“A miña conta non é como as demais,/ é sentida, tímida, ruborízanse ata os decimais./ Os caixeiros, en vez de cartos, sóltanme kleenex,/estou tentado en voltar ao crime".

“Rico de Sabor” é a carta de presentación de Lumedoloop, o novo proxecto de hip hop en galego que nace da man de Jamas e Møu, membros fundadores de Dios Ke Te Crew, xunto a DJ Mil, un dos DJs máis recoñecidos da escena urbana galega. O primeiro disco chegará en febreiro.

Nunca está de máis cantar contra o capitalismo e "Rico de Sabor" nace como un "manifesto" do materialismo afectivo fronte á aritmética fría do capital. Unha denuncia, en clave de retranca, da gran contradición do noso tempo: un sistema que promete abundancia para todos mentres estruturalmente require a escaseza da maioría, segundo explican desde a banda. “Rico de Sabor, pero non teño un puto peso”, canta Jamas.