Abril presenta ‘Arredor da mesa’, un single cociñado a lume lento xunto ás amigas. O novo tema é unha muiñeira de Caroi con arranxos propios, recollida por Xisco Feijoó e con letra orixinal de Petra Iglesias e Claudia Abril. 

O dúo formado por Claudia Abril (voz e percusións) e Marina Carpente (Violín e voz) bebe das músicas de raíz e achega unha proposta moderna e ao tempo delicada. "Arredor da mesa" é unha oda ao amor das amigas, a pasar tempo de calidade con elas, a coidalas e querelas ben. Por esta razón Abril quixo facer unha canción dedicada a elas contando coa súa participación cantando, tocando, escribindo a letra, producindo, dirixindo o vídeo ou actuando. 

«Aquí falamos de coidados e da amizade máis pura. De como compartir os éxitos, sortear as adversidades e superar as derrotas. Falamos da terra, da familia e da xente que escollemos. É unha canción de amor» . Así presenta a banda de rock muradá o tema “Da Mesma Suor”, último adianto do seu novo álbum, Ao revés do mundo, que se estreará o vindeiro mes de xaneiro.

“Da Mesma Suor” sae este xoves á luz como a canción máis alegre do álbum e “o exemplo máis extremo da evolución de Deleiba. «Surfeamos entre o punk vertixinoso, as partes emotivas, o rock máis sólido e incluso os ritmos latinos do retrouso», explican.

«Son un bo chaval que está facendo o mal/ facendo o mal nun festival/ imos acabar no correccional, imos acabar en Pereiro de Aguiar», son algúns dos versos de  “O Mal”,  o novo single de Boyanka Kostova xunto a Galician Army.  A medio camiño entre o trap electrónico, o hard-bass e a rave máis frontal este potente tema ben pode unirse á banda sonora nesta noite de Defuntos nunha boa festa.