Música

Fanny & Alexander con Arancha Nogueira. Música para reivindicar a soidade

Fanny & Alexander estrea videoclip para "O ruxir da túa ausencia", terceiro sinxelo do seu último álbum A túa ausencia neste ar, publicado a finais do pasado ano. Unha peza audiovisual inspirada na estética da banda deseñada, manufacturado pola propia banda dende o máis estrito do it yourself, que conta ademais coa colaboración visual e sonora da poeta Arancha Nogueira, autora dos versos nos que se basea a letra da canción. 

 

A propia Nogueira aparece no videoclip co seu spoken word nun tema que percorre os camiños do dream-pop e o shoegaze seguindo as pegadas de bandas coma Mazzy Star, Slowdive, Cigarettes After Sex, Beach House e mesmo os nosos inesquecibles Nadadora. "O ruxir da túa ausencia" reivindica o dereito á soidade, aleitando a individualidade non só como estratexia vital para reaxir tras unha ruptura sentimental senón como forma de vida social posible.

 

O dúo compostelán voltou estar en activo o pasado ano coa edición de A túa ausencia neste ar despois de máis dunha década en barbeito. Xa están preprando un novo disco no que levarán coplas tradicionais da comarca da Ulla ás sensibilidade indie do século XXI nas coordenadas sonoras de propostas como o Lucas 15 de Nacho Vegas, Beirut, Mumford & Sons ou os seus admirados Os Amigos Dos Músicos.

Créditos

"O ruxir da túa ausencia" é unha canción de Fanny & Alexander

Ao abeiro d'A Regueifa Plataforma 2.0

Máis Vinte

  • A túa ausencia neste ar. Volven Fanny & Alexander, 12 anos despois.

    «Un novo álbum no que, coma o mariñeiro embarcado, a emigrada retornada ou o exiliado político, voltan a casa na percura do que foron». Así presentan Fanny & Alexander o seu cuarto álbum tras 12 anos ausentes da música galega. A túa ausencia neste ar é un disco de querencia conceptual no que «todas as cancións xiran arredor da perda, da ausencia, do que se pode perder nun simple xiro argumental da vida: os pais, os avós, un fillo, o amor, a consciencia dun mesmo, a individualidade coma persoa...».

  • "A pantasma do espello". Fanny & Alexander adaptan un poema de Lorena Souto no seu novo single

    "A pantasma do espello" é o segundo sinxelo de " A túa ausencia neste ar" (A Regueifa Plataforma 2.0, 2022), o álbum que supuxo o rexurdimento do dúo compostelán Fanny & Alexander trás unha década en barbeito. Baseado nun poema de Lorena Souto escrito ad hoc para o disco, a canción enfía a temática común do disco, a ausencia, dende o prisma máis persoal posíbel, a ausencia dun mesmo, da propia conciencia. Un enfoque ao que aporta un especial valor engadido o Spoken Word de Theresa P. Lousame arredor da arbitrariedade da memoria extraido do seu videopoema "Senseno". 

    Música

  • Fanny & Alexander versionan a "Panxoligna de amor R5" de Familia Caamagno

    Un dos máis firmes propósitos de ano novo de FANNY & ALEXANDER logo da súa volta é escribirlle unha carta de amor á música contemporánea galega en forma de versións. Unha sorte de mixtape coa que irán liberando ao longo do ano reinterpretacións dos seus clásicos galegos favoritos das últimas décadas. Ben poderían comezar coa versión electrónica do "Viva a nosa unión" de Xenreira ou coa revisión shoegaze do "Rebolando x ti" de Verto,, mais tendo en conta a época do ano na que estamos prestoulles moito máis comezar coa fermosísima "Panxoligna de amor R5" dos seus admirados Familia Caamagno.

Faite de vinte

A partir de 5€ mensuais podes suscribirte a VINTE e colaborar para que sigamos a producir contidos de calidade pagando dignamente as colaboracións de vídeo, fotografía, ilustración, xornalismo e creación de todo tipo.
Quero ser de Vinte