Música

A banda da Loba pon “O cora”: música para o documental 'A rebelión da lectura'

venres 16, xaneiro 2026

“Era unha vez unha historia do revés. Era unha vez unha historia con mil pés”. Así comeza “O cora” canción orixinal composta e interpretada por A banda da Loba para o documental A rebelión da lectura.

O tema estará dispoñible en plataformas dixitais a partir deste venres 16 de xaneiro, xunto cun videoclip que recolle a gravación do propio tema. A peza está composta por A banda da loba e producida por A banda da Loba e Arturo Vaquero. A cuberta do single foi deseñada por Xela Alonso.

O documental recolle os 20 anos de historia da asociación Espazo Lectura de Gondomar, que se dedica ao fomento da lectura en lingua galega a través dunha enorme rede de voluntariado. Espazo Lectura conta con clubs orientados para bebés, cativada, adolescentes e adultos. No pasado 2024, foi galardoada co Premio Liber outorgado pola Federación de Gremios de Editores de España e co premio Follas Novas á promoción da lectura.

A rebelión da lectura estrearase o sábado 31 de xaneiro no Auditorio Lois Tobío de Gondomar.

Créditos

“O Cora”

Composición, e interpretación: A banda da loba

Produción: A banda da loba e Arturo Vaqueiro

Deseño da cuberta do single: Xela Alonso

Tamén che interesa

A banda da Loba estrea novo disco: ‘Lovismo’ celebra a vida con amor

Desde este venres xa se pode escoitar o quinto traballo d'A banda da Loba, Lovismo, composto por once temas que teñen como fío condutor o amor nas súas múltiples formas de expresión como o desexo, as relacións, a maternidade, a sororidade ou o amor polo noso. Segundo explica Andrea Porto, neste traballo quixeron falar do amor desde distintas perspectivas pero sen esquecer «o amor a nós mesmas, fundamental para desde aí, querer ben».
A presentación pública de Lovismo será nun concerto na Sala Capitol de Santiago o vindeiro 1 de febreiro. Unha auténtica festa na que estarán rodeadas de artistas amigas no escenario como De Vacas, Tomé Mouriño (De Ninghures) e os músicos Adrián Real, Manu Doel, Lara Porto e Cristóbal Fernández, responsables dos instrumentos de vento do disco.

Música
Novo sinxelo de A banda da Loba. “Lova”, ouveo liberador feito música

«Comeza o lovismo, comeza a cantar, convértete en loba e ponte a ouvear». O fermoso son do violín de Estela Rodríguez principia o novo sinxelo de A banda da Loba, “Lova”, adianto do que sera o novo disco da banda, Lovismo, que se publicará a comezos de 2025 e será presentado o 1 de febreiro na Sala Capitol de Compostela.
Explican desde a banda que o amor e as súas múltiples formas de expresión ―o desexo, as relacións, a maternidade, o amor propio, a sororidade, o amor polo noso...― serán o leitmotiv de Lovismo, un disco onde confluirán diferentes estilos, desde a bachata ata o pop pasando pola música disco e reivindicando a inspiración literaria da que fan gala desde o seus inicios as compoñentes de A Banda da Loba (ABDL).

Música