A peza máis “dicharacheira e graciosa” do seu último traballo, Je tiens bon, pero tamén unha das máis fondas. MJ Pérez define así a canción “Bingo”, que vén de estrear un videoclip para non perder. 

Cunha sonoridade inesperada —un merengue luminoso e bailable—, a canción funciona como contrapunto a un fondo marcado pola incerteza, a precariedade e a frustración vital. A través do humor e da retranca, MJ Pérez aborda cuestións como a inestabilidade económica, a dificultade para vivir da creación (e non só) ou a sensación constante de estar facendo números para saír adiante. Unha contradición consciente entre forma e fondo: música alegre para falar de todo o contrario. O tema, cantado en portugués, mestura influencias que van do merengue a ecos do fado, nunha produción de Peter Petrowski. 

O videoclip destaca polo seu elenco, con Ailén Kendelman e Areta Bolado —ex compoñentes de A Panadaría— ou o actor Fran Paz (coñecido por traballos en series como Rapa). A peza, dirixida pola propia MJ. Pérez xoga coa imaxe da ostentación e o aparente luxo fronte a unha precariedade que se filtra en cada detalle.