Videoxogos

Recuncho Gamer e Brava crean Portalén: María Soliña ten unha misión

O videoxogo galego Portalén vén de comezar a súa particular andadura coa estrea no BCN Game Fest a pasada fin de semana. De estilo matamarcianos foi producido por Brava e Recuncho Gamer, que prevén a súa comercializacón para comezos de 2027. Nas próximas semanas xa se poderá probar en eventos galegos.

O obxectivo do xogo é superar sete niveis acompañando a María Soliña que, montada na súa vasoira máxica, deberá atopar tres obxectos máxicos que lle darán o poder para liberar o seu pobo do sufrimento e da chegada de Noitum, o Señor da Noite. Todo isto nunha carreira contrarreloxo escapando de piratas na Ría de Vigo, atravesando montes, fragas, covas ou descubrindo a lendaria cidade sumerxida de Antioquía. 

Portalén conta cun estilo artístico baseado no píxel, no que aparecerán criaturas mitolóxicas galegas que combinarán cunha banda sonora con temas clásicos como o Negra Sombra, Fuches tu, ou  Eu Chorei, con toques electrónicos.Ademais a banda sonora pecharase con cancións de artistas galegos de renome que se anunciarán nas vindeiras semanas.

Créditos

Portalén é un proxecto de Brava e Recuncho Gamer que conta coa Colaboración coa Axencia de Industrias Culturais de Galicia.

Tamén che interesa

  • “A isto xogaba a túa nai con oito anos”. Chega Pixel á feira, con récord de videoxogos galegos e moitos clásicos

    Videoxogos clásicos e proxectos galegos. Este son os dous eixes sobre os que pivotan os contidos do primeiro salón galego do videoxogo, baixo o nome de Pixel á feira, que terá lugar este sábado e domingo en Compostela, con entrada de balde.

    A feira celebrarase no Pazo de Congresos de Santiago con máis de 50 videoxogos creados en Galicia para probar e unha ampla programación que inclúe concertos, teatro, encontros con profesionais e ata un certame que recoñecerá a calidade e innovación de proxectos creados ou traducidos ao galego, da man da Deputación da Coruña, promotora da feira.

    Videoxogos

  • Víctor Justo, creador de videoxogos: “Poder vivir do teu ‘hobby’ é o soño de calquera persoa”

    Tiña un grupo punk en Vigo chamado Woden e estudou soldadura, mais hai xa anos que Víctor Justo Dacruz gaña a vida como creador de videoxogos. No medio da pandemia montou a súa empresa, coas súa iniciais Vijuda, e colocou no mercado un xogo de condución estilo arcade con estética retro que leva a súa antiga banda no nome. Vijuda está a piques de facer público o cuarto videoxogo da saga Super Woden, coa que busca exaltar os coches clásicos, unha das súas grandes afeccións, xunto cos videoxogos, claro. “A día de hoxe o Súper Woden GP 2 é o videoxogo indie con máis coches e máis circuítos que existe, con 200 vehículos modelados”, asegura Víctor Justo.

    VINTE na rúa

    Coa colaboración de

  • Recuncho Gamer. «O videoxogo é o produto cultural máis completo»

    Guión, música, ilustración, deseño. Todo isto está nos videoxogos, onde, ademais, hai unha compoñente interactiva que permite cambiar a historia segundo a destreza de quen xogue. No Recuncho Gamer que vén de facer catro anos e recibir distincións como o premio Youtubeiras e o Mil Primaveras da CTNL, falan de videoxogos desde Galicia e en galego, claro. «Hai videoxogos que poden ter uns valores máis ricos e outros que poden ser máis de consumo fácil, pero iso pasa tamén no cine e na literatura, pasa en todo», explica o fundador do Recuncho Gamer.

    Iago Gordillo pon en valor o traballo que están a facer os estudios indies, con historias máis diversas e representativas en xénero ou raza. Se esperan detalles do Call of Duty ou o Fifa, este non é o lugar.

    Videoxogos

Faite de vinte

A partir de 5€ mensuais podes suscribirte a VINTE e colaborar para que sigamos a producir contidos de calidade pagando dignamente as colaboracións de vídeo, fotografía, ilustración, xornalismo e creación de todo tipo.
Quero ser de Vinte