A nena dos ollos “vivitos”. Bibí Bouza xa non é unha nena, pero conserva eses ollos tan vivos, a curiosidade e a ilusión en cada proxecto no que se embarca. O seu nome está ligado ao voleibol de sempre en Lugo. Di a presidenta e fundadora do Club voleibol Emevé de Lugo que o alcume dos ollos pode explicar como a chaman desde cativa, aínda que sexa só a nivel fonético, porque o seu nome en realidade é Mª Concepción Bouza Betríu. “Sempre andaba cotilleando todo de pequena, cos ollos moi abertos e vivos”, conta. Outra explicación podería vir das iniciais dos seus apelidos, pero isto non lle acaba de convencer a Bibí.

Era a pequena de seis irmáns “argalleiros por natureza”e iso marca. Ata os cinco anos os veráns pasaban en Oliana (Lleida), a terra da súa nai, mais Bibí Bouza lembra con detalle Ortigueira, orixe do seu pai, e lugar dos xogos infinitos da nenez. “Todo era estar fóra e xogar ao hóckey sobre herba, vólei, béisbol, faciamos deportes moi diferentes, casas nas árbores… eramos unha familia moi unida”, explica.

Como adoita ocorrer, as pequenas seguen o exemplo das maiores, e con dúas irmás xogando ao voleibol, Bibí Bouza tamén probou en oitavo de EXB, no pavillón da OJE da rúa San Marcos, con Paco Labandeira como adestrador.  Logo xa no instituto comezou coas súas compañeiras do INB Lugo (Instituto Nacional de Bacharelato) con Alfredo Porto á fronte ata que se incorporou a súa irmá Ana, que fixera INEF en Madrid e foi adestradora do xuvenil. 

O tempo foi pasando e Bibí Bouza converteuse en sénior, chegaban os anos 80, compartía equipo coas súas irmás Coté e Ana (que viñan de xogar no Riego de Vigo) e mais Quico, que era o adestrador. Foi entón (en 1981) cando nacía o club Emevé. “A idea partiu do meu pai, pero o nome foi idea da miña irmá Coté e significa El Mejor Equipo de Voleibol de España”, detalla. E o nome do club cobrou todo o sentido en xuño de 2005, cando quedaron campioas de España en categoría infantil en Planes, segundo subliña Bouza.

O club nacía co equipo feminino sénior pero a cousa foi medrando e pronto se incorporou a sección masculina. Agora mesmo teñen tres equipos en categoría nacional, 13 equipos en competición autonómica e 32 equipos na liga escolar. En total hai unhas 530 persoas no club, entre xogadoras, xogadores e persoal técnico. “En Lugo o voleibol hai tempo que deixou de ser un deporte minoritario”, relata Bouza, ao tempo que puntualiza que ata teñen unha lista de espera con 40 nenas e nenos para incorporarse aos equipos. “O feito de non ter ningún roce co equipo contrario faino moi limpo e iso é moi valorado polos pais. Ti es a miña rival pero non tes que ser a miña inimiga. En Lugo funciona moi ben o boca a boca e nós somos un club moi querido”, relata.

“O feito de non ter ningún roce co equipo contrario faino moi limpo e iso é moi valorado polos pais. Ti es a miña rival pero non tes que ser a miña inimiga. En Lugo funciona moi ben o boca a boca e nós somos un club moi querido”, relata Bibí Bouza

Ata o ano pasado o durante seis temporadas o Arenal Emevé foi o único club de España co equipo masculino e feminino na máxima categoría, na Súper Liga 1. Nesta temporada as mulleres seguen na elite, na Liga Iberdrola, e os homes xogan na Superliga 2. 

Hai tres anos no club puxeron en marcha tamén o proxecto Academia Arenal, que comezou con xogadoras galegas e logo se abriu a todo o Estado “como fai o Barça”, chancea Bouza. Rapazas de Vigo, Estremadura, Asturias ou Murcia forman parte desta iniciativa. Estudan bacharelato en Lugo e adestran coa súa categoría e superiores. “No terceiro ano xa recollemos o froito e unha xogadora xa se incorporou ao equipo de Superliga”, explica, orgullosa, Bouza. 

Socia fundadora do Club Voleibol Arenal Emevé, Bibí Bouza é a única persoa que permanece na entidade desde a súa creación. Como xogadora estivo a dar guerra ata os 51 anos. “Seguía porque as miñas compañeiras estaban aí. Levabamos ao voleibol na alma”, di. E desde 2014 exerce como presidenta do club. 

Bouza resalta que no seu club se defende o galego e a paridade “de verdade”. Cada vez hai máis nenos a xogar ao voleibol, aínda que a porcentaxe maioritaria é feminina, con diferenza. “Din que o vólei é un dos deportes mellor asimilados polas mulleres. E o certo que é un deporte moi técnico e as mulleres somos moi metódicas. O voleibol feminino é moi vistoso”, argumenta Bouza. 

"Necesitamos que veñan animarmos ao pavillón municipal de Lugo”, defende a presidenta do Emevé

Xa pasando os 60 anos e xubilada como profesora de inglés, Bibí Bouza goza do seu labor á fronte do club, onde está “moi ben acompañada” polo resto dos membros da directiva e non ten tempo para se aburrir. “Levo as relacións institucionais e tamén fago moito traballo de documentación para solicitar as subvención e esas cousas. Ademais, como teño a titulación de adestradora, estou a disposición do club para botar unha man se falta algún adestrador”, detalla. “A carencia que temos é que nos custa levar a xente aos partidos. Necesitamos que veñan animarmos ao pavillón municipal de Lugo”, defende a presidenta do Emevé.