Lucía Otero quería aportar algo á sociedade co seu proxecto final de estudos na escoa Mestre Mateo e, como o que máis lle gustaba era retratar as súas avoas, pensou en buscar máis mulleres do rural ás que fotografar. Así xorde o foto-libro Ancoradas, autoeditado pola propia autora ao abeiro d'A Regueifa Plataforma 2.0.

«Estaba un pouco obsesionada con facerlle fotos ás miñas avoas e todas as ideas que se me ocorrían para o proxecto final eran disto. Pensando un pouco en por que estaba obesionada se me ocorreu esta idea. Cheguei á conclusión de que o que me gustaba da miña avoa eran as súas expresións faciais, o seu estilo de vida, a súa casa... E decidín deixarme inspirar por todo isto», conta Lucía Otero Pazos (Redondela, 2001), técnica superior de Fotografía pola Escola de arte e deseño Mestre Mateo de Santiago de Compostela.

Ancoradas é un proxecto documental protagonizado por mulleres que viven alonxadas das grandes urbes galegas nas provincias de Ourense e Pontevedra. «A miña intención era facerlle unha homenaxe a este grupo poboacional tan presente en Galicia, e ás veces como tan desprestixiado no rural», asevera. A publicación vai máis alá dos retratos, cunha estética moi marcada, e contén códigos QR a partir dos que se achegan as testemuñas orais de cada unha das protagonistas das fotografías. 

Tiña como referentes aos fotógrafos Estela de Castro e Damián Ucieda e con estas inspiracións decidiu apostar polo formato do foto-libro porque «podía ser interesante e aportar algo socialmente». «Ía a casa destas mulleres e pasabamos como tres horas xuntas. Poñía o fondo negro e o foco de luz e así tiraba varios retratos, e logo facíalles unha especie de entrevista. Non quería que o proxecto quedara só nunhas fotos», explica. 

Os retratos destas mulleres e as capturas dos espazos cotiáns dos seus fogares están realizados cunha estética que lembra á técnica do chiaroscuro de Caravaggio: «Os retratos están feitos cunha iluminación bastante barroca, o que penso que incita a saber máis delas. Así podo dar no fotolibro unha visión máis persoal de cada unha, pregunteilles sobre como é o seu día a día ou se notaban como a xente estaba marchando do rural cara ás grandes cidades. Con iso montei os audios de cada unha».

Lucía rematou os seus estudos de fotografía e está a facer un ciclo superior en Vigo para ampliar a súa formación cara ao audiovisual, como pensou en facer nun inicio, cando rematou o Bacharelato artístico, mais optou por centrarse na fotografía, que era o que máis a motivaba, unha vez descubriu as escolas de artes como a Mestre Mateo. 

Ancoradas é a súa primeira publicación, na que aparecen as historias de nove mulleres, e coa que se presenta como profesional detrás da cámara. Optou por autoeditarse ao abeiro d'A Regueifa Plataforma 2.0 porque tamén quere manter unha relación máis persoal coa xente que queira adquirir o libro. Por iso, para facerse con este foto-libro a mellor maneira é escribirlle directamente á súa autora no correo electrónico luciaoteroeasd@gmail.com.