Transportes públicos que funcionan, a aldraxe con “Terra” no Benidorm Fest, casorios con famosos, hamburguesas, políticos facendo cousas e revolucións tecnolóxicas. Os soños deste ano saíron tan variados coma ocorrentes.
Traémosvos unha escolma de 50 chíos escollidos entre máis dun milleiro, pois como xa vén sendo tradición buscamos en Twitter “soñei que” para gozar con esas aventuras que nos permite vivir o subconsciente mentres durmimos.
Como podedes observar no gráfico de aquí abaixo, non se volveu vivir un momento de concentración de soños en Twitter como o do período do confinamento do ano 2020, mais o ritmo co que compartimos estas experiencias que suceden no espazo-tempo do subconsciente non decae e este 2022 superamos os mil cen chíos sobre soños en galego a falta duns días para rematar o ano.
Entre os protagonistas dos soños neste ano está o novo presidente da Xunta, Alfonso Rueda, e mais outros políticos como a vicepresidenta segunda do Goberno de España, Yolanda Díaz. Hai trapeiros como Yung Beef e Bizarrap ou xogadores de fútbol como Iago Aspas do Celta. Ortiga tamén apareceu no subconsciente de varias persoas, así como Kanye Westou Laura Pausini.