E cantos vraos me quedan dentro deste corpo? Que sempre estou queimando, pero non importa, se na terra, cando chova, do meu corpo van nacer outros corpos. Nuno Pico, Grande Amore, presenta un novo adianto do que será o seu segundo álbum, II. "Do meu corpo van nacer outros corpos" vén acompañada deste videoclip asinado por Xaime Miranda que mostra todos os corpos que terá (ou non) o de Burela grazas á intelixencia artificial. Gravado en diferentes localizacións do Milladoiro, nas inmediacións do Polígono da Costa Vella de Santiago, en Pontecesures e «nun sitio que parecía o Pantano de Susqueda», nel aparecen tamén mariagrep e Clara Redondo, que acompañan a Grande Amore nos directos.