Educación fronte a castigo. Alexandre López Campos é adestrador e educador canino. Entusiasta do seu traballo, asegura que moitas veces as persoas están moi centradas no foco do problema –o can bótase ás bicis, ladra, morde…- mais non reparan nas causas. E, con frecuencia, só se trata de reaxustar condutas. Para iso formula programas educativos onde analiza aspectos como se están ben cubertas todas as necesidades básicas do can. “Por exemplo, un border collie adoita necesitar entre seis e sete horas de desgaste físico, aínda que depende de cada individuo”, asegura. Se non se cumpre ese tipo de necesidade básica, xa podemos saber unha causa de comportamento inadecuado. 

Nunca é tarde para moitas cousas. E para os cans tampouco. Alexandre López Campos leva anos estudando o comportamento destes animais e aplicando programas de educación canina adaptados a cada individuo. Si, porque as razas e os tamaños determinan moitas formas de ser ou actuar mais as experiencias vividas e as pautas do día a día tamén condicionan, e moito, o comportamento animal.

“Moitas veces o que atopo é que a xente está moi centrada no foco do problema, mais non nas causas. Todo o mundo ten claro que o seu can é malísimo porque ladra, bótase ás bicis ou morde, pero non pensan en educalo antes”, refire o adestrador e educador canino.

"Todo o mundo ten claro que o seu can é malísimo porque ladra, bótase ás bicis ou morde, pero non pensan en educalo antes”, refire o adestrador e educador canino"

Alexandre Campos sempre tivo cans na casa e tras un proceso de baixa no seu traballo, decidiu formarse e dedicarse a axudar na educación dos cans e os gatos. Estudou para ser educador nunha escola privada e fixo cursos en campos como comportamento condutual coa etóloga (veterinaria experta en comportamento canino) Mariona Monros, de Natural Gos. “Con ela profundei nos aspectos do comportamento, inseguridade e medos e todos os anos me formaba noutras destrezas como habilidades ou deportes como pode ser o canicross, agility, saltar obstáculos”, explica.

Foi así como creou o centro de adestramento canino Oracan, en Vigo, mediante o que desenvolve programas educacionais a través da obediencia e o entendemento do comportamento do can. Nestes programas fai un plan para redirixir un comportamento concreto cunha análise do día a día do can na casa. “Non para todos os cans vale o mesmo”, puntualiza. Moitas veces os cans sofren inseguridades debidas a experiencias negativas, pero iso hai que sabelo, detalla. “É fundamental o entendemento condutual, saber por que o can ladra a unha persoa, se é medo ou inseguridade baseada nun feito concreto”, di.

Na súa análise unha das primeiras cousas que comproba é se están ben cubertas todas as necesidades básicas do can. “Por exemplo, un border collie adoita necesitar entre seis e sete horas de desgaste físico", asegura

Na súa análise unha das primeiras cousas que comproba é se están ben cubertas todas as necesidades básicas do can. “Por exemplo, un border collie adoita necesitar entre seis e sete horas de desgaste físico, aínda que depende de cada individuo”, asegura. Entón, se non se cumpre ese tipo de necesidade básica, isto pode ser unha causa de comportamento inadecuado. “Cómpre entender as fases do cans, a personalidade e carácter de cada individuo”, asegura.

Alexandre López fala con paixón do seu traballo e incide sempre na educación fronte ao castigo. “Moitas veces trátase só de reaxustar pautas”. Para saber como abordar cada caso, o primeiro que fai é unha entrevista para informarse de que acontece co can todo o día e profundiza en aspectos como a alimentación, o xogo, a socialización e as experiencias coñecidas, como se foi atacado, por exemplo. A continuación avalía o comportamento concreto polo que foi chamado. “Con todo isto levo o can á miña casa e desenvolvo o programa educacional, para darlle ferramentas tanto ao animal como a persoa”, explica. 

Cada vez hai máis xente que se preocupa tamén pola educación do can, a súa xestión emocional e a convivencia con outros individuos

Tradicionalmente as persoas con cans preocupáronse máis polo tema do adestramento, que refire ensinar ao animal a desenvolver habilidades para o xogo, o deporte, a detección de substancias ou mesmo a defensa persoal. Pero cada vez hai máis xente que se preocupa tamén pola educación do can, a súa xestión emocional e a convivencia con outros individuos. “O tema educacional sempre nos parece caro, pero pode aforrarte un desgusto se tes cans que o necesitan”, di o adestrador e educador canino.

Alexandre López comezou en 2019 co adestramento, educación e paseos e hoxe en día ten tamén unha tenda en Vigo chamada , Bewy and Co, que lle dá soporte no día a día e facilita ferramentas como a alimentación ou os xoguetes axeitados. “Eu podo axudar ás persoas que se deixan asesorar e se fían da miña profesionalidade. O que me importa é que entendan que lles pasa aos cans, por que ouvean á vida e que o individuo estea estable”, explica.

"O que me importa é que entendan que lles pasa aos cans, por que ouvean á vida e que o individuo estea estable”, explica Alexandre López Campos

Cada día introducimos máis os cans nas nosas vidas, pero López salienta que nunca hai que esquecer que como cans que son teñen as súas propias necesidades como olfactear, aínda que a nós non nos guste que o fagan.