Chichester (filólogo, docente e xerador de contidos) e María Rúa (gañadora do premio na pasada edición na categoría de creación). 

Os finalistas na categoría de Mellor Canle son Rebelico Revista, un proxecto que presente a cultura tradicional galega dun xeito divertido e actual xa que o obxectivo principal é achegar a tradición galega á sociedade para romper estereotipos e poñela en valor; Descifrando a Historia, un proxecto de divulgación sobre historia de Galicia que conta con un podcast e xera contido en redes sociais como Instagram e Tik Tok; Galego para Peques, un proxecto audiovisual pensado para estender o uso do galego na infancia e o podcast Um Tee com Nee, podcast, no que Nee, unha persoa de xénero non binario, recolle o cambio da súa voz co tratamento hormonal de testosterona. Así, cada episodio relaciona a sua transición de xénero con outra transición cultural, de diversos pobos ao redor do mundo. 

Na categoría de Mellor Creadora son finalistas tres perfiles que usan Tik Tok como a súa principal rede para crear contido. Konachadas, unha conta de temas moi variados, pero sempre con un trasfondo activista. A súa creadora descríbeo como “retranca consciente”. A tiktoker Sara Seco, coñecida polos seus vlogs nos que narra o seu día día e outros contidos de beleza e lifestyle e Patri Otero, creadora que denuncia aquelas actitudes ou condutas que van en contra dos seus principios e valores. Tamén intenta darlle visibilidade a temáticas que están máis silenciadas e, sobre todo, facer reflexionar a aquelas persoan que consomen o seu contido. 

Día: Venres 25 

Hora: 16:00 

Lugar: Mercado de Carballo 

10.Unha Sección Oficial de series para todos os gustos 

Vinte propostas de ata 12 países cunha a gran variedad de xénero, estilos e temáticas chegan a esta edición do Carballo Interplay. As proxecións dividiranse en bloques para gozalas ao longo do festival e o Xurado Oficial do certame (formado por Bob Pop, Albanta San Román e Jorge Boquete) determinará as gañadoras, que se anunciarán no Mercado de Carballo o domingo 27 ás 12:30, na gala presentada por Belén Puime e Miguel Canalejo. 

Toda a info sobre as series e horarios das proxecións aquí