En pouco máis de dous meses Pontevedra acollerá por terceiro ano consecutivo a gran gala de entrega dos Premios Feroz, pero nas últimas semanas a cidade xa está a desenvolver unha coidada programación previa, con proxeccións na facultade de Comunicación abertas a toda a cidadanía. Outubro foi o momento para os maratóns de series premiadas e neste mes de novembro chega o ciclo 'Rompendo o Canon', con películas de directoras que sitúan a muller no centro e enfoques que desafían estereotipos e convencionalismos.
 

Pontevedra é feroz e xa van tres anos. Os bos resultados das dúas primeiras edicións tanto para o Concello de Pontevedra como para a Asociación de Informadores cinematográficos de España propiciaron esta edición extra dos Premios Feroz 2027 en Pontevedra. O 23 de xaneiro será a gala de entrega dos galardóns pero o guión desta película (de amor) prevé antes moitas citas na boa vila. As actividades previas xa están a decorrer en forma de proxeccións cinematográficas na Facultade de Comunicación. “Sinceramente, a min no primeiro ciclo sorprendeume a cantidade de xente que foi”, explica Paulino Pérez, vicedecano de Comunicación da Facultade Comunicación de Pontevedra, que aínda que detalla que non se chegou aos niveis do ano pasado, está gratamente sorprendido pola resposta dun público que quixo pasar, por exemplo, catro horas a ver a primeira temporada de Vida Perfecta no campus un 10 de outubro, cun coloquio coa protagonista, Celia Freijeiro, incluído. 

“Paréceme que é un éxito e felicito aos Feroz e ao Concello de Pontevedra por querer contar con nós”, afirma o profesor universitario, que subliña que estes pases supoñen tamén un achegamento da propia facultade á cidadanía. “Aos que lles gusta o cinema descobren que a facultade non está tan lonxe, é cruzar o río, que non é como río Limia, o río do esquecemento”, chancea.

O maratón de series e coloquios seguiu cos títulos Autodefensa (Berta Prieto), Paquita Salas, dos Javis – que se converteu nun show con algunhas persoas disfrazadas-, Fácil (creada por Anna R. Costa, cun coloquio coa actriz Coria Castillo) e Cardo, que trouxo a Pontevedra ás súas creadoras, Ana Rujas e Claudia Costafreda. 

“Paréceme que é un éxito e felicito aos Feroz e ao Concello de Pontevedra por querer contar con nós”, afirma o Paulino Pérez, vicedecano de Comunicación, que subliña que estes pases supoñen tamén un achegamento da propia facultade á cidadanía. “Aos que lles gusta o cinema descobren que a facultade non está tan lonxe"

“As series, ao velas en maratón, como que tamén cambian. Hai dúas formas de ver as series: un capítulo á semana, como na televisión tradicional e outra forma é velas como unha película, e as lecturas son distintas. Iso sempre é interesante”, explica Fernando de Luis- Orueta, un dos produtores executivos dos Feroz e director da gala. 

Os Premios Feroz nacen no seo da Asociación de Informadores Cinematográficos de España e, á diferencia dos Premios Goya, recoñecen tamén ás series de televisión ou plataformas de contidos en diferentes categorías. “En xeral o que pasa é que moitos compañeiros informan tanto de cinema como de series, sen distinguir. Entón, para nós, xurdiu dunha forma moi natural incorporar as series como premios dentro da nosa organización”, asegura.

  “En xeral o que pasa é que moitos compañeiros informan tanto de cinema como de series, sen distinguir. Entón, para nós, xurdiu dunha forma moi natural incorporar as series como premios dentro da nosa organización”, indica Fernando de Luis- Orueta, un dos produtores executivos dos Feroz e director da gala

O produtor explica que as series pasaron de ser produtos de segunda, como un aparcadoiro para as estrelas do cinema a ser un auténtico invernadoiro, de onde saen moitas das grandes figuras do cinema actual. “Creo que en tempos modernos, sobre todo coas plataformas, pero non só, as series ocuparon un espazo equivalente ao do cinema. É unha discusión que queda para tempos pasados e non ten ningún sentido facer de menos ás series, senón todo o contrario”, detalla Fernando de Luis.

Tras as series, é o momento das películas. Un selección de catro títulos configuran o segundo ciclo de proxeccións previas que se poden ver na Facultade de Comunicación, baixo o lema Rompendo o canon: Cerdita, de Carlota Pereda (6 de novembro), Creatura, de Elena Martín, (9 de novembro), O Corno, de Jaione Camborda (20 de novembro) e Destello Bravío, de Ainhoa Rodríguez (23 de novembro). Desde a organización sinalan que se trata de películas creadas por mulleres que acaban cos estereotipos da vítima perfecta, a boa nai ou a muller compracente a través do thriller, o terror ou o  esperpento. “Nós compartimos co Concello de Pontevedra unha gran sensibilidade en torno ás celebracións de novembro, á loita pola igualdade da muller. A loita feminista está no noso ADN e desde a primeira edición coincidimos, igual que o Concello fai outras actividades en torno a esta cuestión, pois nós tamén nos sumamos”, apunta o produtor e director da gala dos Premios Feroz. Todas as proxeccións rematan cun coloquio coas creadoras.

As entradas para todas as sesións son gratuítas, pero hai que retirar o convite na Oficina de Turismo da Praza de España de Pontevedra, desde sete días antes da actividade. Tamén vos podedes anotar na web https://apuntate.pontevedra.gal

Por outra banda, cómpre apuntar na axenda das actividades previas dos Feroz a visita de Clara Bilbao, gañadora de tres Goyas e cunha traxectoria de máis de 30 anos no deseño e vestiario. O luns ,16, Impartirá unha clase maxistral sobre o oficio de figurinista en colaboración co máster en Dirección Creativa e Deseño en Moda que se imparte en Pontevedra. Será na facultade de Deseño.

Para premiar a  fidelidade na asistencia a estas actividades previas o Concello de Pontevedra puxo en marcha o Pasaporte Feroz, que permitirá asistir á cea oficial ou á bancada VIP o 23 de xaneiro

Para premiar a  fidelidade na asistencia a estas actividades previas o Concello de Pontevedra puxo en marcha o Pasaporte Feroz, unha iniciativa para “recoñecer e agradecer a participación constante” nas proxeccións, segundo din desde o propio Concello.  Os pasaportes comezaron a se repartir o pasado día 6, coincidindo coa proxección de Cerdita e funcionan cun sistema de selado por cada actividade á que se asista. Anabel Gulías, concelleira de Promoción da cidade pon en valor “a resposta e implicación do público pontevedrés” netas actividades previas que considera “un feito diferencial e o verdadeiro segredo do éxito da celebración dos premios na cidade”. Os premios do “pasaporte Feroz” consisten en 10 pases dobres para a cea oficial dos Premios Feroz para as dez persoas que máis selos teñan acumulados. E 10 pases dobres para a bancada VIP que se instalará na gala no Pazo da Cultura para as dez persoas seguintes con maior número de selos.

Participación do alumnado, futuros organizadores

Ademais de acoller e promocionar estas actividades previas dos Premios Feroz en Pontevedra, a Facultade de Comunicación está a ultimar a ampliación do convenio que permite ao alumnado de Comunicación Audiovisual e de Publicidade e Relacións Públicas poida  participar como persoal voluntario nos días previos e durante a gala prevista para o 23 de xaneiro do Pazo da Cultura.

O alumnado de Comunicación, voluntario para a gala de xaneiro: “Está claro que dentro duns anos serán moitos deles os que organicen este tipo de actos e eventos”

“É unha forma de coñecer como se organiza un evento deste tipo desde dentro e unha forma de poñer en valor tanto o que eles saben como o que está a facer neste caso a organización dos Feroz e o Concello de Pontevedra”, destaca Paulino Pérez. “Está claro que dentro duns anos serán moitos deles os que organicen este tipo de actos e eventos”, acrecenta. En concreto, a rapazada colaborará nos departamentos de comunicación, prensa, vídeo e comunicación audiovisual, así como en temas de relacións públicas . “Isto vai en función das necesidades que teñan os Feroz. O ano pasado funcionou moi ben. Todos quedamos moi contentos, polo que supoño que seguiremos pola mesma liña”, conclúe o vicedecano de Comunicación da Facultade de Comunicación.

As actividades previas dos Premios Feroz en Pontevedra continuarán nas vindeiras semanas con aínda máis proxeccións e propostas para a cidadanía, unha vez se coñezan as persoas e proxectos culturais nomeados nesta edición 2027.