Os Feroz abren as portas do glamour á veciñanza de Pontevedra

Ofrecido por

Fer Fraga, Tamar Novás e Judith Fernández, do equipo de 'Rondallas', co público de Pontevedra na pasada edición dos Premios Feroz. CC-BY-SA Premios Feroz/Manuel Fernández Valdés

Os Premios Feroz recuncan por terceira vez en Pontevedra, nunha sorte de edición “extra” que ninguén planeaba pero todos desexaban. Nestes días estamos a coñecer xa as persoas e proxectos cinematográficos preseleccionados, que optarán aos galardóns do 23 de xaneiro no recinto feiral. Alí, e por primeira vez desde que comezou esta estadía dos premios en Pontevedra, haberá sitio tamén para a veciñanza. Arredor de 800 persoas poderán gozar deste evento cheo de glamour desde ao interior, nunhas bancadas colocadas ex profeso no espazo. “Isto complica todo por temas de seguridade e demais, pero cremos que paga a pena. Non queriamos só tripitir, queriamos evolucionar”, asegura Anabel concelleira de Promoción da Cidade.

 

Entre 700 e 800 persoas da veciñanza de Pontevedra poderán vivir desde dentro a gala de entrega da 14ª edición dos Premios Feroz, que se celebrará no recinto feiral o 23 de xaneiro. “Cando falamos da organización deste terceiro ano, case diría que esa foi a razón de ser do acordo”, detalla en conversa con VINTE Fernando de Luis- Orueta, un dos produtores executivos dos Feroz e director da gala dos premios Feroz, que organiza a Asociación de Informadores Cinematográficos de España (AICE). 

“Tanto o Concello coma nós sentiamos que houbera unha gran simbiose coa cidade, unha extraordinaria acollida nos dous anos anteriores. As actividades previas funcionaran moi ben e a xente respondeu acudindo á proxección da gala do auditorio, onde se achegaban os premiados a saudar e sentiamos que quedara un pasiño por dar, que era que o público puidese acceder á gala”, relata Fernando de Luis. 

Imaxe xeral da gala da pasada edición dos Premios Feroz en Pontevedra. CC-BY-SA Premios Feroz/Alberto Rodríguez Roldán

Na pasada edición o Concello habilitara 900 entradas para que o público pontevedrés vivise a festa do cinema desde o auditorio Pazo da Cultura que facilitou e moito o achegamento das celebridades á cidadanía. Ademais de sortear dez entradas dobres para a gala. Pero neste ano sobe a aposta coa colocación de bancadas dentro do recinto feiral que permitirán ver en directo, de preto e de balde o evento. 

O número exacto de localidades aínda está por definirse debido aos protocolos de seguridade e evacuación, pero a cifra roldará as 800 persoas. Desde o Concello detallan que están a concretar tamén o procedemento para o reparto. A recollida será na caseta de Turismo, como adoitan facer habitualmente, pero valoran poñer unha parte das entradas tamén online. 

“Por primeira vez haberá bancadas para que a xente de Pontevedra poida asistir de balde. Podiamos repetir a fórmula anterior e todo sería máis sinxelo, pero non só queriamos tripitir, queriamos evolucionar. É unha complicación que aceptamos con gusto”, detalla Anabel Gulías, concelleira de Promoción da Cidade. O obxectivo é "dar un paso máis para que a xente sexa partícipe do evento, xa que o éxito destas edicións radica na implicación da veciñanza de Pontevedra", acrecenta Gulías.

A concelleira de Promoción da Cidade de Pontevedra, Anabel Gulías, amosa o Pasaporte Feroz. CC-BY-SA Concello de Pontevedra

As estas persoas sumaranse as 20 máis fieis ás actividades previas e que, polo tanto, teñan máis selos no seu Pasaporte Feroz. Esta fidelidades será premiada co acceso á cea oficial da gala ou acceso directo á bancada VIP. Este venres, 20 de novembro,  a programación do ciclo Rompendo o Canon, dentro das actividades previas, ofrece a posibilidade de ver a película galega O Corno, na Facultade de Comunicación con entrada de balde, e coloquio posterior coa directora Jaione Camborda.

Desde a AICE din estar “moi ilusionados” con que este ano haxa público na gala de entrega sobre todo polo ambiente e a calor que se xera. “Os nomeados que está alí sentados moi nerviosos porque é un día moi importante para eles, pero notan a ilusión do público, que se contaxia e iso é precioso. Xérase unha atmosfera incrible”, explica Fernando de Luis- Orueta.

Na primavera de 2024, cando se fixo público que os galardóns, considerados a antesala dos Premios Goya, recalarían en Pontevedra por dous anos, o alcalde salientaba que un evento así transcende a cidade e abundaría no obxectivo da desestacionalización ao unir cultura e turismo. E os resultados destes dous anos danlle a razón. No balance feito a finais de xaneiro deste ano, referido á segunda edición, Miguel Anxo Fernández Lores e a voceira dos hoteleiros de Pontevedra, Cecilia Sierra, falaban de que a ocupación hoteleira foi do 95% xa desde as semanas previas ao evento de xaneiro. Ademais, a gala de 2026, retransmitida en directo pola RTVE, tivo un seguimento de 2,5 millóns de espectadores únicos e unha audiencia media de 438.000 espectadores, o que supón un 4,4% de cota de pantalla. Ao presentar o datos o director de produción dos Premios Feroz, David Carrón, subliñou que esta cifra é “moi superior ao que adoita ter un sábado pola noite coa súa programación habitual”. 

A gala de 2026, retransmitida en directo pola RTVE, tivo un seguimento de 2,5 millóns de espectadores únicos e unha audiencia media de 438.000 espectadores, "unha cifra moi superiro a que adoita ter coa súa programación habitural", segundo o director de produción dos Premios Feroz

A aposta polos grandes eventos está dentro da estratexia do Concello dentro da área de Promoción da Cidade pero estivera ata o momento máis vinculada a fitos deportivos como o Mundial de Tríatlon, segundo explica Anabel Gulías. “Queríamos probar coa área de Cultura, pero con dúas premisas: non podiamos facer un investimento tan grande para un evento de un só día e tería que servir tamén como plataforma para a cultura galega, no ámbito audiovisual neste caso”, salienta.

A actriz Candela Peña, na alfombra vermella de Pontevedra co seu galardón como protagonista da serie 'Furia'. CC-BY-SA Premios Feroz/

Por estes motivos o acordo contempla unha cumprida programación previa que xa comezou en outubro e que durará ata xaneiro. “Queremos sacar o máximo rendemento, queremos retorno”, subliña Guías. E neste proceso xorden “alianzas inesperadas” como un acordo para as perruqueiras da Asociación Provincial de Salón de peiteado e Beleza de Pontevedra peiteen e maquillen as celebridades no día da gala. 

Na primeira edición calculouse un retorno para a promoción da cidade de 33,5 millóns de euros

O convenio de Patrocinio do Concello de Pontevedra para os Premios Feroz ascende este ano  a 1,1 millóns de euros máis IVE pero o obxectivo, segundo explican desde o concello, é obter un rendemento moi superior. Na primeira edición calculouse un retorno para a promoción da cidade de 33,5 millóns de euros, incluíndo publicacións en medios de comunicación, campañas publicitarias e redes sociais. “A propia marca dos Feroz tamén se revalorizou grazas a Pontevedra”, subliña a concelleira de Promoción da Cidade. “As portas están abertas para que máis adiante poidan volver a Pontevedra”, asevera.

“Nós fixemos dous anos en Zaragoza e a idea sempre era tamén os dous anos en Pontevedra. Entendemos que é o ciclo axeitado. Pero a verdade é que os Feroz en Pontevedra superaron as nosas expectativas no que atinxe á conexión co público, o cariño, a implicación...”, acrecenta Fernando de Luis-Orueta. 

"A verdade é que os Feroz en Pontevedra superaron as nosas expectativas no que atinxe á conexión co público, o cariño, a implicación...”, subliñan desde a organización

 Nese contexto xurdiu esta terceira edición en Pontevedra. “Realmente achegamos moito á cidade e sentiamos que tamén a cidade nos achega moito a nós e como nos quedara a espiniña do público, xurdiu a posibilidade de facer un ano máis. Cadrounos moitísimo porque estabamos moi a gusto e non queriamos marchar”, salienta, ao tempo que lembra esta excepcionalidade nuns premios que teñen un marcado carácter itinerante.

Imaxe dos Premios Feroz 2027. CC-BY-SA Premios Feroz
Vanesa Vázquez

Vanesa Vázquez

Viguesa do Calvario. Comecei e aprendín en Atlántico Diario, Radio Vigo e Expansión. Cada día conta e agora contámolo en VINTE e Praza.gal. 

Tamén che interesa

  • De ‘Paquita Salas’ a ‘O Corno’ A facultade de Comunicación de Pontevedra tamén é Feroz

    En pouco máis de dous meses Pontevedra acollerá por terceiro ano consecutivo a gran gala de entrega dos Premios Feroz, pero nas últimas semanas a cidade xa está a desenvolver unha coidada programación previa, con proxeccións na facultade de Comunicación abertas a toda a cidadanía. Outubro foi o momento para os maratóns de series premiadas e neste mes de novembro chega o ciclo 'Rompendo o Canon', con películas de directoras que sitúan a muller no centro e enfoques que desafían estereotipos e convencionalismos.

    Cinema

    Ofrecido por

  • Vinte almorzando en Cans con Jaione Camborda

    Almorzamos e parolamos no Festival de Cans con Jaione Camborda, guionista, directora e produtora de cinema. Camborda vive en Galicia e fai as súas producións en galego. "Paréceme o máis natural", asegura a vasca, que levou a Cuncha de Ouro no Festival de San Sebastián por O Corno.  Jaione Camborda ultima o guión da súa terceira longametraxe, onde segue a buscar a "liberdade e o compromiso co espectador" e con ela mesma, segundo asegura a cineasta, que foi premiada co Pedigree de Honra pola súa traxectoria en Cans.

    VINTE almorzando con Deleite

    Coa colaboración de

  • Entrevista | Afioco Gnecco "Esta é a peli que eu necesitaría ver con 15 anos, cando case non había narrativas de persoas trans"

    "Non hai maior acto de amor propio que unha transición", escoita como consolo nun momento de caída emocional o protagonista do documental Este cuerpo mío. A película acompaña a Rafael neses primeiros anos de proceso de transición de xénero. Un camiño complicado pero cheo de luz. E niso quixeron centrarse o cineasta Afioco Gnecco (nombre artístico de Rafael) e a actriz Carolina Yuste (gañadora de dous premios Goya) na súa primeira longametraxe detrás da cámara. Niso, e na súa propia amizade. "É unha unha peli que fala dunha historia de amor e de amizade que está atravesada por unha transición", explica o cineasta italochileno.
    Este cuerpo mío pode verse en Movistar e está a xirar por cinemas, centros culturais e mesmo algún cárcere de España con moi boa acollida por parte do público. Este venres estará nos Multicines Norte de Vigo e o sábado e o domingo nos Númax de Santiago, nuns pases especiais con coloquio xunto a Afioco Gnecco. 

    Cinema
  • 'Fomos ficando sós' Canoura singra o mar dos afectos perdidos na súa primeira longametraxe

    Inabarcable. A inmensidade do mar e unha deliciosa música protagonizan as primeiras imaxes e acompañan o espectador ao longo desta viaxe. Adrián Canoura embarca ao Gran Sol, por fin, xunto ao seu pai, patrón de pesca de altura, no barco familiar “Raúl Primeiro”. Alí grava o día a día dun barco pesqueiro e fai realidade a súa primeira longametraxe. Inspirado polos versos de Manuel Antonio executa unha peza documental de carácter experimental coa que pecha as feridas da distancia entre pai e fillo e cumpre o soño –compartido- de levar o temón do barco. 

    Cinema

Faite de vinte

A partir de 5€ mensuais podes suscribirte a VINTE e colaborar para que sigamos a producir contidos de calidade pagando dignamente as colaboracións de vídeo, fotografía, ilustración, xornalismo e creación de todo tipo.