Presentamos en exclusiva o trailer de O coidado, segunda curtametraxe como director e guionista de Miguel Canalejo, a quen coñecemos como actor en series e programas de televisión e tamén na dirección da web serie Clara Cortés ou como protagonista e guionista de Xan, webserie dirixida por Lucía Estévez. 

O coidado é un conto arredor da irrupción das intelixencias artificiais nas nosas vidas e o seu efecto nas relacións interpersonais. É unha historia que fala da vulnerabilidade dos nosos maiores, da dificultade de deixarse coidar e das distancias que a masculinidade normativa xera entre pais e fillos. 

O proxecto naceu no Obradoiro de escrita de guión no FicBueu 2021 e recibiu a Axuda de promoción de talento da AGADIC no 2022. No reparto temos a Tatán R. Cunha, Alejandro Jato, Gemma do Carmo, Gloria Marín, Santi Cuquejo e Xoán Fórneas. A súa estrea está prevista nas vindeiras semanas.