"Instante de area". O videoclip que Chicharrón fixo na casa das amigas
Presentamos en primicia o novo videoclip de Chicharrón na véspera do lanzamento do seu sexto álbum, que presentaron dun xeito moi especial nos úilmos meses e así nolo contan.
«Este inverno fixemos unha xira moi especial na que presentamos o sexto disco de Chicharrón, 'O que nos queda por non dicir', nos salóns de seis persoas; todas elas amigas que foron moi importantes para nós na nosa primeira década de historia.
Este videoclip é un documento gráfico destes concertos, feito do mesmo xeito que a xira, entre todas as participantes. O gran Juan Lesta encargouse de darlle forma.
Instante de area é a canción que eliximos para o videoclip, simplemente porque nos divirte moitísimo tocala».
Créditos
Unha montaxe de Juan Lesta, a partir das imaxes gravadas co móbil entre a xente que asistiu a estes seis concertos domésticos de Chicharrón.