Familia Caamagno crea unha simulación dos 90 sen saír da pantalla

Unha simulación da nostalxia dos 90 é a "Máquina virtual" na que nos introducen Familia Caamagno con este videoclip creado polos irmáns Xaime e Antón Miranda. Semella que de fondo aínda se poida escoitar o son do router conectándose a internet a través do teléfono. O 'Familia Caamagno 95' (que non Windows 95) lévanos de volta nun segundo a aquel entorno informático co que medramos. De cartafol en cartafol chegamos ao máis íntimo da máquina. Din que non, non é unha canción de amor, pero se cadra un pouco si que o é...

 

A canción "Máquina virtual" é o último adianto do que vén. Toni, Lano, Francesco, Jess e Manuele presentan o seu novo traballo, O mundo está derrotado, o sábado 29 de outubro na Sala Capitol de Santiago. Un concerto moi especial para os de Sigüeiro, que queren xuntar amizades sobre o escenario e entre o público. «Vai ser o concerto máis especial das nosas vidas», aseguran. A celebración está asegurada, pois veñen de levar o Premio Martín Códax da Música na categoría de rock. 

Créditos

"Máquina virtual", de Familia Caamagno

 

Producida, gravada e masterizada en El Castillo Aléman (Pedrezuela) por Carlos Hernández

 

Un videoclip de Xaime e Antón Miranda 

 

Tremendo Audiovisual

Tamén che interesa

  • Familia Caamagno sobe a poxa con "Romper Espagna"

    Os de Familia Caamagno crean a súa propia canle televisiva para ilustrar este "Romper Espagna", unha canción chea de retranca que nos deixa unha mensaxe clara para este verán: pasa de cambiar a Historia, aproveita ben o tempo e vén bailar. 

    Música
  • 'Xuntos': a versión soviética da Familia Caamagno

    E se Juan Pardo vivise na URSS? É se o seu mítico tema 'Xuntos' se cantase nas comunas bolxeviques e non nas paparotas do PP de Fraga? Familia Caamagno regresan con esta versión dunha das cancións máis populares do autor de 'Anduriña' e un videoclip que non podedes perder, baixo a dirección de Xaime Miranda. 

Faite de vinte

A partir de 5€ mensuais podes suscribirte a VINTE e colaborar para que sigamos a producir contidos de calidade pagando dignamente as colaboracións de vídeo, fotografía, ilustración, xornalismo e creación de todo tipo.