A artista coruñesa Hydn vén de publicar “Taste”, un novo single co que dá continuidade á súa aposta por un pop galego contemporáneo e global, con códigos do R&B e do pop dos anos 2000.

“Taste” “nace dun baleiro real: dun espazo que, ata agora, non estaba ocupado, e sitúase directamente no centro do pop contemporáneo desde Galicia”, asegura a cantante e compositora. “Pop galego contemporáneo que opera cos códigos do pop internacional sen complexos nin adaptacións”, acrecenta.

A canción, mestura de galego e inglés, sae á luz acompañada dun videoclip, dirixido por Iago Vilariño, que se constrúe arredor dun combate no que Hydn pelexa con Jessi Longueira, boxeadora coruñesa, gañadora do Open Cidade de Lugo 2024 e profesora en Flightland. O boxeo funciona como linguaxe física para trasladar á imaxe a tensión, o risco e a atracción que atravesan a canción, segundo explican.