Estreamos unha nova sección: OBSESIÓNS, na que queremos que distintas persoas compartan connosco as teimas pop que máis as obsesionan ultimamente. Comezamos polo actor coruñés Miguel Canalejo, a quen coñeceredes polas series Serramoura ou Cuéntame. En breve verémolo como o silente protagonista dunha webserie: Xan.
“As personas non deixan de xogar porque envellecen. Envellecen porque deixan de xogar.” (Oliver Wendell Holmes Senior, médico e poeta)
“Escápate conmigo esta noche bebé.” (Wisin, cantante de reaggeton.)
As salas de escape ou “Escape Rooms” son unha alternativa de ocio coa que estou obsesionado. Os locais deste estilo chegaron a Galicia hai poucos anos. O que propoñen é moi sinxelo: Unha sala misteriosa chea de enigmas, sesenta minutos no reloxo e un equipo de dúas a seis persoas. O obxectivo? Resolver os enigmas para escapar da habitación antes de que o reloxo chegue a cero (sen matar os teus amigos, a poder ser).
Xeralmente estas salas teñen unha historia de fondo: pode ser que esteas escapando do cárcere ou roubando un banco. A última na que estiven estaba ambientada no cuarto dun rapaz atormentado por un pallaso psicópata. Tiñamos que recuperar un xoguete e escapar da casa. Conseguímolo pero non sen levar máis dun susto.
Se cadra botar unha hora encerrado nun cuarto non é o concepto de diversión que ten a maioría da xente (aínda menos se hai un empregado vestido de pallaso agardando por ti detrás de cada porta). Sen embargo, eu son un namorado dos xogos de lóxica. E a subida de adrenalina que sentes ao resolver un misterio coas túas amizades paga a pena.
Sobre todo se ti es o que saca o derradeiro enigma. Traballo en equipo si, pero o ego tamén está aí.
