«Normalmente busco músicas con sons abstractos, rotos, procesados... Doutra banda tamén sinto unha vinculación moi forte cara ás rítmicas; estímulos que me fagan pensar en tocar a terra coas mans. En todo o que fago hai algo de dixestión identitaria e de respecto profundo pola terra».

A viguesa Acacia Ojea (Akazie) será a única artista sonora galega presente na edición deste ano do Festival Sónar de Barcelona, que se celebrará a mediados de xuño. Akazie é un exponente da escena postclub, que aposta por unha concepción experimental da electrónica de baile e salienta en ritmos e texturas sonoras de alta complexidade.

Compartimos aquí o SónarMix, onde a artista viguesa inclúe case unha trintena de temas condensados nunha sesión dunha hora de duración. «Pódense atopar escintileos dalgúns xéneros que me atravesan forte como o hard drum, o tarraxo, o rough kuduro, o funk mineiro, o quom, a muiñeira, a batida, o foley-trap, ou o grime», explica a propia artista. A creatividade do vídeo que acompaña o lanzamento do mix foi realizada pola artista visual granadina Natalia Stuyk.

No Sónar 2024 Akazie pretende «sorprender e descolocar un pouco» traballando en colaboración coas artistas visuais Natalia Stuyk e Arancha Brandón.