O 14 de maio CLO PLAS presentáronse en concerto na "festa do 17 que se celebra o 14" da Gentalha do Pichel en Compostela. O director de fotografía e cineasta documental Juan Meseguer gravouno nun plano-fixo-secuencia ben poderoso, no que podemos ver a Berio Molina e Xiana Arias performando o seu novo proxecto musical. Así se presenta CLO PLAS desde A Regueifa 2.0:

O primeiro traballo de CLO PLAS evidencia a fascinación polo imaxinario libertador de The Last Poets mais o discurso do dúo da Fonsagrada vai máis alá e percorre camiños inéditos que entroncan con pólas tan diversas da cultura galega coma os relato etnobiográficos dos Retrincos de Castelao, o militante vangardismo feito-na-casa da música de Apeiron ou os azos rachadores dos primeiros Resentidos. Nos miúdos estalotes narrativos do adictivo rap lo-fi minimalista que facturan Xiana Arias e Berio Molina (ao que el*s chaman ba-fi) hai espazo para a poesía, o costumismo, a metafisica, o etnográfico e mesmo a carallada, conformando unha proposta radical -no ético mais tenra no estético- inzada de retrousos de instintiva vocación popeira.