Os fans Son Goku tiñan marcado este día no calendario: este xoves chegan a oito cinemas de Galicia (e moitos máis de todo o Estado) as aventuras de Dragon Ball Z Kai e por primeira vez poderase escoitar en galego.
A empresa catalá Selectavisión adquiriu os dereitos de distribución para España da serie de anime Dragon Ball Z Kai, que estrea en cinemas, este 20 de xuño, os catro primeiros episodios (81 minutos) con dobraxe en castelán, catalán, galego e éuscaro.
En Galicia, segundo puidemos comprobar, pode verse en versión galego en seis das oito das salas que estrean os capítulos: Multicines Compostela (Santiago), Cinesa As Cancelas (Santiago), Cinesa Marineda (A Coruña), Cines Ponte Vella (Ourense), Cinexpo (Pontevedra) e no Tamberlick de Vigo. Os cines de Vialia (Vigo) e As Termas (en Lugo) optaron pola versión en español.
Segundo informan desde a distribuidora, o acordo entre coa produtora Toei Animation supó que os fans de toda España poderán gozar de Dragon Ball Z Kai ao completo en todas as linguas oficiais. A adaptación do manga creado polo finado Akira Toriyama, chegará á plataforma AnimeBox nas próximas semans unha vez conclúa a exhibición en cinemas.
A distribuidora tamén anunciou a publicación, este ano de Dragon Ball Z Kai en DVD e Blu-ray, para que todos os fans poidan gozar tamén da calidade do formato físico.
Este xoves chegan ao cinema os catro primeiros episodios (81 minutos) con dobraxe en castelán, catalán, galego e éuscaro
Dragon Ball Kai é un remake da serie Dragon Ball Z, producida en conmemoración do seu 20 aniversario. Comezou a emitirse en abril de 2009. En total ten 167 episodios.
Conta con animación mellorada, soporte para imaxe en alta definición, novos efectos especiais e todas as voces foron regravadas polos actores de dobraxe orixinais. A pesar de que segue a mesma historia que Dragon Ball Z, reduciuse a metraxe drasticamente coa intención de achegala máis ao narrado no manga.
SINOPSE
Unha antiga lenda di: «Reúne as Sete Bolas do Dragón e Shenron o Dragón aparecerá para facer realidade un desexo». Con semellante poder, as Bolas de Dragón son moi cobizadas, especialmente polos máis malvados viláns. Mais coa axuda dos seus amigos e familiares, Son Goku está disposto a loitar contra os seus inimigos para protexer os seu amigos, a súa familia e salvar o Mundo.
CRÉDITOS
TÍTULO ORIXINAL: DRAGON BALL Z KAI
DIRECTOR: Yasuhiro Nowatari y Naohiro Terazaki
AUTOR: Akira Toriyama
XÉNERO: Anime Aventuras
AUDIO: Castelán, Catalán, éuscaro, galego
SUBTÍTULOS :Castelán
VERSIÓN ORIXINAL: Xaponés
AÑO DE PRODUCIÓN: 2009
PAÍS DE PRODUCIÓN: Xapón
DURACIÓN: 81 min.
TIPO DE PRODUTO: Animación xaponesa.
