Música

PALCO: unha fiestra aberta á música feita en Galicia

Ana G. Liste @BelaMistura

Gañadores dos premios PALCO este martes na sala Capitol © Aigi Boga

A Asociación Galega de Empresas Musicais botaba en falta espazos de confluencia para todos os actores dun sector que está sempre en marcha. Ao comezo, como salientou a presidenta Patricia Hermida, non tiñan claro como ían reaccionar as diferentes profesionais a esta chamada, pero a experiencia do ano pasado nos primeiros premios da industria musical galega e o crecemento deste ano a dúas xornadas profesionais e a súa consolidación baixo o paraugas PALCO só confirman que este espazo era necesario. 

PALCO son agora os premios que dan resposta ao bo momento que está a vivir a música galega, cunha madurez e unha diversidade extraordinarias, pretenden ser unha ferramenta para dar visibilidade ao talento galego e fortalecer a industria musical como motor cultural, social e económico do país.

Os premios enmárcanse dentro do Plan Estratéxico da Industria Musical de Galicia, asinado pola Asociación Galega de Empresas Musicais (AGEM) co impulso da Xunta de Galicia. "Queremos celebralo e agradecer o talento e o compromiso de quen fai posible o crecemento da nosa industria e para recoñecer o valor das persoas e proxectos que converten o sector nun verdadeiro motor cultural e humano para Galicia", salientan.

The Rapants, artista do ano 2026 nos premios PALCO, xunto a parte do seu equipo © Pacrispa

AGEM está integrada por empresas que realizan actividades de deseño, xestión e produción de eventos de carácter cultural, musical, educativo, social e de entretemento, destinados a ser realizados en locais pechados ou a ceo aberto e, en xeral, todas as actividades técnicas e preparatorias para a execución destes eventos ou servizos, incluída a actividade comercial, de representación de artistas, festivais, distribución e xestión.

Segundo explican, o impulso industrial propiciado pola entidade vai máis alá do facturado polas empresas asociadas. O impacto económico dos espectáculos nos que participa AGEM, tanto de artistas en solitario coma de festivais, é de mais de 100 millóns de euros.

A Sala Capitol de Santiago de Compostela acolleu este martes a segunda edición dos premios PALCO, cun formato próximo, pensado para favorecer a cooperación e a convivencia entre os diferentes axentes da industria musical. A Xunta Directiva de AGEM decidiu outorgar o Premio a artista do ano a The Rapants e o Premio a persoa do ano á Fundación Paideia, mentres que o público elixiu por votación popular ao festival de Pontevedra Surfing The Lérez como proxecto gañador do Premio á excelencia na experiencia do público.

O premio PALCO ao Mellor proxecto de comunicación foi para o festival EmigraSON © Pacrispa

Un xurado profesional integrado polas asociacións AGEM, AGATEC, TESGAL, AGPXC e CLUBTURA, xunto ás e aos gañadoras e gañadores da pasada edición, seleccionaron os proxectos gañadores entre un total de 42 finalistas, tres por cada unha das 14 categorías xerais contempladas nos premios. 

  • Mellor deseño de iluminación: Laura Iturralde e José Faro (Gala i Ovidio)
  • Mellor implementación de son: Ricardo Barroso (The Rapants) 
  • Mellor produción de servizos: Global Setup 
  • Mellor profesional de produción: Olalla Camaño 
  • Mellor manager: Álvaro Creo (Off Stage) 
  • Mellor produción discográfica: Iago Pico, Gabi Fernández e Tanxugueiras (O Cuarto, Tanxugueiras)
  • Mellor posta en escena: As dúas e punto (Tertúlia, Fillas de Cassandra)
  • Mellor promotor / programador: Alberto Alfonso (Art Music Agency) 
  • Mellor proxecto de comunicación: EmigraSON 
  • Mellor identidade visual: Zeltia Iglesias (Mondra) 
  • Mellor evento cultural / musical: AC Fanto Fantini - Osa do Mar 
  • Mellor videoclip: Juan Barbazán, Sergio Goce e Manuel Seoane (Non sei como, The Rapants)
  • Mellor espazo musical: Sala Rebullón 
  • Mellor proxecto de sustentabilidade: Sinsal
O premio PALCO 2026 ao Mellor evento cultural / musical foi para a AC Fanto Fantini que organiza o festival Osa do Mar en Burela © Pacrispa

O novo escaparate sectorial da música impulsada desde Galicia, PALCO, converte este mércores e xoves o Museo Gaiás da Cidade da Cultura de Galicia nun novo espazo de encontro, conexión e proxección para o sector musical. Participarán grandes nomes do sector como Kin Martínez, de Esmerarte Industrias Creativas e representante de artistas como Xoel López e Vetusta Morla; Fernando Gómez Pose, de Bring The Noise, responsable de proxectos como Resurrection Fest e O Son do Camiño; Ivone Lesan, coordinadora de booking de Primavera Sound; Jordi Lauren, de Play Plan, SonRías Baixas e BigSound Festival Pontevedra; ou Luis Campos e Julio Gómez, de Sinsalaudio, responsables do festival Sinsal e de SON Estrella Galicia Posidonia.

Tamén estarán presentes nas xornadas profesionais en Compostela Esteban Ruiz, músico, xestor cultural e fundador de WeAreWolves Records; Jordi Fosas, director artístico da Fira Mediterrània de Manresa; Germán Quimasó, de Sonde3, vinculado a Río Babel e Pirineos Sur; Josiño Carballo, de Ernie Records e representante de artistas como Grande Amore e Shego; Guillem Arnedo, presidente da Unión de Músicos e vicepresidente da Acadèmia Catalana de la Música; Elda Gómez, xerente da Asociación Estatal de Salas de Concertos (ACCES); Belén Álvarez, directora da Área de Dereito da Cultura de Gabeiras & Asociados; Aida L. Rosell, xornalista de Mondo Sonoro Noroeste; Juan Carlos Fernández Fasero, coordinador de direccións de Zona SGAE; María Galdón, stage manager de Zahara e xefa de produción de Ernie Records; Estefanía Serrano, fundadora e directorade Plan B Music; Miguel de la Cierva, responsable do Náutico de San Vicente (O Grove); e artistas como Abraham Boba, The Rapants, 9Louro ou o compositor de bandas sonoras Sergio Moure. 

Ambiente na celebración dos Premios PALCO 2026 na Sala Capitol de Santiago de Compostela © Aigi Boga

Abordarán cuestións centrais para o presente e o futuro da industria: a internacionalización dos proxectos, a sustentabilidade económica e profesional, a contratación pública, a circulación musical entre salas e festivais, a profesionalización e o relevo xeracional, a comunicación e a prescrición musical, o coñecemento dos públicos e a exploración de modelos de negocio máis alá dos concertos. 

Ademais, PALCO trae consigo unha programación artística que reúne unha vintena de proxectos musicais que actuarán en directo en catro salas de Compostela entre este mércores e xoves, 4 e 5 de novembro: a Sala Capitol, o Salón Teatro, a Sala Sónar e o Riquela. 

Abril, Amoebo, Antía Muíño, Apolo 18, Crow Machine, Filloas, Galician Army, High Paw, Lisdexia, Lumedoloop, Maricarme, Néboa, Raze, Tona, Terrae, Vimbio e Xan Campos son os artistas seleccionados para actuar entre un total de 162 propostas. Toda a información sobre horarios e entradas pode consultarse no sitio web de PALCO.

Ana G. Liste

Ana G. Liste

Xornalista viguesa do 90. Traballei en medios como Faro de Vigo, El País e Europa Press. Formo parte da Xunta de Goberno do Colexio Profesional de Xornalistas de Galicia e son unha máis en Xornalistas Galegas. Agora estou entre Praza.gal e VINTE.

Tamén che interesa

  • Vinte almorzando con The Rapants

    Sempre divertidos, The Rapants aseguran ser xa como un matrimonio, dos bos, claro. Coñécense desde cativos e non deixan de pasalo ben no escenario, aínda que cada vez o nivel de traballo e profesionalización sexan maiores. 

    Estivemos coa banda de Muros no Festival Revenidas, en Vilaxoán, almorzando, falando e rindo con Matías, Xanma, Samuel e Xaquín, que están a gravar o seu novo disco. “Dámoslle grazas á xente do tradi por non facernos bullyng ”, chancean.

    VINTE almorzando con Deleite

    Coa colaboración de

  • Vinte almorzando con Fillas de Cassandra

    Neste novo Vinte almorzando con Deleite fomos de Tertúlia con María SOA e Sara Faro, as Fillas de Cassandra. Están a presentar o seu segundo disco longo, que en realidade é o seu terceiro traballo en tres anos. "Non ansiamos que as nosas letras sexan dogmas. Buscamos o debate e a conversa", subliñan.
    "É un disco bastante contestatario. Saír á fresca é unha declaración de intencións do que somos", aseguran durante a conversa, ao tempo que defenden "non ser permisivas cos discursos de odio ou bulos. Tristemente cada vez máis nos estamos achegando a ese mundo hostil que daba tanto medo, de tanto retroceso. Pero todas podemos facer algo, todas xuntas”, animan. 

    VINTE almorzando con Deleite

    Coa colaboración de

  • Filloas presenta “Google calendar”, hyperpop contra a rutina

    “Google calendar” é o primeiro sinxelo do novo traballo de Filloas, que se publicará ao longo de 2026.

    Esta canción reafirma unha sonoridade enmarcada no hyperpop, no que o artista é pioneiro en Galicia, segundo subliñan desde a produtora. O sinxelo enmárcase dentro dun mesmo universo, con referencias ás películas de Matrix, o anime e á novela de Momo, representado nun videoclip de Xaime Miranda e nunha portada ilustrada baseada no mesmo.

    “Google calendar” trata da rutina e, sobre todo, como non podemos escapar dela, exemplificándoo nunha eterna loita entre unha personaxe maligna (que representa á rutina) que se enfronta á nosa protagonista deixando un final pouco esperanzador.

    O artista vén de estrear Súbete ao EVA (Alende/Altafonte, 2025), e xa prepara o lanzamento dun novo EP, onde o son electrónico que Filloas xa viña adiantando colle forma. 

    Música

  • Entrevista | Alana “Agora atrevémonos a experimentar con outros sons que igual no primeiro disco non nos apetecía”

    Falamos con Antía Vázquez (Oleiros) e Eloy Vidal (Ponteceso), dous dos tres membros que forman Alana. Nesta conversa faltou o gaiteiro e percusionista Pablo Castro (Vimianzo) pero estivo ben presente nas verbas tanto da súa compañeira como do seu compañeiro de grupo. Alana vén de publicar o seu novo disco, “Un saber”, un segundo traballo que consolida a formación con apenas tres anos de existencia e co que quixeron homenaxear, xa desde o título, as informantes, esas mulleres que achegan as súas coplas sen darlle moita importancia aos seus propios coñecementos. “Elas teñen un saber non só a nivel musical, senón tamén a nivel cultural, a nivel lingüístico, a nivel social e a nivel de comunidade”, asegura Antía Vázquez. O achado de cada cantiga é só o comezo dun traballo protagonizado polos contextos e a experimentación sonora. Mellor escoitalo.

    Música

Faite de vinte

A partir de 5€ mensuais podes suscribirte a VINTE e colaborar para que sigamos a producir contidos de calidade pagando dignamente as colaboracións de vídeo, fotografía, ilustración, xornalismo e creación de todo tipo.
Quero ser de Vinte