De rapaz Iago Galego (Coruxo – Vigo-, 1996) era punki. Como vigués creceu escoitando a Siniestro e vendo o Xabarín na televisión. A música sempre formou parte da súa vida: estivo na banda de música de Coruxo, estudou no Conservatorio e con 15 anos xa quixo montar o seu grupo de punk, na contorna de Coruxo, con rapaces da zona. Estudou Enxeñería Informática en Santiago, e tras dez anos vivindo alí, considérase xa máis de Compostela ca de Vigo.

Temas como a saúde mental ou a precariedade laboral que vive a súa xeración marcan unha proposta musical moi recoñecible, pensada para escoitar mais tamén para bailar. Filloas vén de gañar o premio de Novos Talentos do Festigal –onde actuará o 24 de xullo- e este martes tocará no escenario do Atlantic Pride, na Coruña.

Os concertos de Filloas son unha festa con letras non sempre optimistas pero si realistas, sinceras e que conectan co público desde que saíu o seu primeiro disco, en 2022. 

Hai unhas semanas que viu a luz Súbete ao EVA, terceiro traballo de Filloas, «un álbum que te fará bailar, rir e sentir nostalxia a partes iguais», segundo explica o propio artista vigués. 

Este disco confirma o universo musical propio de Filloas, sen deixar de sorprender cunha explosión de hiperpop e ritmos electrónicos, acompañados de letras cheas de referencias a animes icónicos, videoxogos clásicos e modernos e memes de Internet.