Cabaliño de mar. O nacemento dun animal fascinante

Os cabaliños de mar reprodúcense dunha maneira moi curiosa xa que é o macho o que pare. No Aquarium Finisterrae da Coruña conseguiron que o fagan con normalidade e ademais conseguiron gravalo. Todo un éxito que serve para seguir divulgando a conservación dos océanos e de especies tan vulnerables coma esta.

No mundo existen máis de 30 especies de cabaliños de mar e en xeral trátase de animais que están en situación de vulnerabilidade. Isto débese en parte á degradación do seu hábitat natural, e en parte tamén ás capturas: en Asia son moi prezados polas supostas calidades que teñen para facer tratamentos medicinais e tradicionais. 

Os cabaliños de mar teñen algunhas particularidades físicas que os fan realmente únicos. Son peixes, pero non teñen escamas, e o seu corpo fórmano placas óseas articuladas. Tampouco teñen aleta caudal e no seu lugar teñen unha cola prénsil coa que poden agarrarse ás algas ou aos corais. O seus ollos son independentes, o que lles permite mover cada un por si mesmo e ter unha visión case completa do que hai arredor. E unha das características máis curiosas é a súa boca, que está composta por dúas mandíbulas fusionadas en forma de tubo que utilizan para aspirar con rapidez as súas presas, que acostuman ser pequenos crustáceos e moluscos.

No relativo ao comportamento e ao movemento son tamén animais pouco comúns. Cando nadan fano de maneira erecta, algo que non se ve nos peixes. Teñen moita capacidade para mimetizarse co ambiente e conseguir pasar inadvertidos no medio das algas para evitar así os seus depredadores. E ademais son moi territoriais, as femias poden chegar a ter 100 metros cadrados de espazo territorial, mentres que os machos teñen máis ou menos 1 metro cadrado. O seu lugar favorito para vivir son os prados mariños dun vexetal que se chama zostera, que é unha planta, non unha alga.

A especie máis común de cabaliño de mar nas costas galegas é Hippocampus guttulatus, pero o exemplar que é protagonista no noso vídeo é Hippocampus abdominalis, unha especie foránea. A maneira que teñen de se reproducir consiste en que a femia deixa os ovos no abdome do macho e este fecúndaos. Alí quedan ata que o macho acabe parindo tras 3 ou 4 semanas. As crías nacen totalmente formadas e xa saen nadando cara a superficie, sendo completamente independentes desde ese momento. 

Os cabaliños de mar do Aquarium Finisterrae proceden do Instituto de Investigacións Mariñas-CSIC de Vigo. En concreto, o que aparece no vídeo chegou á Coruña cando tiña poucos meses de vida. A cría en catividade dos cabaliños de mar non é especialmente complexa, en xeral no Aquarium Finisterrae reprodúcense moitas especies debido ás boas condicións nas que están.

En total o cabaliño de mar do vídeo pariu 191 crías. Despois de naceren o que se fixo foi estabilizalas nunha zona á parte para vixiar que teñan boa saúde e boa alimentación. A alimentación téñena que ir variando a medida que van medrando as crías para adaptarse a comida ao tamaño da súa boca.

As imaxes que podemos ver do parto graváronas no propio Aquarium Finisterrae e as imaxes dos cabaliños no mar son de Jorge Candán.

Esta peza é unha nova colaboración dos Museos Científicos Coruñeses con VINTE para a divulgación nas redes de temas científicos e ambientais de proximidade. 

Faite de vinte

A partir de 5€ mensuais podes suscribirte a VINTE e colaborar para que sigamos a producir contidos de calidade pagando dignamente as colaboracións de vídeo, fotografía, ilustración, xornalismo e creación de todo tipo.