“Teño caldo quente, quérelo probar?” pregunta o artista ao inicio desta retranqueira e insinuante peza que o público xa pode degustar nas plataformas dixitais. 

Poderiamos dicir que Mondra resignifica o caldo, pero imos deixarnos de parvadas e simplemente animamos a escoitar a nova canción e ver o vídeo do cantareiro e bailador, que tan ben acae neste frío venres de inverno e “non lle fai mal a ninguén”, tal e como canta. 

“Mira, rapaciño, o prato está na mesa e canto máis te miro,máis o caldo espesa”...  Este tema é a segunda creación que Mondra dá a coñecer do que será o seu novo disco, logo do pasodobre "Vale máis un canciño", producido integramente a carón de Hevi no Laboratorio Soyuz. A súa dirección creativa global lidéraa Zeltia Iglesias, con quen xa traballou en ARDĒN.

O lanzamento de “Teño caldo quente” complétase cunha proposta audiovisual codirixida por Adela Otero e mais o propio artista, quen tamén coproduce o video canda o estudio elmembrillo.