Agora que volve estar de moda na rede consultar o que nos depara o zodíaco, chega ao Twitter galego o Horóscopo celta para nos traer cada mes predicións baseadas no animal que somos segundo o día no que nacemos.  

Para saber máis sobre o horóscopo celta conseguimos localizar o seu creador, o Mestre Amado, que, segundo nos conta, hai tempo que vive retirado no promontorio Nerio, ao pé de Santo Hadrián do Mar. 

Onde está a orixe deste horóscopo celta do Twitter? 

Eu já conhecía este horóscopo há anos, que já mo ensinara minha avó, mas os tempos ainda nom eram chegados. O Nume fijo que chegara ao Rubén (@otuiterdoRubén) umha lámina cos signos antergos, em inglês. O Cascarelo (@Cascarelo) traduziu a lámina a galego e o Rubén, insensato, pujo-se a brincar e lançar prediçons ao chou. O Iván (@echeoqhai) criou a conta de tuiter de @horoscopo_celta para seguir a brincadeira, mas pudem detê-los a tempo. Se algo bo há que dizer deles é que a sua flexibilidade no rigor só é superada pola sua humildade no erro. 

En que se basea a definición de cada signo? 

A definiçom de cada signo baseia-se na pura observaçom. Se sabemos da força de vontade dos Cavalo é porque observamos que gente como o magno Alexandre ou Diego Gelmíres nascerom sob este signo; se sabemos da sensibilidade mística dos Cobra é porque observamos que gente como o nosso guieiro o senhor Prisciliano nascerom sob este signo; se sabemos do destino trágico dos Cavalo de Mar é porque observamos que ninguém quere ser Cavalo de Mar. 

E as predicións? 

As prediçons baseiam-se, também, na observaçom. O horóscopo celta é, ante tudo, científico. Nom inventa nada! O Nume escreve caminhos no movimento dos astros, no cantar dos ríos, nas asas das avelainhas e nas ondas da Wi-Fi; eu ou qualquer pessoa que se interessar —o horóscopo celta é um horóscopo popular— pode tomar nota do guieiro e segui-lo... ou nom! O horóscopo celta é democrático, nom determinista, e permite que a gente tome as decisons que considerar. Sempre digo que o Nume marca o caminho, mas nossos som os pés pra decidir se queremos andá-lo. Com tudo, sempre é melhor fazer caso do que digam os estudiosos, por isso achei pertintente tomar eu as rendas de @horoscopo_celta.

Inspírase o horóscopo celta nalgún horóscopo similar?  Hai algún outro que nos recomende seguir? 

Nom há inspiraçom. Tudo é observaçom, vontade e paciência. Muito aprende o que muito mira! Também nom podemos recomendar ningum, pois sabendo nós a verdade, sería grande maldade mandar o próximo ao erro. O único que podemos recomendar a quem está a ler é que confíe no Nume, que sabe mais ca tudos nós, e ponha algo da súa parte, pois nom há destino venturoso pra o que fica parado.

Cales son as predicións do horóscopo celta para os vindeiros meses en tempos de pandemia? 

Nom é singelo dizer qual será o futuro a longo prazo. A situaçom sanitária gerada pola covidia também está creando grande perturbaçom no Nume. É por isto que apenas podemos fazer prediçons mês a mês. Porém, podemos aventurar certa estabilidade para os Truita e os Cobra. A influença da estrela Sírio traerá positividade aos dous signos caninos: Raposa e Lobo teram que tomar decisons difíciles, mas traeram-lhes felicidade. Os Gato, Cavalo e Vaca, signos de natureza libre, estam mais no aire: dependeram das súas acçons mais que ningum outro signo. Aconselho-lhes prudência. Os Cervo, Carriço e Borboleta som cecais os que aguardam um futuro mais gris para este ano. A eles desejo muita força e vontade pra superar as adversidades que puiderem topar no caminho. A voluptuosidade dos Falcom e a pureza dos Cisne, qualidades definitórias destes signos, alcançaram o seu apogeu baixo o influxo de Altair e Deneb. Os Cavalo do mar, pois a ver… Som Cavalo do mar...

VINTE naceu o 11 de decembro, daquela somos falcón. Que hai para nós? 

Ah, o falcom! Ditosos os nascidos baixo as asas do falcom, a quem nem o sol cega nem a nuvem turba! Muita força e vontade para encetar as vossas empresas, que de seguro chegaram a bom porto!
 

Antes de nos despedir do Mestre Amado pedímoslle que nos fixese algunhas predicións de personaxes da actualidade galega. Para saber o seu signo no horóscopo celta onsultamos as súas datas de nacemento na Galipedia: 

Sabela Ramil 

1 de outubro. Borboleta. As pessoas nascidas ao amparo da borboleta som muito cíclicas: adoitam viver um longo período de carga de energía para despois eclodir. O Nume indica que Sabela está agora no momento ajeitado para a carga de energía. Nós nom veremos grandes éxitos seus no meio prazo, mas no terreo laboral irá-lhe bem. Nom luzirá, mas aprenderá. 

Alberto Núñez Feijoo

10 de setembro. Cisne. Os Cisne coma Feijóo som de natureza transparente: logo se lhe vem as intençoms. Agora mesmo, com a estrela Deneb em plena atividade, esta natureza manifesta-se no seu grau mais alto. É por isso que o vemos muito menos na televisom do que até agora. Até dentro de quatro anos, quando Deneb perda força, non veremos muita atividade no Presidente. No amor, sem problemas.

Ana Pontón 

27 de xullo. Carriço. Terá um conflito no meio praço, mas sairá reforçada. A líder do BNG tem por diante um tempo com muitas frontes abertas, o que fará que se afaste um pouco dos seus projetos principais, mas a tudo sabem sobrepor-se os nascidos coa diligência do Carriço. Seguramente, cambiará de carro.

Gonzalo Caballero 

9 de xaneiro. Cervo. Com Sírio no céu, os nascidos no símbolo do Cervo vem-se cheios de energía. Caballero terá tuda a força que lhe faltou durante a passada campanha. Os astros nom dim muito mais, pois nom o conhecem ainda mui bem.

Fernando Vázquez 

24 de outubro. Borboleta. Nos últimos meses de Fernando Vázquez puidemos ver o ciclo próprio dos borboleta: um período de carga de energía seguido dum periodo brilhante, breve; e outra vez o periodo de carga. Por desgraça para o Deportivo, o seu periodo de eclossom rematou antes que a Liga. É esperável que na próxima temporada volva eclodir, mas é dificil ainda predizer quando. No amor nom terá problema.

Abel Caballero

2 setembro. Cisne. O influxo de Deneb sentará-lhe mui bem ao alcalde vigués. Nom descartemos que este ano comece coas luzes de Natal muito antes. Espera-lhe uma gram decepçom nos seus projetos, mas nem por isso perderá a alcaidia.

Iago Aspas

1 agosto. Cavalo. O celtista goçará de mui boa saúde nos próximos meses. Será momento para ele de empezar novos projectos, dos que teremos noticia. Chegará-lhe uma multa de tráfico importante.

Para saberes que che depara o horóscopo celta cada mes só tes que seguilo no Twitter. Velaquí as predicións que fixo para o mes de agosto: