Para esta entrega Café Derby 21 foi ao Intersección, o festival de cine internacional da Coruña, para falar co cineasta, animador e artista visual David Fidalgo, que está tendo unha feliz temporada de festivais e premios con 'Sandwich Cat'.

Fidalgo é unha das iconas actuais en Galicia sobre o humor absurdo e existencial que toca nos límites coas bágoas, por iso foi o momento perfecto para falar sobre a tristeza. Pero ao contrario do que pode parecer, nada ou case nada neste programa é motivo de choros.

Xunto a David Fidalgo repasamos animación de adultos, momentos traumáticos na ficción, mortes e penurias varias nas series de televisión como en 'Médico de familia', os memes ou a nosa relación co humor negro.

Pero antes de falar con el, contamos cunha sección Intersección, unha conversa curta con dous dos talentos galegos que formaron parte do festival: Breogán Xague e Sabela Eiriz.