De Ninghures adianta en Vinte “En fin, que máis dá”, un canto á amizade e á vida

xoves 6, febreiro 2025

Vinte estrea en exclusiva “En fin, que máis dá”, tema que supón o cuarto e último avance do novo LP da banda De Ninghures, Feira, que se presentará o 13 de marzo na sala Capitol de Santiago.

De momento, este xoves, xa coñecemos o novo sinxelo, un canto á amizade e á vida que se inspira tanto no Tishoumaren (tamén coñecido como Desert Blues) e no pobo nómada Tuareg como nunha muiñeira de Florencio López, segundo explican desde a formación.

Para De Ninghures “En fin, que máis dá” supón «unha viaxe para cantar e gozar» nunha nova volta ao concepto de revisión da tradición desde a contemporaneidade.

O novo single está producido por Juan de Dios Martín e conta co artista coruñés Xoel López nas guitarras. A peza audiovisual foi dirixida por Lorenzo Negueruela e estará dispoñible desde este venres na canle de youtube da banda.

De Ninghures propón un tema que, entre a ledicia e a melancolía, fía unha ruta na que as voces se mesturan entre harmonías envolventes. A música flúe para xerar unha atmosfera cálida e poderosa; mentres que as guitarras, tanto as gravadas por Xoel López como pola banda, dialogan coa percusión tradicional galega, o clarinete, o violín e a gaita.

Créditos

Equipo técnico

Dirección: Lorenzo Negueruela

Dirección Creativa: Melania Freire

Axudante de Dirección: Lara Caeiro

Dirección de Fotografía e operador de cámara: Yago Rodríguez

Direción de Arte e Estilismo: Lara Caeiro

Auxiliar de Cámara: Mara Iglesias

Postprodución: Lorenzo Negueruela e Yago Rodríguez

Cor: Lorenzo Negueruela Produción - Hadrián García

Canción orixinal e letra: Tomé Mouriño

Produción: Juan de Dios Martín e De Ninghures

Guitarras: Xoel López

Gravación e mistura: Juan de Dios Martín en Estudio Casadiós e Estudios Mans

Máster: Miguel A. González (Blackboxmastering)

Distribución: ‪@Altafonte‬

Comunicación: Lucía Pita (The Office)

Management: ‪@tremendoaudiovisual2871‬

Tamén che interesa

De Ninghures actualiza a copla tradicional e canta ao mal amor en "O último baile"

De Ninghures vén de estrear “O último baile”, o terceiro adianto do seu novo álbum, un traballo producido por Juan de Dios Martín que verá a luz nas vindeiras semanas.
“O último baile” parte dunha copla recollida en 1979 en Arzúa por Dorothé Schubarth á informante Salomé e que se atopa no APOI (Arquivo do Patrimonio Oral da Identidade). A partir desta lírica da tradición popular, e fiada polos propios versos e música de De Ninghures, nace un tema que fala do mal amor, «ese amores que se che meten na cabeza e que nos consomen», segundo apuntan desde a banda. Unha idea que se reforza a través dunha instrumentación escura e hipnótica e dunha sonoridade agresiva, que medra ata entrar en bucle, “como se fora unha obsesión que te encende e te destrúe a partes iguais”, detallan.

Música
De Ninghures publica "Poço": un convite ao baile, á festa e á foliada

«Queremos que cando a xente escoite "Poço", unha muiñeira de montaña con moita enerxía, como as que nos gustan, sinta ese convite ao baile, ao bo rollo, á foliada. Que a xente sinta como propio o que cantamos e que se vexa reflectida nesa letra, nese retrouso e nesa onda de desenfado, desinhibición e alegría», sinalan desde o grupo De Ninghures, fiel ao seu obxectivo de pór en valor a música de raíz e a creación contemporánea.
A banda vén de publicar o seu novo tema, "Poço", unha muiñeira enérxica, ateigada de «aire fresco bo rollo e naturalidade», que desta quenda pretende convidar ao público, dun xeito sinxelo e desenfadado, «a pasalo ben».
O novo sinxelo de De Ninghures vén acompañado dunha peza audiovisual rodada cunha Handycam polos propios membros do grupo. O videoclip pretende reflectir, con naturalidade, o día a día da propia formación, á vez que traslada o espírito de festa e foliada que a define.

Música
“Ontes fun moi malo”, un ‘western’ para a resaca de Grande Amore

Grande Amore presenta "Ontes fun moi malo", primeiro adianto do seu novo disco, Grande Amore III, producido por Jacobo Naya que verá a luz nos vindeiros meses., un disco producido por Jacobo Naya que verá a luz nos vindeiros meses. Un tema que combina elementos do rock, o punk e o glam, inspirado no “Denim Demon”, de Turbonegro, pero co selo de Grande Amore, o proxecto de Nuno Pico xunto a Clara Redondo e mariagrep.
‘Ontes fun moi malo’ é unha reflexión en horas de resaca. Un tema rápido, potente, con actitude rebelde en cada acorde, fuzz nas guitarras, e ruído, ruído, ruído. Moito ruído. Soa como a túa cabeza cando te acabas de levantar, cando lembras que onte á noite mesturaches demasiado. Cando alguén che conta que fixeches. Cando te preguntas por que. Absoluta distorsión, explican desde o sello discográfico Ernie Records.

Música
Resaca emocional. A creación colectiva soa a música ‘cuqui’ de amor

Música cuqui e bonita feita desde un sitio vulnerable, íntimo e cálido. Música de amor (nas súas diferentes expresións) feita cancións que revelan un intimismo respectuoso non moi estandarizado. Isto e máis cousas que non se poden explicar con palabras está en De amor, primeiro disco de Resaca emocional, que verá a luz o 14 de febreiro.
Desde este venres, 31 de xaneiro, xa podemos coñecer o seu cuarto adianto “Ondas sonoras de xúpiter (24/7)", un «atrevemento bastante grande» que entra no hiper-pop. Sobre todo isto falamos con Berto Mira, Ash Diz e Rocío Campoy, integrantes deste proxecto colectivo e diverso.

Creación