Este mércores bota a andar a serie podcast Vinte de Foliada, cuxa primeira parada é A Coruña. Alí descubrimos as Foliadas de Elviña, nun contexto urbano e con décadas de historia, onde a festa máis tradicional está moi viva e dela participan todas as semanas persoas de todas as idades. Neste primeiro episodio de Vinte de Foliada achegámonos tamén á asociación cultural Donaire e falamos con alumnas e mestras de pandeireta ou baile: “A xente quere aprender a tocar ou a bailar para pasalo ben, para chegar á foliada e remexerse con xeito”, e cada día son máis.

“Un mércores calquera do verán, en plenas vacacións e coas facultades pechadas, o son das pandeiretas, as gaitas e o canto mestúranse co balbordo do bar. Neste pequeno recuncho de Castro de Elviña, ao pé do campus universitario, unha multitude enche as mesas mentres sae o churrasco...” Así comeza o primeiro episodio da serie podcast Vinte de Foliada que desde este mércores, 29 de outubro, xa se pode escoitar na web e nas redes sociais de VINTE, en Ivoox , en Spotify e en breve, tamén, en Apple Podcast e Podgalego.

Neste primeiro episodio o xornalista Miguel Pardo achegouse a unha das foliadas de Elviña, onde desde hai décadas centos de persoas se xuntan para tocar e bailar ou para gozar desde a terraza dunha festa improvisada que naceu e se mantén grazas ao impulso da asociación Tempo Novo e onde se dan cita membros de moitos outros colectivos que terman do tradi na cidade. Nesta praza xúntanse pais e nais cos fillos, grupos de amigos, veciñanza de toda a vida e xente chegada da cidade ou doutras localidades próximas. É un lugar cada vez máis concorrido e máis idóneo, froito da loita veciñal, de Tempo Novo e do club Relámpago de Elviña para dotar de servizos e boas comunicacións o espazo que tamén lles serve de sede.

Gozan da música nun espazo onde, canda o colectivo anfitrión, coinciden integrantes doutras das moitas e importantes asociacións de música tradicional da cidade. De Xacarandaina, de Donaire ou de Son d’Aquí, entre outra. No mesmo sitio onde naceu a banda de gaitas Os Rexumeiros de Elviña, con Bieito Romero, o actual líder de Luar na Lubre, como alma máter.

Neste episodio escoitaremos as voces de Antonio Prado, Bailador e percusionista. Profesor en Donaire, membro de Xosé Lois Romero & Aliboria e colaborador con Berrogüetto, Os Viqueiras, Moura ou Samarúas. Tamén contamos coa participación de Tania Caamaño, música investigadora e membro da banda de Budiño ou de Pan sen Fron, que nos fala de como en Elviña se tece a comunidade. Nesta histórica foliada atopamos tamén a Brais Maceiras, acordeonista de Luar na Lubre, que como veciño de Elviña e membro dende hai ben anos de Tempo Novo, fai memoria e explica as orixes destes encontros.

Pero para participar na foliada cómpre aprender a tocar a pandeireta, a gaita ou bailar, claro, e diso saben moito na asociación cultural Donaire, por onde pasan cada semana unhas 1.200 persoas. Aquí falamos con Bea, a profesora, e varias das súas alumnas… e da conversa coa pandeireta na man xorden varias ideas… A xente quere aprender a tocar ou a bailar para pasalo ben, para chegar á foliada e remexerse con xeito. E ao carón das destrezas para tocar, cantar e bailar sempre está o galego. Con naturalidade, aquí non se fala do galego, pero fálase moito en galego. O idioma e a cultura como causa e consecuencia, fluíndo entre coplas e compases. 

Vinte de Foliada é unha produción da Fundación Praza Pública para VINTE coa colaboración da Secretaría Xeral da Lingua, Consellería de Cultura, Lingua e Xuventude da Xunta de Galicia. 

Na redacción, produción e locución deste episodio estiveron Miguel Pardo, Ana Liste, Vanesa Vázquez e David Lombao.