A escritora Berta Dávila (Compostela, 1987), a piques de lanzar a súa nova novela, 'Carrusel' (Premio García Barros 2019), fálanos da súa última obsesión: a serie de Netflix 'Grace e Frankie'.
Creo que dificilmente atoparei unha obsesión tan verdadeira como o que teño con todo o que rodea a Lady Di e á súa performance de vida. Só coñezo unha persoa capaz de obsesionarse tanto con algo: ao meu fillo de catro anos deulle moi forte con Peppa Pig. O seu é máis comprensible que o meu, é certo, pero cando menos eu non durmo abrazada polas noites a un peluche de Lady Di.
Sen embargo, teño unha obsesión recente que compite coas miñas obsesións históricas, e é a serie Grace e Frankie. Protagonizada por Jane Fonda e Lily Tomlin, é a historia de dúas mulleres na súa sexta década de vida cuxos maridos son os dous socios dun bufete de avogados. Lily Tomlin é unha artista hippie e libertaria e Jane Fonda é unha empresaria retirada, dona dun imperio de cosméticos. Pero resulta que a serie non trata de como están mortalmente enemistadas. No primeiro capítulo (non é un spoiler) os seus maridos respectivos anúncianlles que son homosexuais, que están namorados entre ele e que queren o divorcio. E a partir dese punto desencadénase unha comedia divertidísima. Dato: a súa creadora é Marta Kauffman, que é tamén a cocreadora de Friends. Os capítulos son de trinta minutos, así que se poden ir alternando cos de Peppa Pig: unha estratexia win-win.
