Música

Ataque Escampe. O "Cabaliño lento" e as despedidas incertas

venres 31, marzo 2023

"Cabaliño lento" é o novo adianto do álbum Cabalgata de Ataque Escampe, que será o seu oitavo traballo de estudio e estará dispoñible a finais de abril. Unha canción delicada, construída sobre texturas electrónicas, na que o cabalo é parte do relato dunha despedida incerta. O videoclip de David Silva xoga con esa calma tensa polo adeus cun plano que se vai abrindo ata deixar ver a totalidade da escena. Ao estilo dos retratos dos screen tests de Andy Warhol, o director ralentiza a imaxe nun sutil zoom cara atrás para chamar a atención sobre os mínimos xestos do grupo e de Cacique, o cabalo que os acompaña.

Créditos

Dirección: David Silva
Cámara: Diego López
Son: Hevi
Reparto: Cacique, Lois G. Carlín, Álex Charlón, Miguel Mosqueira, Samuel Solleiro, Cibrán Tenreiro
Produción: Tremendo Audiovisual

Máis Vinte

Lamborghini. Ataque Escampe deconstrúen o amor, un coche e a banda de música de Lalín no seu novo videoclip

Na recta final do ano chega un firme candidato a mellor videoclip de 2022, realizado por David Silva para o novo tema de Ataque Escampe, "Lamborghini". Un vídeo coral, como temos visto outras veces, no que o protagonismo téñeno as rapazas e rapaces que compoñen a banda de música de Lalín, canda outras amigas, nenas e maiores, do grupo compostelán.

Música
'Por última vez'. Ataque Escampe estrean unha versión da canción que levou Ana Kiro ao Festival de Benidorm en 1967

Agora que o festival de Benidorm volve ser algo do que falar, e ademais coa impoñente presenza galega de Tanxugueiras, non vén mal recordar que a Máis Grande, Ana Kiro, estivo alá no ano 1967 cun temazo pop titulado 'Por última vez'. Ataque Escampe non o tiñan esquecido e quixeron facerlle esta homenaxe cantando en galego a canción, como parte do proxecto Puro Deleite, un recompilatorio de versións de clásicos da canción galega feitos por artistas actuais que impulsa Deleite.
Así gravou Ataque Escampe "Por última vez", de Ana Kiro

Este mes de xaneiro Ana Kiro faría 80 anos. Pouca xente lembra que a Máis Grande participou en 1967 no Festival de Benidorm cunha canción, "Por última vez", que agora reinterpretan en galego Ataque Escampe para o proxecto Puro Deleite. Un recompilatorio con versións de clásicos do pop galego revisitados por artistas actuais, que verá a luz a finais de ano impulsado por Deleite, e do que iremos vendo cada mes un novo adianto.