Miudiño Sessions Música

Miudiño Sessions: Carabela

martes 27, xuño 2023

Navegamos ata a cerna da ría de Muros e Noia para filmar a arriscada mestura de pop, electrónica e tradi das noiesas Carabela nunha localización máis mariñeira imposible por teren sido paridoiro de dornas, bucetas, goletas e chalanas durante séculos. Décimo terceira entrega das Miudiño Sessions, de A Regueifa Plataforma 2.0, un proxecto non comercial de difusión da nosa cultura feito dende a paixón pola música e a lingua pero que tamén ten un certo propósito arquivístico, facendo a foto fixa do momento histórico que estamos a vivir, por número e por calidade, de propostas musicais na nosa lingua.

Ao acubillo da espectacular estrutura de madeira do Estaleiro de Ciprián, recentemente restaurado e convertido en museo polo Concello de Outes, as de Noela debullan tres temas de Nó, o seu primeiro EP, agasallándonos ademais "Arrolo", un tema novo e inédito.

Un petisco das Carabela que poderemos ver ao vivo este verán, comezando polo vindeiro domingo 2 de xullo no Teatro Colón da Coruña xunto con Måi dentro do ciclo Xullo Pop! organizado pola área de Cultura da Deputación da Coruña e a seguir polo festival Festas Mutantes de Manzaneda o 22 de xullo.

Créditos

Seguindo o ronsel dos concertos para levar de La Blogotheque, os Tiny Desk Concerts da radio pública norteamericana ou os pioneiros acústicos da MTV dos 90s, A Regueifa 2.0 presenta as Miudiño Sessions, unha serie de micronconcertos de grupos e solistas galegxs en formato mínimo gravados en localizacións singulares.

En anteriores Miudiño Sessions

Miudiño Sessions

Miudiño Sessions: O Portughés e Volk GZ

Duodécima entrega das Miudiño Sessions, un proxecto non comercial de difusión da nosa cultura, feito dende a paixón pola música e a lingua pero que tamén ten un certo propósito arquivístico. Desta volta a sesión tivo lugar ao pé do castelo de Pambre, un dos poucos que non foron arrasados pola furia irmandiña, e foi protagonizada por O Portughés e Volk GZ, dándolle vida ao seu EP colaborativo Entre muros e montes.

Música
Miudiño Sessions

Miudiño Sessions: Su Garrido Pombo

Undécima entrega das Miudiño Sessions, desta volta con Su Garrido Pombo, que vén de lanzar 'Patios de Luz', o seu segundo disco en solitario. Unhas músicas que precisaban un contexto e un espazo tan especial coma a luminosa terraza olívica que xenerosamente nos cedeu esa lenda viva do indie que é Marco Maril, produtor ademais do album. Arrodeadxs de roupa pendurada e coas Illas Cíes no horizonte fomos testemuña privilexiada dos feitizos polifónicos que a meiga de Fornelos de Montes é quen de cociñar no seu looper coa súa voz, percusión e guitarras coma únicos ingredientes. Cando o talento é sobrenatural, a maxia pode abrollar mesmo nun espazo tan cotián coma un patio de luz.

Música
Miudiño Sessions

Miudiño Sessions: Måi

Måi, o proxecto de fusión entre o pop, a música tradicional e a electrónica liderado por Iseo Agilda protagoniza desta volta as Miudiño Sessions que nos trae A Regueifa Plataforma 2.0. Con Tomás Ageitos na produción e acompañada por Margarida Mariño ao cello, Icía Sanmartín á pandeireta, Victor Álvarez aos sintetizadores e Migui Carballido á percusión electrónica esfolaron catro temas de Nigredo, o seu disco de debut. Unha obra de clara vocación contemporaneizadora da nosa música.

Música